ព្យុះកំណាច យ៉ាកជី៖ វៀតណាម បិទព្រលានយន្តហោះនិងជម្លៀសមនុស្សជាង ១៣ ០០០នាក់ 

វៀតណាម បានបិទព្រលានយន្តហោះចំនួន៤កន្លែងនិងជម្លៀសមនុស្សជាង១៣ ០០០នាក់ ដោយសារតែឥទ្ធិពលដ៏ខ្លាំងនៃព្យុះ យ៉ាកជី ដែលគេព្យាករថា នឹងវាយប្រហារប្រទេសនេះធ្ងន់ធ្ងរនៅថ្ងៃសៅរ៍ទី៧ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមអាជ្ញាធរអាកាសចរណ៍ស៊ីវិលវៀតណាម, ព្រលានយន្តហោះ Van Don, Cat Bi, Noi Bai និង Tho Xuan នឹងត្រូវបិទជាបណ្តោះអាសន្ននៅថ្ងៃនោះ ព្រោះតែព្យុះនេះមានកម្លាំងខ្លាំង ​អាចបង្កហានិភ័យនៃគ្រោះមហន្តរាយ គំរាមកំហែងដល់សុវត្ថិភាពនៅអាកាសយានដ្ឋាន។ 

ស្របពេលជាមួយគ្នានោះ ប្រជាជនវៀតណាមជាង ១៣ ០០០នាក់ដែលរស់នៅតាមកន្លែងងាយរងគ្រោះដូចជា Hai Phong, Quang Ninh និង Thai Binh ក៏ត្រូវបានជម្លៀសផងដែរ។

អ្នកទាំងនោះ ត្រូវបានជម្លៀសទៅកាន់ទីតាំងសុវត្ថិភាពដែលរៀបចំដោយរដ្ឋដូចជានៅតាមសាលារៀន និងអាផាតមិនជាដើម។

មិនត្រឹមប៉ុណ្ណឹង ទីក្រុង Hai Phong ក៏សម្រេចចិត្តបិទសាលាហើយឲ្យសិស្សរៀនតាមអនឡាញវិញ ដើម្បីធានាសុវត្ថិភាពសិស្ស កុំឲ្យជួបគ្រោះថ្នាក់ពេលធ្វើដំណើរទៅរៀន។

វិធានការទាំងនេះធ្វើឡើង បន្ទាប់ពី យ៉ាកជី បានវិវឌ្ឍខ្លួនទៅជាព្យុះទីហ្វុងកំណាច ជាមួយខ្យល់ល្បឿន២០១គីឡូម៉ែត្រក្នុងមួយម៉ោង។

ដោយសារតែកម្លាំងរបស់ខ្លាំងបែបនេះហើយ ទើបវៀតណាម ប្រញាប់ប្រញាល់ដាក់ចេញវិធានការចាំបាច់ទាំងអស់ ធ្វើយ៉ាងណា ដើម្បីធានាសុវត្ថិភាពប្រជាជនខ្លួនឲ្យបាន៕ 

អត្ថបទ៖ សុខ សុវណ្ណ

ចុចអាន៖ វៀតណាម ប្រុងជើងការ ទប់ទល់ជាមួយព្យុះ យ៉ាកជី ដ៏ខ្លាំង