សមត្ថកិច្ចចម្រុះខេត្តក្រចេះ ចុះរុះរើនិងបំផ្លាញ​ចោល​ឧបករណ៍នេសាទល្មើសច្បាប់

មន្ត្រីជំនាញជលផលក្រចេះ បានធ្វើការរុះរើនិងបំផ្លាញចោលនូវឧបករណ៍នេសាទល្មើសច្បាប់ និងចាក់លែងត្រីចម្រុះ​ទម្ងន់ប្រមាណ ២០០ គក្រ ចូលទៅក្នុងដែនទឹកធម្មជាតិវិញ​ នៅចំណុចបឹងវែង និងបឹងកាហាត ឃុំប្ញស្សីកែវ ស្រុកព្រែកប្រសព្វ កាលពីថ្ងៃទី០៦ ខែធ្នូ ឆ្នាំ២០២៤ ម្សិលម៉ិញនេះ។​

ក្នុងប្រតិបត្តិការណ៍ចុះបង្ក្រាបបទល្មើសនេសាទខាងលើ គឺដោយមានកិច្ចសហការគ្នារវាង ខណ្ឌរដ្ឋបាលជលផលក្រចេះ ជាមួយ គណៈបញ្ជាការឯកភាព រដ្ឋបាលស្រុកព្រែកប្រសព្វ កម្លាំងនគរបាលការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តក្រចេះ និងសហគមន៍នេសាទ ឫស្សីកែវ។

លោក ម៉ុក ពន្លក នាយខណ្ឌរដ្ឋបាលជលផលខេត្តក្រចេះបានអោយដឹងថា ជាលទ្ធផលសមត្ថកិច្ចចម្រុះ បានធ្វើការរុះរើនិងបំផ្លាញចោលនូវឧបករណ៍នេសាទល្មើសច្បាប់ រួមមាន៖ របាំងព្រួលស្បៃមុង ចំនួន ៣២ខ្សែ ប្រវែង ២២៤០ម៉ែត្រ, លូស្បៃមុងចំនួន ៣៥មាត់លូ, បង្គោលចម្រឹងប្ញស្សីចំនួន ៤៨០ដើម និងបានចាក់លែងត្រីចម្រុះទម្ងន់ប្រមាណ ២០០គីឡូក្រាម ចូលទៅក្នុងដែនទឹកធម្មជាតិវិញ​ ហើយបានសម្រេចដុតបំផ្លាញចោលនូវឧបករណ៍ល្មើសច្បាប់ទាំងនោះនៅចំណុចទីតាំងមកផ្ទាល់តែម្តង៕

អត្ថបទ៖ ប្រុញ វិធិន