សម្តេចតេជោ ទម្លាយថា មានគេចង់ធ្វើឃាតសម្តេចដោយវាយប្រហារតាមរយៈដ្រូន(Drone)

អតីតនាយករដ្ឋមន្រ្តីសម្តេចតេជោ ហ៊ុន សែន និងបច្ចុប្បន្នជាប្រធានព្រឹទ្ធសភា បានទម្លាយឱ្យដឹងថា មានគេរៀបចំគម្រោងធ្វើឃាតសម្តេចដោយប្រើយន្តហោះដ្រូន (Drone) វាយប្រហារនៅគេហដ្ឋាននាក្រុងតាខ្មៅ។ សម្តេចបានចាត់ទុកការប៉ុនប៉ងនេះថា ជាអំពើភេរវកម្មនៅកម្ពុជា និងព្រមានកម្ចាត់ក្រុមនេះឱ្យអស់។

អញ្ជើញជាអធិបតីភាពដ៏ខ្ពង់ខ្ពស់ក្នុងពិធីសម្ពោធអគារសិក្សា និងសមិទ្ធផលនានាបរិវេណវត្តព្រះឥន្ទសាមគ្គីធម៌ នៅស្រុកអង្គស្នួល ខេត្តកណ្តាល នាព្រឹកថ្ងៃទី ១១ ខែកុម្ភៈនេះ សម្តេចតេជោ ហ៊ុន សែន បានបញ្ជាក់ថា ប៉ុន្មានសប្តាហ៍មុននេះ មានគេចង់ធ្វើឃាតសម្តេចនៅឯផ្ទះក្រុងតាខ្មៅ នាខេត្តកណ្តាល។

សម្តេចបញ្ជាក់ថា៖«អ្នកឯងចង់បំផ្លាញត្រូកូល ហ៊ុន សូមផ្តាំផ្ញើផង ផែនការវៃដ្រូន Drone ចូលតាខ្មៅ អ្នកត្រូចាំ ហើយបាត់ខ្លួនពីតាកែវមួយ គឺគាំទ្រវៃ ដ្រូនចូលតាខ្មៅ។ អ្នកកុំចង់ប្រហារជីវិតរបស់ខ្ញុំ ចង់សម្លាប់ខ្ញុំ។ នេះជាអំពើភេរវកម្ម ខ្ញុំគ្រាន់តែបញ្ជាក់ ក្នុងប៉ុន្មានអាទិត្យនេះ ផែនការវៃដ្រូនចូលផ្ទះខ្ញុំ។ ហេតុអីបានជាគេចង់សម្លាប់ករុណាខ្ញុំ» ។

ជាមយគ្នានេះ សម្តេច ហ៊ុន សែន ស្នើឱ្យជនបរទេសទាំងឡាយប្រយ័ត្នប្រយែង ចៀសវាងទៅលើការគាំទ្រទាំងឡាយ នៃសកម្មភាពភេរវកម្ម។ សម្តេចមានប្រសាសន៍ធ្ងន់ៗថា៖«សូមបរទេសកុំលូកលាន់ទៅលើកិច្ចការផ្ទៃក្នុងរបស់កម្ពុជា។ ព្រោះកម្ពុជាត្រូវតែគ្រប់គ្រងសន្តិសុខ»។ យ៉ាងណាមិញ សម្តេចតេជោ មិនបានបង្ហាញអត្តសញ្ញាណ ឬក្រុមណា ដែលមានបំណងធ្វើសកម្មភាពនោះទេ៕