គណៈប្រតិភូអាមេរិក-អ៊ុយក្រែន ជួបពិភាក្សាគ្នាជាថ្មី នៅ អារ៉ាប៊ីសាអូឌីត

កាលពីថ្ងៃអាទិត្យទី២៣ខែមីនាឆ្នាំ២០២៥ គណៈប្រតិភូអាមេរិកនិងអ៊ុយក្រែន បានជួបពិភាក្សាគ្នាជាថ្មីនៅប្រទេសអារ៉ាប៊ីសាអូឌីត ដោយផ្តោតសំខាន់លើបទឈប់បាញ់ក្នុងសង្គ្រាមអូសបន្លាយពេល៣ឆ្នាំ ដូចជំនួបលើកមុនដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, ការពិភាក្សានេះគឺជាកិច្ចខិតខំប្រឹងប្រែងផ្នែកការទូត ដឹកនាំដោយរដ្ឋបាលលោកត្រាំ ក្នុងការធានាបទឈប់បាញ់ដ៏ធំមួយឲ្យបានត្រឹមថ្ងៃទី២០ខែមេសា។

ទន្ទឹមនោះ បេសកជនពិសេសរបស់សហរដ្ឋអាមេរិកលោក Steve Witkoff បានសម្តែងសុទិដ្ឋិនិយមអំពីការសម្រេចបាននូវបទឈប់បាញ់នៅសមុទ្រខ្មៅ និងការបញ្ឈប់អរិភាពកាន់តែទូលំទូលាយ។

ពាក់ព័ន្ធការចរចានេះដែរ រដ្ឋមន្ត្រីការពារជាតិអ៊ុយក្រែនលោក Rustem Umerov បានសរសេរនៅលើ បណ្តាញសង្គម X កាលពីថ្ងៃអាទិត្យថា «កិច្ចពិភាក្សាទទួលបានលទ្ធផលល្អនិងផ្តោតលើចំណុចសំខាន់ៗច្រើន រួមទាំងបញ្ហាថាមពលផងដែរ។ មេដឹកនាំអ៊ុយក្រែន លោក វ៉ូឡូឌីមៀរ ហ្សេលេនស្គី ប្តេជ្ញាចិត្តក្នុងការសម្រេចបានសន្តិភាពប្រកបដោយយុត្តិធម៌និងយូរអង្វែង»។

កិច្ចពិភាក្សានេះ កើតឡើងខណៈអំពើហិង្សានៅតែបន្ត ពោលកាលពីថ្ងៃទី២២ខែមីនា ការវាយប្រហារដោយដ្រូនរុស្ស៊ី បានកំណត់គោលដៅក្នុងតំបន់ជាច្រើនរបស់អ៊ុយក្រែន រួមទាំងទីក្រុង កៀវ ផងដែរ ដែលបណ្តាលឲ្យមានមនុស្សស្លាប់៧នាក់ ក្នុងនោះមានទាំងក្មេងស្រីអាយុ៥ឆ្នាំម្នាក់ផងដែរ។

ការវាយប្រហារនៅតែកើតឡើងក្នុងទ្រង់ទ្រាយធំ ទោះភាគីជម្លោះទាំងសងខាង ឯកភាពលើបទឈប់បាញ់ដែលសម្របសម្រួលដោយលោក ត្រាំ ក៏ដោយ។

ជាក់ស្តែង កាលពីសប្តាហ៍មុន អ៊ុយក្រែនបានបើកការវាយប្រហារលើស្ថានីយវាស់ស្ទង់ឧស្ម័នរបស់រុស្ស៊ី ដោយបង្កការខូចខាតធំដុំ ហើយរុស្ស៊ីបានចោទអ៊ុយក្រែន ថាជាអ្នកបំពានបទឈប់បាញ់ និងថែមទាំងព្រមានថា ខ្លួនសូមរក្សាសិទ្ធិក្នុងការសងសឹក៕

អត្ថបទ៖ សុខ សុវណ្ណ

ចុចអាន៖ ត្រាំ៖ រុស្ស៊ី-អ៊ុយក្រែន កំពុងចរចាចែកដីគ្នា