ធនាគារជាតិឱ្យគ្រឹះស្ថានផ្ដល់ប្រាក់កម្ចី បន្តការរៀបចំឥណទានឡើងវិញ

ធនាគារជាតិ នៃ​កម្ពុជា​នៅថ្ងៃទី ២៣ ខែសីហា ឆ្នាំ ២០២៤នេះ បាន​ប្រកាស​អនុញ្ញាត​ឱ្យ​គ្រឹះស្ថាន​ធនាគារ និង​ហិរញ្ញវត្ថុ​រៀបចំឥណទានឡើងវិញ​ដល់អតិថិជនដែល​ជួបប្រទះ​ការលំបាក។

សេចក្ដីប្រកាសរបស់ធនាគារជាតិបានធ្វើឡើង បន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានប្រកា​ស​ដាក់ចេញវិធានការសម្របសម្រួល​ជាមួយគ្រឹះស្ថានធនាគារ និងមីក្រូហិរញ្ញវត្ថុ ដើម្បីឱ្យ បន្ធូរបន្ថយលក្ខខណ្ឌ និងសម្រួល​ដល់ការរៀបចំឥណទានឡើងវិញ សម្រាប់អតិថិជន។

សម្តេចធិបតី ហ៊ុន ម៉ាណែត មានប្រសាសន៍ថា ធនាគារជាតិនៃកម្ពុជា បានពិភាក្សាជា​មួយ​ធនាគារឯកជន និងគ្រឹះស្ថានមីក្រូហិរញ្ញវត្ថុ ដើម្បីស្វែងរកដំណោះស្រាយ វិធីសាស្ត្រជួយ​សម្រាលបន្ទុកចំណាយរបស់អាជីវករ សហគ្រាស ប្រជាពលរដ្ឋ និងបង្កើនលំហូរសាច់​ប្រាក់ចូល​ទៅក្នុងទីផ្សារ។

ជាលទ្ធផល នៅក្នុងទិសដៅធានាបាននូវសាច់ប្រាក់គ្រប់គ្រាន់នៅក្នុងទីផ្សារ រាជរដ្ឋាភិបាល តាមរយៈធនាគារជាតិនៃកម្ពុជា បានបន្ធូរបន្ថយនូវលក្ខខណ្ឌមួយចំនួន ដែលអាចបង្កើន​លទ្ធភាព ឱ្យគ្រឹះស្ថានធនាគារ និងមីក្រូហិរញ្ញវត្ថុ បញ្ចេញសាច់ប្រាក់ចូលក្នុងសេដ្ឋកិច្ច អាចបានជាង២៣០០លានដុល្លារបន្ថែមទៀត។

កាលពីខែវិច្ឆិកា ឆ្នាំ២០២៣ ធនាគារជាតិ បានកាត់បន្ថយប្រាក់បម្រុងកាតព្វកិច្ច ជារូបិយ​បណ្ណរបស់គ្រឹះស្ថានធនាគារ​ពី៩ភាគរយ មក៧ភាគរយ រហូតដល់ដំណាច់ឆ្នាំ២០២៤។ ជាលទ្ធផលប្រព័ន្ធធនាគារមានសាច់ប្រាក់ប្រមាណជាង ១ ពាន់លានដុល្លារសម្រាប់ចាក់ចូលទៅក្នុងសេដ្ឋកិច្ច។

ធនាគារជាតិបានសម្រេចអនុញ្ញាតឱ្យបន្តគោលការណ៍នេះ រហូតដល់ឆ្នាំ២០២៥។ បន្ថែមពីនេះ ធនាគារក៏បានឯកភាពពីនេះទៅមុខ ទី១. បន្ធូរបន្ថយបទប្បញ្ញត្តិពាក់ព័ន្ធនឹងការចាត់តាំងថ្នាក់ហានិភ័យ ឥណទានបច្ចុប្ប​ន្នរបស់ធនាគារជាតិ ដោយអនុញ្ញាតឲ្យធនាគារ និងគ្រឹះស្ថានមីក្រូហិរញ្ញវត្ថុ រៀបចំឥណទានស្តង់ដារឡើងវិញ​ ឥណទានមានប្រវត្តិ​សង​ត្រលប់​ទៀងទាត់ជូនអតិថិជន បានចំនួន២លើក ដោយមិនចាំបាច់ ធ្វើចំណាត់ថ្នាក់មកជាឥណទានមិនល្អ រហូតដល់ដំណាច់ឆ្នាំ២០២៥។

សម្តេចធិបតី ហ៊ុន ម៉ាណែត មានប្រសាសន៍ថា៖ «វិធីនេះនឹងធ្វើឱ្យអតិថិជនមានសាច់​ប្រាក់ក្នុង​ដៃស្រាប់ សម្រាប់ទ្រទ្រង់ជីវភាពប្រចាំថ្ងៃ ឧទាហរណ៍ករណីបងប្អូនប្រជាពលរដ្ឋ ត្រូវបង់ធនា​គារមួយខែ៥០០ដុល្លារទាំងដើមទាំងការ តាមរយៈគោលការណ៍ថ្មី ដែលធនាគារដាក់ចេញនេះ បងប្អូនប្រហែលជាអាចបង់ ត្រឹមពី៣០០ទៅ៤០០ដុល្លារ ទាំងប្រាក់ដើម និងការប្រាក់ ហើយប្រាក់​ដែលនៅ​សល់១០០ទៅ២០០ដុល្លារ គឺសម្រាប់​ប្រើប្រាស់ក្នុងជីវភាព​ប្រចាំថ្ងៃបាន»។

លោក កាំង តុងងី បានឱ្យដឹងនៅថ្ងៃទី ១៥ ខែសីហា ឆ្នាំ ២០២៤ នេះថា ឥណទានដែលអតិថិជនសងត្រឡប់ទៅគ្រឹះស្ថាន​មីក្រូហិរញ្ញវត្ថុ យឺតលើសពី ៣០ ថ្ងៃ បាន​កើនឡើងរហូតដល់ ៩% ដែលកម្ពុជាមិនធ្លាប់មានពីមុនមក ប៉ុន្តែ​បើធៀបនឹងតំបន់ និងពិភ​ព​​លោក កម្ពុជាស្ថិតនៅក្នុងកម្រិតទាបជាងគេ។

យោងតាមរបាយការណ៍របស់ការិយាល័យ​ធានា​ឥណ​ទានកម្ពុជា (CBC) បានបង្ហាញថា គិតត្រឹម​​រយៈពេល ៣ ខែត្រីមាសទី២ ឆ្នាំ២០២៤ គុណភាពឥណទានរបស់អាជីវកម្មខ្នាតតូចមានការធ្លាក់ចុះ ជាមួយនឹងការកើនឡើងគណនីប្រាក់កម្ចី និងការសងត្រឡប់យឺតលើសពី ៣០ ថ្ងៃ កើនឡើង​រហូតដល់ ៨,៣%។

ធនាគារជាតិ នៃ​កម្ពុជាបានបញ្ជាក់នៅថ្ងៃទី ២៣ ខែសីហា ឆ្នាំ ២០២៤ នេះថា ដើម្បីផ្ដល់លទ្ធភាពបន្ថែមឱ្យគ្រឹះស្ថានធនាគារ និងហិរញ្ញវត្ថុបញ្ចេញឥណទាន សំដៅចូលរួមចំណែកជំរុញសេដ្ឋកិច្ចជាតិធនាគារជាតិសម្រេចឱ្យ៖

១. បន្តអនុវត្តអនុបាតទ្រនាប់ដើមទុនខនស៊ើវេសិន អត្រាប្រាក់បម្រុងកាតព្វកិច្ច ជារូបិយប័ណ្ណ ត្រឹមកម្រិត ១,២៥%  រហូតដល់ថ្ងៃទី ៣១ ខែធ្នូឆ្នាំ ២០២៥។

២. បន្តអនុវត្តប្រាក់បម្រុងកាតព្វកិច្ចជារូបិយប័ណ្ណ ត្រឹមមកកម្រិត ៧% រហូតដល់ថ្ងៃទី ៣១ ខែធ្នូ ឆ្នាំ ២០២៥

៣. រៀបចំឥណទានឡើងវិញជូនអតិថិជន ដែលជួបប្រទះការលំបាកផ្នែកហិរញ្ញវត្ថុបណ្ដោះ​អាសន្នស្របតាមលក្ខណ្ឌកំណត់ ក្នុងសារាចរណ៍ណែនាំដោយឡែក៕

អត្ថបទ៖ ឡេង ដេត