ក្រុមហ៊ុនវៀតណាមមួយ នៅស្រុកស្នួល ត្រូវការពលករប្រមាណ ៣ ពាន់ នាក់បន្ថែម

លោក លៃ លីន តំណាងក្រុមហ៊ុន THACO AGRI បាន​ឲ្យ​ដឹង​ថា បច្ចុប្បន្ន ខាងក្រុមហ៊ុន THACO AGRI កំពុង​ត្រូវ​ការ​កម្លាំងពលកម្មជាច្រើន​ពាន់​នាក់បន្ថែមទៀត ខណៈ​ដែល​ក្រុមហ៊ុនមានកម្លាំងកម្មករស្រាប់ ប្រមាណជា ៧​ពាន់​នាក់ ហើយត្រូវការជ្រើសរើសពលករ​ប្រមាណជា ៣ ពាន់ នាក់បន្ថែមទៀត ដើម្បីបំពេញតាម​តម្រូវ​ការ​ក្រុមហ៊ុន​។

បើ​តាម ​លោក លៃ លីន បាន​ឲ្យ​ដឹង​ថា ក្រុមហ៊ុន THACO AGRI មានទីតាំងនៅភូមិស្រែថ្មី ឃុំឃ្សឹម ស្រុកស្នួល ខេត្តក្រចេះ ដោយ​បច្ចុប្បន្ន​ក្រុមហ៊ុន THACO AGRI បានវិនិយោគទុនលើផ្ទៃដីកសិកម្មទំហំ ប្រមាណជាង ១ម៉ឺន​ហិកតា និងវិនិយោគ​លើវិស័យកសិកម្ម មានដូចជា ការដាំចេក ចិញ្ចឹមគោ មាន់ ត្រី ជ្រូក ដាំទុរេន និងផ្ទះត្រចៀកកាំ ជាដើម ដែល​បាននឹងកំពុងដំណើរការសព្វថ្ងៃនេះ ។

«តាមរយៈកិច្ចសហការ​ជា​មួយមន្ទីរការងារ​បណ្តុះបណ្តាលវិជ្ជាជីវៈខេត្ត ក៏ដូចជា នៅវិទ្យាស្ថាន​ពហុបច្ចេកទេស​ភូមិភាគ​តេជោសែន​ឦសាន ខេត្តក្រចេះ ក្រុមហ៊ុន THACO AGRI បាន​ផ្តល់​ការងារ​ដល់​ប្អូន​ៗរៀនចេះ​ជាប់​ជំនាញ​វិជ្ជាជីវៈ ប្រមាណជាង ២០ នាក់មកហើយ មកដល់ពេលនេះ អ្នកកំពុងហាត់ការ ក៏មានដូចគ្នា។» លោក លៃ លីន បន្ថែម​បែប​នេះ​។

លោកបានបញ្ជាក់ថា ក្រុមហ៊ុន THACO AGRI ចាំទទួល​យក​យុវជន​ដែលរៀនជំនាញចំណេះវិជ្ជាជីវៈ​ជាប់ និង​ទើប​ចុះ​ហាត់ការ ទោះ​ជា​ប៉ុន្មាន​នាក់​ក៏ដោយ ជាពិសេសជំនាញ ពេទ្យសត្វ មេកានិច និងជាងផ្សារដែក គឺ​ក្រុមហ៊ុន​ចាំ​ទទួល​ជា​និច្ច បាន​កាន់តែច្រើនកាន់តែល្អ។

គួរ​បញ្ជាក់​ថា ក្រុមហ៊ុន THACO AGRI ជាក្រុមហ៊ុនរបស់​វៀតណាម ទទួល​បានដីសម្រាប់វិនិយោគ ជាង ១ម៉ឺន ហិកតា។ ក្នុងនោះ​ ដំណាំចេក មាន​ផ្ទៃ​ចំនួន ៤៨០០ ហិកតា។ ជារៀងរាល់ឆ្នាំ ចេក ជាង ១០ម៉ឺន តោន ត្រូវបាន​នាំចេញ​ជា​រៀងរាល់ឆ្នាំ ត្រូវបាននាំចេញទៅទីផ្សារចិន និងជប៉ុន។

«THACO AGRI» កំពុងវិនិយោគលើការអភិវឌ្ឍន៍កសិកម្មទ្រង់ទ្រាយធំ នៃតំបន់ពហុកសិកម្មស្នួល នៅ​ក្នុង​ខេត្ត​ក្រចេះ តាមរយៈក្រុមហ៊ុនចំនួន ៣ ៕

អត្ថបទ៖ ប្រុញ វិធិន