អង់គ្លេសប្រកាស​ទិញយន្តហោះចម្បាំង F-35 ដែលអាចផ្ទុកគ្រាប់​បែក​នុយក្លេអ៊ែរពី​អាមេរិក

ចក្រភពអង់គ្លេស នឹងទិញយន្តហោះចម្បាំង F-35A ចំនួន១២គ្រឿង ដែលមានសមត្ថភាពផ្ទុកគ្រាប់បែកនុយក្លេអ៊ែរ B-61 ដើម្បីពង្រឹងសមត្ថភាពរារាំងរបស់ខ្លួននៅក្នុង «យុគសម័យនៃអស្ថិរភាព»។ នេះ​បើយោង​តាម​ការ​​​ប្រកាស​របស់​នាយករដ្ឋមន្ត្រី Keir Starmer កាល​ពី​ថ្ងៃ​ទី​២៤​ខែ​មិថុនា​ឆ្នាំ​២០២៥។

ការផ្លាស់ប្តូរនេះ នឹងផ្តល់​ឲ្យ​កង​កម្លាំង​អង់គ្លេស​នូវលទ្ធភាពប្រើប្រាស់អាវុធនុយក្លេអ៊ែរជាលើកដំបូង ក្នុងរយៈពេលជាច្រើនទសវត្សរ៍​កន្លង​មក។ លើកចុងក្រោយដែលយោធាអង់គ្លេសត្រូវបានបំពាក់ដោយ​គ្រាប់បែក​នុយក្លេអ៊ែរ​​​លើ​យន្តហោះ គឺនៅឆ្នាំ​១៩៩៨ នៅពេលដែលចក្រភព​មួយ​នេះ​បាន​ដាក់​គ្រាប់​បែក WE-177 ឲ្យ​ចូលនិវត្តន៍។

លោក​នាយករដ្ឋមន្ត្រី Starmer បាននិយាយថា «នៅក្នុងយុគសម័យនៃអស្ថិរភាពដ៏​ខ្លាំង​នេះ យើងមិនអាចបន្តទទួលយកសន្តិភាពបានទេ។ នោះហើយជាមូលហេតុដែលរដ្ឋាភិបាលរបស់ខ្ញុំកំពុងវិនិយោគលើសន្តិសុខជាតិ»។

រដ្ឋាភិបាលអង់គ្លេស បាន​​ឲ្យ​ដឹង​ថា កិច្ចព្រមព្រៀងនេះនឹងបង្កើតការងារចំនួន ២០ ០០០​​កន្លែង​ និងបញ្ជាក់ឡើងវិញនូវការប្តេជ្ញាចិត្តរបស់ទីក្រុងឡុងដ៍ចំពោះអង្គការណាតូ ព្រោះវាអាចរួមចំណែកដល់យន្តហោះដែលមានសមត្ថភាព​នុយក្លេអ៊ែររបស់សម្ព័ន្ធភាពក្នុងករណីមានជម្លោះ។

អគ្គលេខាធិការអង្គការណាតូ លោក Mark Rutte ក៏បានវាយតម្លៃថា វា​ជាការរួមចំណែកដ៏អស្ចារ្យមួយទៀតពីចក្រភពអង់គ្លេសចំពោះប្លុក។

ការរារាំងនុយក្លេអ៊ែររបស់ចក្រភពអង់គ្លេសនាពេលបច្ចុប្បន្ននេះ ពឹងផ្អែកទាំងស្រុងលើនាវាមុជទឹក Vanguard ដែល​នាវា​នីមួយៗមាន​មីស៊ីល​នុយក្លេអ៊ែរ Trident D5 ចំនួន ១៦​គ្រាប់ដែលមានរយៈចម្ងាយ ១២ ០០០​គីឡូម៉ែត្រ។ តាមរយៈការទិញយន្តហោះចម្បាំង F-35A យោធាអង់គ្លេសនឹងមានជម្រើសយោធាកាន់តែច្រើន និងកាន់តែជិតស្និទ្ធជាមួយនឹង​សម្ព័ន្ធ​មិត្តណាតូ ដូចជា បារាំង ឬសហរដ្ឋអាមេរិក ដែលជាប្រទេសដែលមានលទ្ធភាពបាញ់អាវុធនុយក្លេអ៊ែរពីសមុទ្រ ដី និងអាកាស។

យន្តហោះចម្បាំង F-35A មានសមត្ថភាពផ្ទុកគ្រាប់បែកនុយក្លេអ៊ែរ B-61 ផលិតដោយសហរដ្ឋអាមេរិក។ មន្ត្រីការពារជាតិអង់គ្លេសដែលមិនបញ្ចេញឈ្មោះម្នាក់ បាននិយាយថា ទីក្រុងឡុងដ៍ប្រហែលជាត្រូវការទីក្រុងវ៉ាស៊ីនតោន ដើម្បីផ្តល់គ្រាប់បែកប្រភេទនេះ ដើម្បីបំពាក់​លើ​យន្តហោះចម្បាំង F-35A ដែលខ្លួន​ហៀប​នឹងទិញ។

សហរដ្ឋអាមេរិក បានបញ្ឈប់ការដាក់ពង្រាយអាវុធនុយក្លេអ៊ែរនៅក្នុងចក្រភពអង់គ្លេសចាប់តាំងពីឆ្នាំ​២០០៨ ក្រោយ​ពេលមានការថយចុះហានិភ័យនៃជម្លោះបន្ទាប់ពីសង្គ្រាមត្រជាក់។

ថ្មីៗនេះ អង់គ្លេសបានបង្កើនការចំណាយលើវិស័យការពារជាតិ និងធ្វើទំនើបកម្មយោធារបស់ខ្លួន រួមទាំងកម្លាំងនាវាមុជទឹក ដើម្បីឆ្លើយតបទៅនឹងស្ថានការណ៍ដ៏ស្មុគស្មាញក្នុងពិភពលោក ក៏ដូចជា ហានិភ័យ​​នៅ​ពេល​ដែល​សហរដ្ឋអាមេរិកកំពុង​កាត់បន្ថយតួនាទីរបស់ខ្លួនជាបណ្តើរៗ​ក្នុង​នាម​ជាអ្នកការពារសន្តិសុខសម្រាប់អឺរ៉ុប។

ទីក្រុងឡុងដ៍ បាន​ប្ដេជ្ញា​ថានឹងបង្កើនថវិកាការពារជាតិ និងសន្តិសុខរបស់ខ្លួនដល់ ៥% នៃផលិតផលក្នុងស្រុកសរុបនៅឆ្នាំ​២០២៥ ដើម្បីបំពេញតាមគោលដៅរបស់ណាតូ៕

ដោយ៖ ឈាង