គិតត្រឹមថ្ងៃទី១៦មីនាសមត្ថកិច្ចបានឃាត់ខ្លួនពលករខ្មែររត់គេចពីការធ្វើចត្តាឡីស័កជាង៤០០០នាក់

ចាប់ពីថ្ងៃទី១៣រហូតដល់ថ្ងៃទី១៧ខែមីនាឆ្នាំ២០២១នេះ សមត្ថកិច្ចបានធ្វើការឃាត់ខ្លួនពលករខ្មែរដែលគេចវេសពីការធ្វើចត្តាឡីស័កបានជាង៤០០០នាក់ និងបានបញ្ជួនទៅធ្វើចត្តាឡីស័កវិញនៅទូទាំងប្រទេស។ នេះបើតាមការឱ្យដឹងពីលោក ឧត្តមសេនីយ៍ឯក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការដ្ឋាននគរបាល នៅព្រឹកថ្ងៃទី១៧ មីនា ឆ្នាំ២០២១។

លោក ឧត្តមសេនីយ៍ឯក បានបន្តថា ក្នុងចំណោមពលករគេចវេសពីការធ្វើចត្តាឡីស័កជាង៤០០០នាក់ ភាគច្រើនជាបុរសដោយមួយចំនួនត្រូវអាជ្ញាធរធ្វើការឃាត់ខ្លួននៅតាមព្រំដែនពេលពួកគេលួចឆ្លងដែនខុសច្បាប់ និងមួយចំនួនទៀតឃាត់ខ្លួននៅតាមភូមិកំណើតរបស់ពួកគេហើយបានបញ្ជួនទៅធ្វើចត្តាឡីស័កនៅតាមមណ្ឌលធ្វើចត្តាឡីស័ករយៈពេល១៤ វិញ។

លោក ឧត្តមសេនីយ៍ឯក បានអំពាវនាវដល់ពលករដែលកំពុងធ្វើការនិងស្នាក់នៅក្រៅប្រទេសសូមកុំទាន់វិញត្រឡប់មកស្រុកវិញនៅដំណាក់កាលនេះអី សូមបន្តស្នាក់នៅនិងធ្វើការនៅស្រុកគេសិនទៅ ព្រោះថាបើបងប្អូនត្រឡប់មកវិញក៏ត្រូវធ្វើចត្តាឡីស័ករយៈពេល១៤ថ្ងៃដែរ ហើយអាចនាំជំងឺកូវីដ១៩មកចម្លងក្នុងស្រុកទៀតផង។

លោក ឧត្តមសេនីយ៍ឯក បានអំពាវនាវទៀតថា ចំណែកពលករដែលបានចូលមកដល់ស្រុកវិញហើយត្រូវអនុវត្តទៅតាមការណែនាំរបស់ក្រសួងសុខាភិបាលមិនត្រូវធ្វើការរត់គេចវេះពីការធ្វើចត្តាឡីស័កនោះទេ ដើម្បីចៀសវាងទទួលនូវការផាកពិន័យ ឬទោសទណ្ឌតាមផ្លូវច្បាប់ពិសេសអាចចម្លងមេរោគកូវីដ១៩ទៅក្រុមគ្រួសារនិងសហគមន៍ជុំវិញខ្លួនដែលធ្វើឲ្យប៉ះពាល់យ៉ាងធ្ងន់ធ្ងរដល់សង្គមជាតិនិងធ្វើឲ្យមានវិប្បដិសារីទៅថ្ងៃក្រោយ។

លោក ឧត្តមសេនីយ៍ឯក បានបញ្ជាក់ថា«ខ្ញុំសូមអង្វរករហើយអង្វរករទៀតដល់បងប្អូនពលករយើងដែលនៅក្រៅប្រទេសសូមកុំទាន់វិលត្រឡប់មកវិញអីសូមបន្តស្នាក់នៅឬធ្វើការនៅទីនោះសិនទៅ។ចំណែកពលករដែលវិលត្រឡប់មកដល់កម្ពុជាហើយគួរតែគោរពនិងអនុវត្តទៅតាមវិធានការណែនាំរបស់រាជរដ្ឋាភិបាលទាំងអស់គ្នាដើម្បីការពារអាយុជីវិតប្រជាពលរដ្ឋឲ្យចៀសផុតពីជំងឺកូវីដ១៩ដែលជាជំងឺដ៏កាចសាហាវនេះ»។

គួរបញ្ជាក់ថា ច្បាប់ថ្មីស្តីពីវិធានការទប់ស្កាត់ការឆ្លងរាលដាលនៃជំងឺកូវីដ១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ទើបប្រកាសដាក់ឲ្យប្រើប្រាស់ថ្មីៗនេះបានឲ្យដឹងថាបើបុគ្គលណាអ្នកគេចវេះពីការធ្វើចត្តាឡីស័ក ឬគេចចេញពីទីកន្លែងចត្តាឡីស័ក ត្រូវផ្តន្ទាទោសត្រូវដាក់ពន្ធនាគារពី៦ខែទៅ៣ឆ្នាំ និងពិន័យជាប្រាក់ពី ២លានរៀលទៅ១០លានរៀល កាលបើអំពើខាងលើនេះបណ្តាលឱ្យមានការចម្លងជំងឺកូវីដ-១៩ដល់អ្នកដទៃ៕

អត្ថបទ៖ សំអឿន