​បុរសបើកទ្វារយន្តហោះអំឡុងពេល​ហោះ​ហើរ​រងពិន័យ​ប្រាក់​៥៤ម៉ឺនដុល្លារ

តុលាការ​កូរ៉េ​​ខាងត្បូង​​បង្គាប់​ឱ្យ​បុរស​ម្នាក់​ដែលមាន​ឈ្មោះ​ហៅ​កាត់ថា A ដែលបានបង្កគ្រោះថ្នាក់​​និង​ការ​ភ័យខ្លាច​​ដល់អ្នករួម​​ដំណើរ ​នៅ​លើ​យន្តហោះ​ ដោយការបើកទ្វារយន្តហោះនៅកណ្តាលអាកាស មុនពេលចុះចតនៅអាកាសយានដ្ឋាន Daegu ត្រូវបង់ប្រាក់ជាង៧០០លានវ៉ុន (៥២៥០០០ដុល្លារ) ដល់ក្រុមហ៊ុនអាកាសចរណ៍ Asiana ចំពោះការខូចខាតយន្តហោះនាពេលនោះ។ នេះបើយោងតាមការចេញផ្សាយរបស់ allpop នៅថ្ងៃទី៦ខែកញ្ញានេះ។

លោក Chae Seong-ho ប្រធានចៅក្រ​មនៃ​តុលាការក្រុង Daegu បានបញ្ជាឱ្យលោក A បង់ប្រាក់ចំនួន ៧៣​លាន​វ៉ុន (៥៤៥០០០ដុល្លារ) ដល់ក្រុមហ៊ុន Asiana Airlines តាមពាក្យបណ្តឹងដែលក្រុមហ៊ុនអាកាសចរណ៍ដែលបានប្តឹងទាមទារសំណងខូចខាត។

គួររម្លឹកថា ឧបទ្ទវហេតុនេះបានកើតឡើងនៅថ្ងៃទី ២៦ខែឧសភាឆ្នាំ២០២៣ វេលាម៉ោង ១២ៈ៣៧ នាទីយប់ ដែលលោក A ត្រូវបានចោទប្រកាន់ពីបទបំពានច្បាប់សុវត្ថិភាពអាកាសចរណ៍ និងការខូចខាតទ្រព្យសម្បត្តិដោយសារចេតនាបើកទ្វារយន្តហោះលើជើងហោះហើរ «Flight ៨១២៤»។

ជើងហោះហើរនេះធ្វើដំណើរពីកោះ​Jeju ទៅកាន់​ទីក្រុង​ Daegu ដោយ​មាន​អ្នកដំណើរ១៩៤នាក់នៅលើយន្តហោះ កំពុងរៀបចំចុះចតនៅកម្ពស់ ២១៣-២៤៣ ម៉ែត្រ។ លោក A ក៏បានប្រឈមមុខនឹងការចោទប្រកាន់ពីបទបំផ្លាញយន្តហោះដោយបណ្តាលឱ្យមានការខូតខាតជាច្រើនលើយន្តហោះ។

នៅពេលនោះ អ្នកដំណើរ៩នាក់ រួមទាំងសិស្សសាលាបឋមសិក្សា បានជួបបញ្ហាពិបាកដកដង្ហើម ហើយត្រូវបានបញ្ជូនទៅមន្ទីរពេទ្យភ្លាមៗ បន្ទាប់ពីចុះចត។ ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន បានប៉ាន់ប្រមាណថា ការចំណាយលើការជួសជុលទ្វារយន្តហោះដែលខូចខាត មានចំនួនប្រហែល ៦៤០លានវ៉ុន ស្មើនឹង៤៨ម៉ឺនដុល្លារ។

លើសពីនេះតំណាងអយ្យការបានប្តឹងទៅឧទ្ធរណ៍លើការសម្រេចរបស់សវនាការលើកទីមួយ ហើយបានចោទប្រកាន់បន្ថែមលើលោក A កាលពីខែមីនា ពីបទធ្វើឱ្យអ្នកដំណើរ១៥នាក់រងរបួសដោយសារការបើកទ្វារភ្លាមៗនោះផងដែរ៕

អត្ថបទ៖ ប៊ុន សុភាព