មា្តយ ជូ ស៊ីនទិ មានមោទកភាព​ចំពោះកូន ដ្បិតកំព្រាឪពុកតាំង​ពីតូច

ម្តាយរបស់កីឡាករ​​វ័យ​ក្មេង ជូ ស៊ីនទិ អ្នកស្រី ស៊ីន ណាវី បានបង្ហាញមោទកភាពលើកូនប្រុសខ្លួន ដែលមិន​ធ្វើឱ្យអ្នកម្តាយ​ពិបាកចិត្តទាល់តែសោះ ដ្បិតរូប​គេបានកំព្រាឪពុកតាំងពីក្មេងក៏ដោយ។

ខ្សែបម្រើ ជូ ស៊ីនទិ ដែលបច្ចុប្បន្នមានវ័យ ២២ ឆ្នាំ កំពុងក្លាយជាកម្លាំងចលករដ៏សំខាន់របស់ក្រុម ព្រះខ័នរាជស្វាយរៀង។ រូបគេបានក្លាយជាចំណែកដ៏សំខាន់មួយរបស់ក្រុមតាំងពីរដូវកាលមុន មកដល់រដូវកាលនេះ ខណៈកត្តាដែល​ជួយឱ្យក្រុមព្រះខ័នរាជស្វាយសាងប្រវត្តិសាស្ត្រឡើងទៅវគ្គផ្តាច់ព្រ័ត្រពាន AFC Challenge League ក៏មានចំណែករបស់គេផងដែរ។

ថ្លែងប្រាប់សារព័ត៌មាន «កម្ពុជាថ្មី» ម្តាយរបស់កីឡាករអតីតយុវជនថ្នាលសាលាបាល់ទាត់ជាតិ បាទី រូបនេះ បានទម្លាយថា អ្នកស្រីពិតជាសប្បាយចិត្ត និងមានមោទកភាពលើកូនប្រុសខ្លួនខ្លាំងណាស់ ដែលរូបគេមិន​ធ្លាប់​ធ្វើឱ្យអ្នកស្រីពិបាកចិត្តទាល់តែសោះតាំងពីក្មេងមក។

អ្នកស្រី ស៊ីន ណាវី បានបន្តទៀតថា ជូ ស៊ីនទិ បានកំព្រាឪពុកតាំងពី​អាយុបួន ប្រាំ ឆ្នាំមកម្ល៉េះ ប៉ុន្តែរូបគេមិនដែលដើរខុសផ្លូវនោះទេ ដោយគេជាក្មេងល្អម្នាក់។ អ្នកស្រី​សប្បាយចិត្តខ្លាំងណាស់ បន្ទាប់ពីកូនប្រុសខ្លួនទទួលបានឱកាសចូលហ្វឹកហាត់នៅសាលាបាល់ទាត់ជាតិ បាទី ហើយតែងតែទទួលបានការណែនាំល្អៗពីថ្នាក់ដឹកនាំ និងគ្រូបង្វឹកនៅទីនោះ រហូតមកដល់ ក្លិប​ព្រះខ័នរាជស្វាយរៀង ក៏រូបគេនៅទទួលបានការយកចិត្តទុកដាក់ពីថ្នាក់ដឹកនាំថែមទៀត។

អ្នក​ស្រី​បាន​សង្កត់​ធ្ងន់​ថា ៖«សូម​អរគុណ​ដល់​លោក​គ្រូៗ​ទាំង​​អស់ខ្លាំងណាស់ ​និង​អ្នកជុំវិញកូន។ ​ខ្ញុំស្រឡាញ់​កូន​ខ្ញុំ​ និ​ង​បាន​ជួយ​នាំកូន​របស់​ខ្ញុំ​ឲ្យ​ដើរ​ផ្លូវ​ល្អ​​ ក្លាយ​ជាមនុស្សល្អ»៕

អត្ថបទ៖ សេម កុសល