ភ្នែក​លឿង គឺជាសញ្ញាព្រមានសុខភាព ពុំគួរមើលរំលងឡើយ

ភ្នែក​លឿង​ជា​អ្វី​ដែល​មិន​គួរ​មើល​រំលង។ ព្រោះវាអាចជាសញ្ញានៃជំងឺថ្លើម ឬភាពមិនប្រក្រតីនៃរាងកាយ។ ការដឹងពីមូលហេតុ និងជ្រើសរើសអាហារត្រឹមត្រូវអាចជួយការពារ និងបន្ថយរោគសញ្ញា។

តើអ្វីបណ្តាលឲ្យភ្នែកលឿង?

ភ្នែកលឿងអាចបណ្តាលមកពីការកើនឡើងនៃ bilirubin នៅក្នុងឈាម ដែលអាចបណ្តាលមកពីមុខងារថ្លើមមិនប្រក្រតី ដូចជាជំងឺរលាកថ្លើម ក្រិនថ្លើម ឬការស្ទះបំពង់ទឹកប្រមាត់ ឬស្ថានភាពដែលកោសិកាឈាមក្រហមបំបែកច្រើនជាងធម្មតា។ លើសពីនេះ ជំងឺមួយចំនួនដូចជា ជំងឺរលាកថ្លើម ការឆ្លងមេរោគ ឬការប្រើប្រាស់ថ្នាំមួយចំនួនក៏អាចបណ្តាលឲ្យភ្នែកលឿងផងដែរ។

ភ្នែកលឿង ខ្វះវីតាមីនអី?

ភ្នែកលឿងអាចទាក់ទងនឹងកង្វះវីតាមីនមួយចំនួន។ ជាពិសេស វីតាមីន B12 ដែលដើរតួនាទីយ៉ាងសំខាន់ក្នុងការផលិតកោសិកាឈាមក្រហម និងដំណើរការនៃប្រព័ន្ធសរសៃប្រសាទ។ ប្រសិនបើរាងកាយខ្វះវីតាមីន B12 វាអាចបណ្តាលឲ្យមានការបង្កើតកោសិកាឈាមក្រហមមិនធម្មតា និងនាំទៅដល់ការប្រមូលផ្តុំនៃសារធាតុ bilirubin នៅក្នុងឈាមដែលបណ្តាលឲ្យភ្នែកលឿង។ លើសពីនេះទៀត កង្វះជាតិ folate (វីតាមីន B9) អាចមានឥទ្ធិពលស្រដៀងគ្នានេះដែរ។

ប្រសិនបើអ្នកមានជំងឺភ្នែកលឿង តើគួរញ៉ាំអ្វីដើម្បីកាត់បន្ថយ

ការជ្រើសរើសអាហារត្រឹមត្រូវអាចជួយបំប៉នថ្លើមរបស់អ្នក និងកាត់បន្ថយភ្នែកលឿងដូចជា៖

-បន្លែស្លឹកបៃតងដូចជា ប្រូខូលី និងខាត់ណាជួយបង្កើនការបន្សាបជាតិពុល។

-ផ្លែឈើពណ៌ទឹកក្រូច និងលឿង ដូចជាការ៉ុត និងល្ពៅមានសារធាតុ Beta-carotene ដែលជួយការពារកោសិកាថ្លើម។

-រមៀតមានសារធាតុ Curcumin ដែលជួយកាត់បន្ថយការរលាកថ្លើម។

-ត្រីដែលមានអាស៊ីតខ្លាញ់អូមេហ្គា ៣ ដូចជាត្រីសាម៉ុង និងត្រីម៉ាខេរ៉េល ជួយកែលម្អមុខងារថ្លើម។

-ផឹកទឹកឥ្យបានគ្រប់គ្រាន់ ដើម្បីជួយបណ្តេញជាតិពុលចេញពីរាងកាយរបស់អ្នក។

អាហារ​ដែល​គួរ​ចៀសវាង​ប្រសិនបើ​អ្នកមាន​ភ្នែក​លឿង​

ចៀសវាងអាហារដែលដាក់សម្ពាធបន្ថែមលើថ្លើមរបស់អ្នក ដូចជាអាហារចៀន អាហារមានជាតិខ្លាញ់ខ្ពស់ គ្រឿងស្រវឹង និងអាហារកែច្នៃ។ ព្រោះវាអាចបង្កើនហានិភ័យនៃជំងឺថ្លើម និងធ្វើឲ្យភ្នែកលឿងកាន់តែធ្ងន់ធ្ងរ។

ថែរក្សាខ្លួនអ្នកនៅពេលអ្នកមានភ្នែកលឿង

ប្រសិនបើអ្នកមានភ្នែកលឿង អ្នកគួរតែសម្រាកឲ្យបានគ្រប់គ្រាន់។ ចៀសវាងអាហារ និងអាកប្បកិរិយាដែលធ្វើឲ្យអ្នកប្រឈមនឹងជំងឺថ្លើម។ ពិនិត្យសុខភាពជាប្រចាំ ហើយអ្នកគួរតែទៅជួបគ្រូពេទ្យ ដើម្បីរកមូលហេតុ និងទទួលការព្យាបាលសមស្រប៕

អត្ថបទ៖ សាង ស្រីល័ក្ខ

ចុចអាន៖មូលហេតុដែលនាំឲ្យមនុស្សវ័យក្មេងកាន់តែច្រើនឡើង មានជំងឺទឹកនោមផ្អែម?