សហគ្រាសខ្នាតមីក្រូ តូច និងមធ្យម ២ ៦៧៨​ទទួលបានការធានាឥណទានពី CGCC ​ក្នុងទំហំទឹកប្រាក់ជិត ២២៥ លានដុល្លារ

សាជីវកម្មធានាឥណទានកម្ពុជា (CGCC) បានផ្តល់ការធានាលើកម្ចីអាជីវកម្ម ដល់សហគ្រាសខ្នាតមីក្រូ តូច និងមធ្យម(MSMEs) ​ចំនួន ២ ៦៧៨ គណនី ស្មើនឹងទំហំទឹកប្រាក់ឥណទានចំនួន ២២៤,៨៩លានដុល្លារគិតត្រឹមដំណាច់ខែសីហា ឆ្នាំ២០២៤ ដែលផ្តល់លទ្ធភាពដល់សហគ្រាសទាំងនោះមានទុនដើម្បីយក​ទៅ​បន្តនិរន្តភាពនិងពង្រីកអាជីវកម្មរបស់ពួកគេ បន្ទាប់ទទួលរងផលប៉ះពាល់​ដោយការរីក​រាលដាលនៃជំងឺកូវីដ១៩ និងការធ្លាក់ចុះនៃសកម្មភាពសេដ្ឋកិច្ច។

បើយោងតាមរបាយការណ៍របស់​ CGCC សម្រាប់កញ្ចប់ឥណទាននេះគឺធ្វើការធានានៅក្រោមគម្រោធានាឥណទានចម្បងចំនួន៥គឹ គម្រោងធានាឥណទានដើម្បីស្តារអាជីវកម្ម (BRGS) គម្រោងធានាឥណទានសម្រាប់សហហិរញ្ញប្បទាន (CFGS) គម្រោងធានាឥណទានសម្រាប់សហគ្រិនស្ត្រី (WEGS) គម្រោងធានាឥណទានសម្រាប់សហហិរញ្ញប្បទាន សម្រាប់វិស័យទេសចរណ៍ (CFGS-TR) និងគម្រោងធានាឥណទានជាកញ្ចប់ (PGS)។ ក្នុងនោះគម្រោងធានាឥណទានជាកញ្ចប់មានទាំងអស់ ១៥គម្រោង ដែល មានគ្រឹះស្ថានហិរញ្ញវត្ថុចូលរួមចំនួន ៧ស្ថាប័ន។

គិតត្រឹមចុងខែសីហា ឆ្នាំ២០២៤ សម្រាប់ទំហំឥណទានដែលមានការធានាឥណទានសរុបសន្និធិទំហំការធានាឥណទានមានចំនួន ១០៤,៦០លានដុល្លារ ; សន្និធិឥណទានដែលមានការធានាមានចំនួន ​១៤៣,៣៨លានដុល្លារ និងសំណងដែលបានបញ្ចេញមានចំនួន ៩២៩ ៧១១ដុល្លារ។ ជាមួយគ្នានេះដែរ ឥណទានមិនដំណើការមានរហូតដល់ ៩,៨៧%។

​​​លោក Wong Keet Loong នាយកប្រតិបត្តិCGCC បានលើកឡើងនៅក្នុងរបាយការណ៍​នោះថា​ ផ្អែកទៅលើទិន្នន័យចុងក្រោយរបស់ CGCC យើងឃើញថាមានអាជីកម្ម ៣ប្រភេទដែលមានចំណាត់ថ្នាក់ឥណទានធ្លាក់ចុះ ចាប់ពី «ក្រោមស្តង់ដារ» រហូតដល់ «បាត់បង់» ខ្ពស់ជាងគេ គឺជាង៣៩%នៃអាជីវកម្មទាំងអស់។ អាជីវកម្ម៣ប្រភេទនោះរួមមាន ការលក់គ្រឿងទេស និងភេសជ្ជៈ (១៤,៧%); ការធ្វើសំណង់និងជួញដូរគ្រឿងសំណង់(១២,២%); ​ និងការជួញដូរផលិតផលកសិកម្ម (២១,២%)។

លោកបានគូសបញ្ជាក់ថា៖« ដើម្បីជំរុញកំណើនអភិវឌ្ឍន៍របស់សហគ្រាសមីក្រូ តូច និង មធ្យមទូទាំងប្រទេស CGCC បានពង្រីកវិសាលភាពការធានាឥណទាន​គ្របដណ្តប់​បានទូទាំង២៥​រាជធានី-ខេត្ត តាមរយៈវិធានការ និងសកម្មភាពនានារបស់ខ្លួន»៕ ​

​