ឥទ្ធិពលព្យុះព្រះភិរុណ បណ្តាលឲ្យមានមនុស្សស្លាប់នៅ វៀតណាម

តាមការចុះផ្សាយរបស់ VN Express សម្រាប់ថ្ងៃពុធ ទី២៤ ខែកក្កដា ឆ្នាំ២០២៤, ឥទ្ធិពលនៃព្យុះ ព្រះភិរុណ នៅប្រទេសវៀតណាម បានបង្កជាជំនន់ទឹកភ្លៀងនិងបំណាក់ដី ដោយពេលនេះ បណ្តាលឲ្យមានមនុស្សស្លាប់និងបាត់ខ្លួនជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅស្រុក Mai Son និង Thuan Chau នៃខេត្ត Son La ភាគពាយព្យប្រទេសវៀតណាម មនុស្សចំនួន៣នាក់ត្រូវបាត់បង់ជីវិត ខណៈ៥នាក់បាត់ខ្លួន ដោយសារតែភ្លៀងធ្លាក់ខ្លាំងដូចហែកមេឃ និងបំណាក់ដី ដែលវាយប្រហារនាពេលព្រឹកព្រលឹមថ្ងៃពុធ។

២ថ្ងៃមកហើយ ភ្លៀងធ្លាក់ខ្លាំងនៅស្រុក Mai Son ធ្វើឲ្យទឹកហូរចុះពីលើភ្នំ បុកសំដៅទៅទីប្រជុំជន ខណៈភិបាលស្រុកនិយាយថា “ទំហំនៃការបំផ្លិចបំផ្លាញគឺធំធេង ដែលយើងមិនអាចវាយតម្លៃបានភ្លាមៗនោះទេ”។

សូមបញ្ជាក់ថា មុនវាយប្រហារខេត្ត Son La, ព្យុះព្រះពិរុណ ក៏បង្កការបំផ្លិចបំផ្លាញខេត្ត Quang Ninh ភាគខាងជើងប្រទេសវៀតណាមផងដែរ ដោយបណ្តាលឲ្យមានភ្លៀងធ្លាក់ខ្លាំង និងបំណាក់ដី ដូចគ្នា។

នៅ Quang Ninh ឥទ្ធិពលព្យុះនេះ បានបង្កជាទឹកជំនន់តាមដងផ្លូវ ព្រមទាំងបោកបំបាក់ដើមឈើទៀតផង ជាហេតុបណ្តាលឲ្យមានការកកស្ទះចរាចរណ៍នៅតាមផ្លូវមួយចំនួន។

មិនត្រឹមប៉ុណ្ណឹង អាជ្ញាធរក្រុង Hai Phong ក៏ប្រកាសបិទសាលារៀន និងអាជីវកម្មមួយចំនួនផងដែរ ដើម្បីបង្ការកុំឲ្យគ្រោះថ្នាក់ណាមួយកើតឡើង។

សូមបញ្ជាក់ថា ព្រះភិរុណ គឺ​ជា​ព្យុះ​ធំ​ទី​ពីរ​នៅ​សមុទ្រ​ចិន​ខាង​ត្បូង​ក្នុង​ឆ្នាំ​នេះ បន្ទាប់​ពី​ព្យុះ​ទី​មួយ ដែលបក់បោក​កាល​ពី​ខែ​ឧសភា ហើយទីភ្នាក់ងារឧតុនិយមវៀតណាម បានចេញការព្រមានថា ឆ្នាំនេះ នឹងមានព្យុះពី១១ទៅ១៣ កកើតក្នុងសមុទ្រចិនខាងត្បូង ខណៈក្នុងនោះ នឹងមានចន្លោះពី ៥ទៅ ៧ ដែលអាចវាយប្រហារដីគោកវៀតណាម៕

អត្ថបទ៖ សុខ សុវណ្ណ

ចុចអាន៖ ព្យុះព្រះភិរុណ បង្កការបំផ្លិចបំផ្លាញនៅភាគខាងជើង ប្រទេសវៀតណាម