ព័ត៌មានអន្ដរជាតិ

ក្រុមហ៊ុនផលិតឡាន Honda និង Nissan ប្រកាសជាផ្លូវការ នូវការចរចាច្របាច់បញ្ជូលគ្នា

បានផុស

១ year មុន

នៅ

ថ្ងៃចន្ទ ២៣ ធ្នូ ២០២៤

ដោយ

ក្រុមហ៊ុនផលិតរថយន្តជប៉ុន Honda និង Nissan បានប្រកាសជាផ្លូវការនាថ្ងៃចន្ទនេះ អំពីកិច្ចពិភាក្សាស្ដីពីការច្របាច់បញ្ជូលគ្នា ដែលអាចឱ្យពួកគេក្លាយជាក្រុមហ៊ុនផលិតរថយន្តធំបំផុតទី៣លើពិភពលោក ចំពេលមានការប្រកួតប្រជែងដណ្ដើមចំណែកទីផ្សារកាន់តែខ្លាំង។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនទាំង២ បាននិយាយក្នុងសេចក្តីថ្លែងការណ៍រួមថា ក្រោមលទ្ធភាពនៃការរួមបញ្ចូលគ្នា ក្រុមហ៊ុនទាំង ២ ចង់ឱ្យការលក់រួមគ្នាឈានដល់ ៣០ ទ្រីលានយ៉េន (១៩១ ប៊ីលានដុល្លារ) និងប្រាក់ចំណេញប្រតិបត្តិការលើសពី ៣ ទ្រីលានយ៉េន។

ក្រុមហ៊ុនគ្រោងបញ្ចប់ការពិភាក្សាជុំវិញខែមិថុនា ឆ្នាំ ២០២៥ ហើយបន្ទាប់មកបង្កើតក្រុមហ៊ុនមេនៅខែសីហា ឆ្នាំ ២០២៦ ដែលនៅពេលនោះ ភាគហ៊ុនរបស់ក្រុមហ៊ុនទាំង២នឹងត្រូវបានលុបចេញបញ្ជីផ្សារភាគហ៊ុន។

ការច្របាច់បញ្ជូលគ្នានេះ នឹងបង្កើតក្រុមរថយន្តមួយដែលមានការលក់រថយន្តធំជាងគេបំផុតទី៣របស់ពិភពលោកបន្ទាប់ពីក្រុមហ៊ុនជប៉ុន Toyota និងក្រុមហ៊ុនអាល្លឺម៉ង់ Volkswagen ខណៈក្រុមហ៊ុនផលិតរថយន្តចាស់ៗជុំវិញសកលលោក ប្រឈមមុខនឹងការប្រកួតប្រជែងកាន់តែខ្លាំងឡើងពីក្រុមហ៊ុនផលិតរថយន្តអគ្គិសនីអាមេរិក Tesla និងក្រុមហ៊ុនគូប្រជែងមកពីប្រទេសចិនផ្សេងៗទៀត។

គួរគូសបញ្ជាក់ថា Honda គឺជាក្រុមហ៊ុនផលិតរថយន្តធំទី២របស់ជប៉ុនបន្ទាប់ពី Toyota និងមានដើមទុនទីផ្សារជាង ៤០ ប៊ីលានដុល្លារ ខណៈ Nissan ជាប់ចំណាត់ថ្នាក់លេខ ៣ ជាមួយនឹងតម្លៃមូលធនទីផ្សារប្រមាណ ១០ ប៊ីលានដុល្លារ។ ក្រុមហ៊ុនទាំង២ កន្លងមកបានប្រកាសផងដែរពីការសហការគ្នា ជាពិសេសលើវិស័យរថយន្តអគ្គិសនី៕