ចិន ថា​ខ្លួន​រក​ឃើញ​ឧបករណ៍​ចារកម្ម​បរទេស​មាន​ទាំង​លើ​ផ្ទៃ​ទឹក និង​ក្រោម​សមុទ្រ

រដ្ឋាភិបាល​ក្រុង​ប៉េកាំង បាន​រក​ឃើញ​ឧបករណ៍ចារកម្មទាំងនៅលើផ្ទៃសមុទ្រ និង​នៅ​ក្នុង​សមុទ្រ រួមទាំង «បង្គោលភ្លើងហ្វារ» នៅក្រោមទឹក ដែលអាច​ផ្ដល់​សញ្ញា​​ឲ្យ​នាវាមុជទឹកបរទេស​ធ្វើ​ដំណើរ​ឆ្លង​កាត់។ នេះ​បើ​យោង​តាម​ការ​ប្រកាស​នៅ​លើ​គណនី​បណ្ដាញ​សង្គម WeChat របស់​​ក្រសួងសន្តិសុខរដ្ឋ​ចិន នៅ​ថ្ងៃ​ទី​២៩​ខែតុលា​​ឆ្នាំ​២០២៤។​

ក្រសួង​ចិន បាននិយាយថា ខ្លួនបានរកឃើញឧបករណ៍ដែលត្រូវបានលាក់នៅ​បាតសមុទ្រ ហើយកំពុងបញ្ជូនព័ត៌មាន​ដែលអាច «កំណត់​ទុក​ជា​មុន​នូវ​កន្លែងសម្រាប់ការប្រយុទ្ធ» ដោយ​បន្ថែម​ថា «កងកម្លាំងសន្តិសុខជាតិបានរឹបអូសឧបករណ៍បច្ចេកទេសពិសេសជាច្រើនប្រភេទ ដែលប្រើសម្រាប់ចារកម្មព័ត៌មាន និងទិន្នន័យ​ជើង​ទឹក ដែលលាក់នៅក្នុងសមុទ្រដ៏ធំធេង» តែ​មិនបានបញ្ជាក់ពីកន្លែងដែលឧបករណ៍ទាំងនោះត្រូវបានរកឃើញ​នោះ​ទេ។

ក្រសួង​សន្ដិសុខ​រដ្ឋ​ចិន បាន​បន្ត​ទៀត​ថា៖ «(ឧបករណ៍) ខ្លះដើរតួជា “ភ្នាក់ងារសម្ងាត់” កំពុង​រសាត់អណ្តែតតាមរលក ហើយ​កំពុង​តាមដានស្ថានភាពនៅក្នុងដែនទឹករបស់យើង​ភ្លាមៗ។ ខ្លះដើរតួជា “បង្គោលភ្លើងហ្វារ” នៅក្រោមទឹក ដែលបង្ហាញពីទិសដៅសម្រាប់នាវាមុជទឹកបរទេសដែលបានឈ្លានពានដែនទឹករបស់យើង»។

សូម​បញ្ជាក់​ថា កន្លង​មក​ចិន​បាន​ទាមទារអធិបតេយ្យ​លើសមុទ្រចិនខាងត្បូងស្ទើរតែទាំងអស់ រួមទាំងតំបន់ដែលទាមទារដោយព្រុយណេ ម៉ាឡេស៊ី ហ្វីលីពីន និងវៀតណាម។ បន្ថែម​ពី​នេះ ទីក្រុងប៉េកាំងក៏បាននិយាយផងដែរថា ខ្លួននឹងមិនបោះបង់ការប្រើប្រាស់កម្លាំងលើកោះតៃវ៉ាន់ ដែលបដិសេធការទាមទារអធិបតេយ្យរបស់ចិន​​នោះ​ឡើយ៕

ដោយ៖ ឈាង