ចរាចរណ៍

ពេជ្រ ខាំឡៃ កូនសិស្សលោកគ្រូ ពេជ្រ សុផាន់ ត្រូវរថយន្តបុករបួសធ្ងន់ ខណៈកំពុងរត់ហ្វឹកហាត់

បានផុស

៩ ខែ មុន

នៅ

ថ្ងៃអង្គារ ២៩ តុលា ២០២៤

ដោយ

កីឡាករប្រដាល់ ពេជ្រ ខាំឡៃ កូនសិស្សលោកគ្រូ ពេជ្រ សុផាន់ បានរងរបួសធ្ងន់ ខណៈកំពុងរត់ហ្វឹកហាត់តាមផ្លូវ មានកុងតឺន័រ ១ គ្រឿង បើកបរល្បឿនលឿនវាក់អើជាមួយម៉ូតូកង់បី ១ គ្រឿង នៅខាងមុខ រួចរថយន្តនេះ ជាន់ហ្រ្វាំងបន្ថយល្បឿន តែអត់ស៊ី ក៏គេចចេញមកខាងឆ្វេង ជ្រុលទៅនារីម្នាក់ជិះម៉ូតូ បន្តបុកបង្គោលភ្លើង ១ ដើម បាក់រលើងគល់ រួចបន្តបុកចូលកន្លែងលក់មាន់បង្វិល បង្កការខូចខាតខ្ទេចខ្ទីទើបឈប់។

ហេតុការណ៍នេះបានកើតឡើងកាលពីវេលាម៉ោង ៣ និង ៤០ នាទីរសៀល ថ្ងៃទី ២៨ ខែតុលា ឆ្នាំ ២០២៤ នៅតាមផ្លូវ ៣០ ម៉ែត្រ ភូមិដំណាក់ត្រយឹង សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។

រថយន្តបង្ក ពណ៌ស ពាក់ស្លាកលេខភ្នំពេញ 3F-6490 អ្នកបើកបរបានរត់គេចខ្លួនបាត់ស្រមោល។ ក្នុងហេតុការណ៍នេះមានជនរងគ្រោះចំនួន ២ នាក់ គឺ ទី១,ឈ្មោះ ហាន ដាណែត ភេទស្រី អាយុ ១៨ ឆ្នាំ ជិះម៉ូតូ ១ គ្រឿង ម៉ាកហុងដាឌ្រីមសេ ១២៥ ពណ៌ខ្មៅ ពាក់ស្លាកលេខព្រៃវែង 1O-5008។ ទី២,ឈ្មោះ ផាន់ ខាំឡៃ ជាសិស្សរបស់លោកគ្រូ ពេជ្រ សុផាន់ ស្នាក់នៅភូមិត្រពាំងសាលា សង្កាត់ពងទឹក ខណ្ឌដង្កោ។

យោងតាមសាក្សីនៅកន្លែងកើតហេតុបានឲ្យដឹងថា គេបានឃើញរថយន្តខាងលើបើកបរតាមបណ្ដោយផ្លូវលេខ ៣០ ម៉ែត្រ ក្នុងល្បឿនលឿនពីទិសខាងកើតឆ្ពោះទៅលិច លុះពេលទៅដល់ត្រង់ចំណុចកើតហេតុបានវាក់អើជាមួយម៉ូតូកង់បី ១ គ្រឿង ដែលកំពុងបើកបរក្នុងទិសដៅស្របគ្នា ខណៈនោះរថយន្តបង្កបានជាន់ហ្វ្រាំងបន្ថយល្បឿន ប៉ុន្តែជាន់អត់ស៊ី ក៏កាច់ចង្កូតគេចចេញទៅខាងឆ្វេង បុកនារីអ្នកជិះម៉ូតូម្នាក់ រួចបន្តទៅបុកកីឡាប្រដាល់ម្នាក់ទៀតជាកូនសិស្សលោកគ្រូ ពេជ្រ សុផាន់ កំពុងរត់ហាត់តាមផ្លូវ បណ្ដាលឲ្យជនរងគ្រោះ ២ នាក់ រងរបួសធ្ងន់។

ប្រភពដដែលបានឲ្យដឹងបន្តថា បន្ទាប់មករថយន្តបង្កបានជ្រុលទៅបុកបង្គោលភ្លើង ១ ដើម បាក់រលើងគល់ រួចបន្តបុកចូលកន្លែងលក់មាន់បង្វិលនៅជិតនោះទៀត បង្កការខូចខាតខ្ទេចខ្ទីទើបឈប់ ប៉ុន្តែសំណាងល្អពុំបណ្ដាលឲ្យអ្នកលក់មាន់បង្វិលរងរបួសឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពេលកើតហេតុអ្នកបើករថយន្តបង្កបានចុះរត់គេចខ្លួនបាត់ស្រមោល ហើយជនរងគ្រោះត្រូវបានបញ្ជូនទៅសង្គ្រោះបន្ទាន់។ ក្រោយមកកម្លាំងនគរបាលប៉ុស្តិ៍ចោមចៅទី ២ បានចុះទៅកាន់កន្លែងកើតហេតុសម្រួលចរាចរណ៍កុំឲ្យកកស្ទះ។ ចំណែករថយន្តបង្ក និងម៉ូតូរងគ្រោះ ត្រូវបាននគរបាលការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ នាំយកទៅរក្សាទុក រង់ចាំធ្វើការដោះស្រាយនៅពេលក្រោយ៕

អត្ថបទ ៖ សំណាង