ព័ត៌មានអន្ដរជាតិ

ជាង២០ឆ្នាំក្នុងសង្រ្គាមនៅមជ្ឈិមបូព៌ា និងអាហ្វហ្គានីស្ថាន អាមេរិកចាយលុយអស់ប៉ុន្មាន?

បានផុស

១ year មុន

នៅ

ថ្ងៃព្រហស្បតិ៍ ២៦ មិថុនា ២០២៥

ដោយ

Chheang

ចាប់តាំងពីឆ្នាំ២០០១ សហរដ្ឋអាមេរិកបានចំណាយប្រាក់ប្រហែល ៥,៨ទ្រីលានដុល្លារលើសង្រ្គាមនៅក្នុងប្រទេសអាហ្វហ្គានីស្ថាន អ៊ីរ៉ាក់ ស៊ីរី និងតំបន់ផ្សេងទៀតនៅមជ្ឈិមបូព៌ា និងអាហ្វ្រិកខាងជើង។ បើរាប់ចូលទាំងការចំណាយរយៈពេលវែង ដូចជា ការថែទាំអតីតយុទ្ធជន និងការទូទាត់ការប្រាក់ ការចំណាយសរុបកើនឡើងដល់ប្រហែល ៨ទ្រីលានដុល្លារឯណោះ។ ទិន្នន័យនេះត្រូវបានដកស្រង់ចេញពីការស្រាវជ្រាវក្នុង«គម្រោងចំណាយនៃសង្គ្រាម» នៅវិទ្យាស្ថាន Watson នៃសាកលវិទ្យាល័យ Brown សម្រាប់កិច្ចការអន្តរជាតិ និងកិច្ចការសាធារណៈ។

ទាហានអាមេរិកនៅអាហ្វហ្គានីស្ថាន ឆ្នាំ២០១១ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សហរដ្ឋអាមេរិកចំណាយលើវិស័យយោធារបស់ខ្លួនច្រើនជាងប្រទេសដទៃទៀតក្នុងពិភពលោក ដោយចំណាយប្រហែល ៣ដងច្រើនជាងប្រទេសចិន និងជិត ៧ដងច្រើនជាងប្រទេសរុស្ស៊ី។ យោងតាមវិទ្យាស្ថានស្រាវជ្រាវសន្តិភាពអន្តរជាតិ Stockholm (SIPRI) នៅឆ្នាំ២០២៤ អាមេរិកបានចំណាយប្រាក់ចំនួន ៩៩៧ពាន់លានដុល្លារលើវិស័យយោធារបស់ខ្លួន ដែលស្មើនឹង ៣៧ភាគរយនៃការចំណាយយោធាទូទាំងពិភពលោក។

💰 លម្អិតតម្លៃចំណាយ

១. ការចំណាយលើវិស័យការពារជាតិដែលទាក់ទងនឹងសង្រ្គាម (៣ទ្រីលានដុល្លារ)

នេះរួមមាន៖

ថវិកាផ្ទាល់របស់ក្រសួងការពារជាតិសហរដ្ឋអាមេរិក (DoD) សម្រាប់ប្រតិបត្តិការនៅក្នុងអាហ្វហ្គានីស្ថាន អ៊ីរ៉ាក់ ស៊ីរី យេម៉ែន លីប៊ី សូម៉ាលី និងកន្លែងផ្សេងទៀត។
ថវិកាប្រតិបត្តិការបន្ទាន់ក្រៅប្រទេស (OCO)

២. ថ្លៃពេទ្យ និងពិការភាពរបស់អតីតយុទ្ធជន (៤៦៥ពាន់លានដុល្លារ)

ការចំណាយទាក់ទងនឹងការថែទាំរយៈពេលវែងរបស់អតីតយុទ្ធជនក្រោយព្រឹត្តិការណ៍ថ្ងៃទី១១កញ្ញា មានចំនួនសមាជិកជាង ៤,៥លាននាក់។
ការរួមបញ្ចូលការព្យាបាលវេជ្ជសាស្រ្ត សំណងពិការភាព និងអត្ថប្រយោជន៍ផ្សេងទៀតរបស់កិច្ចការអតីតយុទ្ធជន។
ការចំណាយនេះនឹងអាចឈានដល់ ២,២ទ្រីលានដុល្លារ នៅឆ្នាំ២០៥០ខាងមុខ។

៣. ការទូទាត់ការប្រាក់លើកម្ចីសង្រ្គាម (១,១ទ្រីលានដុល្លារ)

ដោយសារតែសង្រ្គាមទាំងនេះត្រូវបានផ្តល់ហិរញ្ញប្បទានយ៉ាងច្រើនតាមរយៈប្រាក់កម្ចី ការប្រាក់លើបំណុលជាតិរបស់សហរដ្ឋអាមេរិកមានចំនួនចំណែកដ៏ធំនៃការចំណាយសរុប។
បើកម្ចីនៅតែបន្ត ការទូទាត់ការប្រាក់អាចកើនឡើងជាច្រើនពាន់លានបន្ថែមទៀតនៅប៉ុន្មានទសវត្សរ៍ខាងមុខ។

៤. សន្តិសុខមាតុភូមិ (១,១ទ្រីលានដុល្លារ)

ការពង្រឹងសន្តិសុខក្នុងស្រុកក្រោយព្រឹត្តិការណ៍ថ្ងៃទី១១កញ្ញា រួមមាន៖

TSA (រដ្ឋបាលសន្តិសុខដឹកជញ្ជូន)
សន្តិសុខព្រំដែន
ការអនុវត្តច្បាប់អន្តោប្រវេសន៍
កម្មវិធីសន្តិសុខតាមអ៊ីនធឺណិត
កិច្ចខិតខំប្រឹងប្រែងប្រឆាំងភេរវកម្មដោយ FBI និង DHS

⚰️ ចំនួនមនុស្សស្លាប់

យ៉ាងហោចណាស់មនុស្ស ៩៤០ ០០០នាក់បានស្លាប់ដោយសារអំពើហឹង្សាទាក់ទងនឹងសង្រ្គាម ដូចជា ទាហានអាមេរិក ទាហានសម្ព័ន្ធមិត្ត ទាហានសត្រូវ អ្នកម៉ៅការ ជនស៊ីវិល និងអ្នកកាសែត។
ចំនួនអ្នកស្លាប់ពិតប្រាកដអាចលើសពី ៤លាននាក់ នៅពេលដែលផលប៉ះពាល់ដោយប្រយោល (ដូចជា ជំងឺ ការផ្លាស់ទីលំនៅ ការដួលរលំហេដ្ឋារចនាសម្ព័ន្ធ) ត្រូវបានរាប់បញ្ចូល។

⏳ បន្ទុករយៈពេលវែង

កាតព្វកិច្ចនាពេលអនាគត (ដូចជា ការថែទាំអតីតយុទ្ធជន និងសេវាបំណុល) នឹងបន្តរហូតដល់ឆ្នាំ២១០០ខាងមុខ។
ការចំណាយលើសង្គ្រាម បានកាន់បន្ថយចំណាយសម្រាប់ការវិនិយោគក្នុងស្រុកដែលចាំបាច់ ដូចជា ការថែទាំសុខភាព ការអប់រំ និងហេដ្ឋារចនាសម្ព័ន្ធ។

🧠 អត្ថាធិប្បាយរបស់អ្នកជំនាញ

ក្រុមអ្នកស្រាវជ្រាវមកពីសាកលវិទ្យាល័យ Brown បាននិយាយថា ទោះបីជាសហរដ្ឋអាមេរិកបានចំណាយប្រាក់រាប់ពាន់លានដុល្លារលើសង្គ្រាមតាំងពីឆ្នាំ២០០១ក៏ដោយ ក៏សង្រ្គាមទាំងនេះមិនបានធ្វើឲ្យប្រទេសមានសុខសុវត្ថិភាពពេញលេញនោះទេ។

ពួកគេបង្ហាញពីបញ្ហាសំខាន់បី៖

សង្រ្គាមមិនបានបញ្ឈប់អំពើភេរវកម្មទាំងស្រុងទេ ដោយក្រុមភេរវករនៅតែមាន ហើយក្រុមថ្មីត្រូវបានបង្កើតឡើងបន្តបន្ទាប់។
ថវិកាអាចយកប្រើនៅក្នុងប្រទេសបានល្អប្រសើរជាង។ ជំនួសឲ្យការចំណាយច្រើនលើសង្រ្គាម សហរដ្ឋអាមេរិកអាចវិនិយោគលើអ្វីផ្សេងដែលសំខាន់ ដូចជា សាលារៀន ការថែទាំសុខភាព ឬការជួសជុលផ្លូវជាដើម។
ការចំណាយមិនមានតម្លាភាពគ្រប់គ្រាន់ទេ។ លុយជាច្រើនត្រូវបានចំណាយដោយគ្មានព័ត៌មានច្បាស់លាស់អំពីរបៀបដែលត្រូវបានប្រើប្រាស់ ហើយការសម្រេចចិត្តជាច្រើនត្រូវបានធ្វើឡើងដោយគ្មានការបង្ហាញជាសាធារណៈ។

សរុបមក ពួកគេជឿថា ការចំណាយដ៏ធំនៃសង្រ្គាមបាននាំមកនូវផលប្រយោជន៍រយៈពេលវែងតិចតួចបំផុត ហើយបានបន្សល់ទុកបំណុលជាច្រើនសម្រាប់អាមេរិក ខណៈប្រព័ន្ធកែលម្អក្នុងប្រទេសមានតិចតួចប៉ុណ្ណោះ៕

ដោយ៖ ឈាង