តួតៃវ៉ាន់ Darren Wang ​ត្រូវចាប់​ខ្លួន​​ ដោយសារតែ​គេច​ចេញ​ពី​យោធា

ប្រព័ន្ធផ្សព្វផ្សាយតៃវ៉ាន់បានរាយការណ៍នៅថ្ងៃទី១៨នេះថា តារាសម្តែង Wang Talu ឬ Darren Wang ត្រូវគេចាប់ខ្លួនដោយសង្ស័យថា រូបលោកបានគេចចេញពីការបម្រើយោធា ហើយបច្ចុប្បន្នកំពុងស្ថិតនៅក្រោមការស៊ើបអង្កេតពីក្រុមអ្នកជំនាញ។

ចំពោះព័ត៌មានលម្អិត និងកាលៈទេសៈជុំវិញករណីមួយនេះ កំពុងត្រូវបានពិនិត្យនៅឡើយ ហើយអាជ្ញាធរអាចនឹងបញ្ជូនតារាសម្ដែងប្រុសទៅកាន់ការិយាល័យព្រះរាជអាជ្ញាទីក្រុងតៃប៉ិថ្មីនៅពេលក្រោយទៀត។

ទោះជាយ៉ាងណា ជាការឆ្លើយតបទៅនឹងការចោទប្រកាន់នេះ តំណាងរបស់តារាសម្ដែងតៃវ៉ាន់បាននិយាយថា ការបម្រើយោធាគឺជាផ្នែកមួយដ៏សំខាន់នៃការលូតលាស់របស់យុវជន ហើយបានសង្កត់ធ្ងន់ថា តារាសម្តែងធ្លាប់បានចូលរៀននៅសាលាយោធានាពេលកន្លងមក។

អ្នកតំណាងក៏បានធានាដល់សាធារណជនថា អាជីពសម្ដែងរបស់ Wang Talu នៅតែជាអាទិភាពរបស់គាត់ ហើយថាក្រុមហ៊ុនគ្រប់គ្រងរបស់គាត់ បាននិងកំពុងធ្វើការដើម្បីសម្របសម្រួលគ្រប់យ៉ាងដោយរលូន។

គួរបញ្ចាក់ដែរថា Wang Talu ដែលត្រូវបានគេស្គាល់ថាជាតួឯកក្នុងរឿង «My Girlhood» គឺជាតួអង្គលេចធ្លោម្នាក់នៅក្នុងឧស្សាហកម្មកម្សាន្តតៃវ៉ាន់។ ជាពិសេសទស្សនិកជនកម្ពុជាស្គាល់លោកច្បាស់តាមរយៈរឿងភាគនិងភាពយន្តដុំជាច្រើនដូចជា «No More Bets» និង «Our Times»ជាដើម៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖អតីតស្វាមី ប្រឈមមុខនឹងបំណុល ១៣៧លានដុល្លារ ក្រោយសាន់ឆាយទទួលមរណភាព