ភាគីពាក់ព័ន្ធ៖ កម្ពុជាត្រូវមាន“ធម្មនុញ្ញវិជ្ជាជីវៈសារព័ត៌មាន” ដើម្បីលើកតម្លៃ និងជំនឿទុកចិត្តលើវិជ្ជាជីវៈសារព័ត៌មាន

អ្នកសារព័ត៌មានតំណាងឱ្យសមាគម អង្គភាពសារព័ត៌មាន និងភាគីពាក់ពន្ធ័ក្នុងវិស័យព័ត៌មាន បានបញ្ជាក់ពីភាពចាំបាច់ដែលត្រូវមាន “ធម្មនុញ្ញវិជ្ជាជីវៈសារព័ត៌មាន” ដើម្បីពង្រឹងការអនុវត្តក្រមសីលធម៍វិជ្ជាជីវៈ និងលើកតម្លៃនិងជំនឿទុកចិត្តលើវិជ្ជាជីវៈសារព័ត៌មាននៅកម្ពុជា។

ការបញ្ជាក់របស់អ្នកសារព័ត៌មានចំពោះភាពចាំបាច់ក្នុងការបង្កើតឱ្យមាន “ធម្មនុញ្ញវិជ្ជាជីវៈសារព័ត៌មាន” ធ្វើឡើងក្នុងឱកាសអញ្ជើញចូលរួមក្នុងសិក្ខាសាលាពិគ្រោះយោបល់លើសេចក្តីព្រាង “ ធម្មនុញ្ញវិជ្ជាជីវៈសារព័ត៌មាន “ នាព្រឹកថ្ងៃទី២៤ ខែកក្កដា ឆ្នាំ២០២៤ នៅសាលចតុម្មុខមង្គលទីស្តីការក្រសួងព័ត៌មាន ក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន និងមានការអញ្ជើញចូលរួមពីតំណាងអង្គការ UNESCO ក្លឹបអ្នកកាសែតកម្ពុជា សមាគម សម្ព័ន្ធសារព័ត៌មាន និង មជ្ឈមណ្ឌលព័ត៌មានមូស្លីមកម្ពុជា ប្រមាណជាង ២០០នាក់ ។

លោករដ្ឋមន្ត្រី នេត្រ ភក្ត្រា មានប្រសាសន៍លើកឡើងថា ថ្ងៃនេះគឺជាថ្ងៃប្រវត្តិសាស្រ្តថ្មីមួយសម្រាប់អ្នកសារព័ត៌មានដើម្បីពិនិត្យពិគ្រោះយោបល់លើសេចក្តីព្រាងធម្មនុញ្ញវិជ្ជាជីវៈសារព័ត៌មាន ដែលជាមូលដ្ឋានគ្រឹះរួមនៃក្រមសីលធម៌វិជ្ជាជីវៈសារព័ត៌មាន និងក៏ជាឧបករណ៍គតិយុត្តរួមមួយសម្រាប់អ្នកសារព័ត៌មាន និងអ្នកប្រកបអាជីពក្នុងវិស័យព័ត៌មាន និងសោតទស្សន៍នៅកម្ពុជាគោរពប្រតិបត្តិសំដៅលើកកម្ពស់ និងតម្លៃនៃវិជ្ជាជីវៈសារព័ត៌មាននៅកម្ពុជា។

លោករដ្ឋមន្ត្រីបានថ្លែងថា ធម្មនុញ្ញសារព័ត៌មាននេះត្រូវបានរៀបចំឡើងដោយឈរលើមូលដ្ឋាននៃសំណើនិងសំណូមពរ ក៏ដូចជាមតិយោបល់របស់អ្នកសារព័ត៌មាន។ កាលពីពេលកន្លងមកនេះ អ្នកសារព័ត៌មានត្រូវបានផ្តល់ក្រដាសសមួយសន្លឹករួមនឹងប៉ិចដើម្បីសរសេរលើកឡើងនូវអ្វីដែលខ្លួនចង់បានដើម្បីការពារសិទ្ធិខ្លួន និងអ្វីដែលត្រូវធ្វើនិងមិនត្រូវធ្វើដើម្បីតម្លៃវិជ្ជាជីវៈ។

លោករដ្ឋមន្ត្រីក្រសួងព័ត៌មាន បានបង្ហាញ នូវសារៈសំខាន់នៃរៀបចំឱ្យមាន “ ធម្មនុញ្ញវិជ្ជាជីវៈសារព័ត៌មាន” ក្នុងគោលបំណងធានាសុខដុមនីយកម្ម និងសង្គតិភាពនៃក្រមសីលធម៌វិជ្ជាជីវៈ ក្នុងវិស័យព័ត៌មាននិងសោតទស្សន៍ បង្កើតនិយាមប្រតិបត្តិរួមដែលជាគោលការណ៍គ្រឹះសម្រាប់អ្នកប្រកប អាជីពក្នុងវិស័យព័ត៌មាននិងសោតទស្សន៍ ហើយក៏ជាការរៀបចំនិងធានាសណ្ដាប់ធ្នាប់របៀប រៀបរយនៃវិជ្ជាជីវៈសារព័ត៌មាន លើកកម្ពស់គុណតម្លៃ និងឥទ្ធិពលជាវិជ្ជមាននៃវិជ្ជាជីវៈសារព័ត៌មាន ជាអំណាចទី៤ ក្នុងសង្គមកម្ពុជា។

ទន្ទឹមនេះ ក៏បន្តធានាបរិយាកាសល្អប្រសើរសម្រាប់ការអនុវត្តក្រមសីលធម៌វិជ្ជាជីវៈ សារព័ត៌មានប្រកបដោយទំនុកចិត្ត ប្រសិទ្ធភាព គុណភាព និងទំនួលខុសត្រូវវិជ្ជាជីវៈ ជាផ្នែកមួយសម្រាប់ការលើកកម្ពស់សេរីភាពខាងសារព័ត៌មាន និងសេរីភាពខាងការបញ្ចេញមតិ និងការការពារសុវត្ថិភាពអ្នកសារព័ត៌មាន។

លោក នេត្រ ភក្ត្រា ក៏បានធ្វើការបញ្ជាក់ដែរថា ការរៀបចំឱ្យមាន ធម្មនុញ្ញវិជ្ជាជីវៈសារព័ត៌មាន ដើម្បីតម្រង់ទិសលើការប្រតិបត្តិក្រមសីលធម៌ក្នុងវិស័យព័ត៌មាន និងសោតទស្សន៍ ហើយធានាសន្តិសុខព័ត៌មាននៅកម្ពុជា និងបញ្ជ្រាបការយល់ដឹងអំពីភាពចាំបាច់នៃការអនុវត្តប្រកបដោយសុខុដុមនីយកម្ម ក្នុងចំណោមតួអង្គពាក់ព័ន្ធទាំងអស់ នូវគោលការណ៍គ្រឹះនៃវិជ្ជាជីវៈសារព័ត៌មាន ខណៈគ្រប់តួអង្គទាំងអស់ត្រូវសម្របខ្លួនទៅតាមការវិវឌ្ឍរីកចម្រើននៃបច្ចេកវិទ្យា និងបញ្ញាសប្បនិម្មិត (AI)។

ទន្ទឹមនេះក៏ជាការលើកកម្ពស់ការផ្សព្វផ្សាយព័ត៌មានពិត ត្រឹមត្រូវ គ្រប់ជ្រុងជ្រោយ ប្រកបដោយតុល្យភាព និងមានប្រភពច្បាស់លាស់ ហើយចូលរួមបង្ការ ទប់ស្កាត់ និងប្រឆាំងព័ត៌មានក្លែងក្លាយ ដើម្បីធានាភាពជឿជាក់ និងទុកចិត្តក្នុងសង្គមជាតិទាំងមូល សំដៅលើកកម្ពស់វិស័យសារព័ត៌មាន ដែលជាអំណាចទី៤ តាមគន្លងមាគ៌ានៃសង្គមប្រជាធិបតេយ្យ និងនីតិរដ្ឋក្នុងការរួមចំណែកការពារ និងថែរក្សាសុខសន្តិភាព និងការអភិវឌ្ឍប្រកបដោយចីរភាពនៅកម្ពុជា ៕