ព័ត៌មានអន្ដរជាតិ

ពូទីន ចេញបញ្ជារៀបចំខេត្តចំនួន៤ដែលខ្លួនដណ្ដើមបាន ឲ្យត្រូវតាមស្ដង់ដាររុស្ស៊ី

បានផុស

១០ ខែ មុន

នៅ

ថ្ងៃអង្គារ ១ កក្កដា ២០២៥

ដោយ

Chheang

យោងតាមការចុះផ្សាយរបស់សារព័ត៌មាន TASS កាលពីថ្ងៃទី៣០ខែមិថុនា លោកប្រធានាធិបតី វ៉្លាឌីមៀរ ពូទីន បានចេញបញ្ជាឲ្យអាជ្ញាធរសហព័ន្ធ ក្រុមហ៊ុនរដ្ឋ និងរដ្ឋាភិបាលក្នុងតំបន់ រៀបចំការរស់នៅក្នុងខេត្តចំនួន៤ ដូចជា Donetsk, Luhansk, Zaporizhzhia និង Kherson ឲ្យត្រូវតាមស្ដង់ដាររុស្ស៊ី ដែលជាសញ្ញានៃការជំរុញសមាហរណកម្មសេដ្ឋកិច្ចសង្គមដ៏សំខាន់នៅលើទឹកដីអ៊ុយក្រែនដែលខ្លួនកំពុងកាន់កាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទវីដេអូស្តីពីការអភិវឌ្ឍតំបន់ទាំងនេះ លោក ពូទីន បានកំណត់គោលដៅនៅត្រឹមឆ្នាំ២០៣០ខាងមុខ ក្នុងការកែប្រែមុខមាត់ថ្មីនៃខេត្តទាំង៤។ លោកបានបញ្ជាក់ទៀតថា ក្រុមហ៊ុនរដ្ឋចំនួន២៦ និងតំបន់ចំនួន៨២ របស់រុស្ស៊ីបានប្តេជ្ញាចិត្តក្នុងការជួយដល់ការកសាងឡើងវិញ ដែលមានដូចជា ការជួសជុលលំនៅដ្ឋាន សាលារៀន មន្ទីរពេទ្យ និងឧបករណ៍ប្រើប្រាស់ផ្សេងៗ។ មេដឹកនាំរុស្ស៊ី បាននិយាយថា «ប្រទេស(រុស្ស៊ី)ទាំងមូល គាំទ្រតំបន់ Donbass និង Novorossiya ក្នុងការបង្កើតការរស់រានប្រកបដោយសន្តិភាព និងវិបុលភាព»។

តំបន់ Donbass ដែលលោក ពូទីន លើកឡើង សំដៅទៅលើតំបន់ភាគខាងកើតអ៊ុយក្រែន ដែលរួមបញ្ចូលខេត្តចំនួន២ គឺ Donetsk និង Luhansk ហើយក៏ជាតំបន់ដែលរុស្ស៊ីកាត់បញ្ចូលជាទឹកដីរបស់ខ្លួនកាលពីឆ្នាំ២០២២នៅពេលបើកប្រតិបត្តិការពេញទំហឹងលុកលុយអ៊ុយក្រែន។ ចំណែកឯតំបន់ Novorossiya សំដៅលើតំបន់ភាគខាងត្បូងប្រទេសអ៊ុយក្រែន ហើយរុស្ស៊ីប្រើពាក្យនេះ សំដៅលើតំបន់ Donbass ព្រមទាំងខេត្ត Zaporizhzhia និង Kherson។

លោក ពូទីន បានស្នើឲ្យអាជ្ញាធររដ្ឋ និងមូលដ្ឋានវាយតម្លៃស្ថានភាពក្នុងតំបន់នីមួយៗ និងកំណត់គម្រោងសំខាន់ៗ ដើម្បីបង្កើតការងារថ្មី និងលើកកម្ពស់គុណភាពជីវិតរបស់ប្រជាជនក្នុងខេត្តទាំង៤។

ជាមួយគ្នានេះដែរ ប្រធានាធិបតីរុស្ស៊ី បាននិយាយម្តងទៀតថា រុស្ស៊ីត្រៀមខ្លួនជាស្រេចដើម្បីចរចាបញ្ចប់សង្គ្រាម ប៉ុន្តែនឹងមិនបោះបង់ចោលខេត្តទាំង៤ឡើយ។ ពាក់ព័ន្ធនឹងការលើកឡើងបែបនេះ អ៊ុយក្រែនបានបញ្ជាក់ថា ខ្លួននឹងមិនធ្វើការសម្បទានទឹកដី ដើម្បីបញ្ចប់ជម្លោះដាច់ខាត៕

ដោយ៖ ឈាង

ចុចអាន៖ ចាយពេលជាង៣ឆ្នាំ ទីបំផុត រុស្ស៊ី គ្រប់គ្រងបានតំបន់ Luhansk ទាំងស្រុងហើយ