Honda គ្រោងបន្ថយផលិតកម្មរថយន្តអគ្គិសនី ហើយផ្ដោតលើរថយន្តកូនកាត់

ក្រុមហ៊ុនផលិតរថយន្ត​ជប៉ុន  Honda Motor បាន​និយាយនៅថ្ងៃពុធនេះថា ខ្លួននឹងកាត់បន្ថយការវិនិយោគលើផលិតកម្មរថយន្តអគ្គិសនីដោយសារតែកម្សោយតម្រូវការ ហើយងាកទៅផ្ដោតលើផលិតកម្មរថយន្តកូនកាត់ (ស៊ីសាំង និងសាកថ្ម) ម៉ូឌែលថ្មី ឱ្យស៊ីទៅនឹងកំណើនតម្រូវការ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

នាយកប្រតិបត្តិក្រុមហ៊ុន Honda លោក Toshihiro Mibe បានប្រាប់សន្និសីទសារព័ត៌មានថា ក្រុមហ៊ុន​បានទម្លាក់គម្រោងវិនិយោគ​​សម្រាប់វិស័យរថយន្តអគ្គិសនី និងសូហ្វវែររហូតដល់​ឆ្នាំ ២០៣០ មកត្រឹម ៧ ​ត្រីលានយ៉េន (៤៨,៤ ប៊ីលានដុល្លារ) ពី ១០ ទ្រីលានយ៉េន ​ក្នុងគម្រោងចាស់។

លោក Mibe បាននិយាយថា៖ «ដោយផ្អែកលើការធ្លាក់ចុះនៃទីផ្សារបច្ចុប្បន្ន យើងរំពឹងថា ការលក់រថយន្តអគ្គិសនីនៅឆ្នាំ ២០៣០» នឹងធ្លាក់ចុះត្រឹម ២០ ភាគរយ ពោលគឺក្រោម ៣០ ភាគរយ ​នៃគោលដៅ​របស់ក្រុមហ៊ុន។ ​

ជាមួយ​គ្នា​នោះ ក្រុមហ៊ុន Honda បាន​រំពឹងថា ​ការលក់រថយន្តកូនកាត់ នឹងអាចកើនដល់ ២,២​ – ២,៣ លានគ្រឿងនៅត្រឹមឆ្នាំ ២០៣០​។ បើតាមរ៉យទ័រ Honda គ្រោងនឹងបញ្ចេញ​រថយន្តកូនកាត់ជំនាន់ក្រោយចំនួន ១៣ ម៉ូឌែលនៅទូទាំងពិភពលោក ក្នុងរយៈពេល ៤ ឆ្នាំ ចាប់ពីឆ្នាំ ២០២៧។ ​

គេមើលឃើញថា ព័ត៌មាន​ចុងក្រោយ​នេះ​ ចេញផ្សាយឡើងក្រោយពេល​ក្រុមហ៊ុន Honda រងការប្រកួតប្រជែងកាន់តែខ្លាំងនៅលើទីផ្សារអន្តរជាតិ ដែលកំពុងងាក​រករថយន្តកូនកាន់ និងរថយន្តអគ្គិសនី។

កាលពីដើមខែនេះ ក្រុមហ៊ុន Honda បានប្រកាស​ផ្អាករយៈពេលប្រហែល ២ ឆ្នាំ នូវផែនការបង្កើតរោងចក្រផលិតរថយន្តអគ្គិសនី​តម្លៃ ១០,៧ ប៊ីលាន​ដុល្លារ ​នៅខេត្ត Ontario នៃ​ប្រទេសកាណាដា ដោយ​សារ​តែ​ការថយចុះនៃតម្រូវការរថយន្តអគ្គិសនី៕