បាត់ខ្លួនមនុស្ស​៧នាក់ក្នុងហេតុការណ៍ផ្ទុះឃ្លាំងកាំជ្រួច នៅរដ្ឋកាលីហ្វ័រញ៉ា

ហេតុការណ៍ផ្ទុះឃ្លាំងកាំជ្រួចដ៏សាហាវនៅភាគខាងជើងរដ្ឋកាលីហ្វ័រញ៉ា សហរដ្ឋអាមេរិក បណ្តាលឱ្យមនុស្ស៧នាក់បាត់ខ្លួន និង ២នាក់ផ្សេងទៀតរងរបួស។

បើ​យោងតាមការចេញផ្សាយនៅថ្ងៃទី០៣ខែកក្កដារបស់ទីភ្នាក់ងារព័ត៌មាន​AP​ ហេតុការណ៍ផ្ទុះនេះបានកើតឡើងនៅក្នុង​តំបន់ Yolo បណ្តាលឱ្យមានភ្លើងឆេះដ៏ធំរាលដាលលើផ្ទៃដីជាង៨០ហិកតា និងជម្លៀសអ្នករស់នៅក្បែរនោះចេញ។

មកដល់ពេលនេះ អាជ្ញាធរនៅតែព្យាយាមស្វែងរកអ្នកបាត់ខ្លួន ដោយប្រើប្រាស់យន្តហោះគ្មានមនុស្សបើក និងធ្វើការជាមួយម្ចាស់ក្រុមហ៊ុន។ គេ​នៅ​មិន​ទាន់​ដឹង​ថា​តើ​អ្នក​បាត់​ខ្លួន​ជា​កម្មករ ឬ​ជា​អ្នក​ស្រុក​នៅ​ឡើយ​ទេ។ ភ្លើង​នៅតែ​ឆេះ ដែលត្រូវរង់ចាំឲ្យវារលត់​សិន ទើប​អ្នកជំនាញ​អាច​ពិនិត្យ​ដោយ​សុវត្ថិភាព ដើម្បី​រកមើលការខូចខាត ឬ​គ្រោះថ្នាក់​បន្ថែមទៀត​។

អាជ្ញាធរបានឲ្យដឹងថាម្នាក់ក្នុងចំណោមអ្នកបាត់ខ្លួនគឺជា Jesus Ramos អាយុ ១៨ ឆ្នាំដែលទើបតែមកធ្វើការនៅថ្ងៃដំបូងនៅឃ្លាំងនេះ បើតាមមិត្តស្រីរបស់គាត់បានរាយការណ៍។

ឃ្លាំងនេះគ្រប់គ្រងដោយក្រុមហ៊ុន Blackstar Fireworks ដែលជាក្រុមហ៊ុនកាំជ្រួចមានអាជ្ញាប័ណ្ណត្រឹមត្រូវ ខណៈអាជ្ញាធរក៏បាននិយាយដែរថាគ្រោះថ្នាក់បែបនេះគឺកម្រមានណាស់ ពីព្រោះកន្លែងទាំងនេះអនុវត្តតាមច្បាប់សុវត្ថិភាពយ៉ាងតឹងរ៉ឹង។

អភិបាលរដ្ឋកាលីហ្វ័រញ៉ា លោក Gavin Newsom បានបញ្ជូនក្រុមអ្នកជំនាញគ្រាប់បែក ដើម្បីជួយដល់ប្រតិបត្តិការនេះផងដែរ។ ជាមួយគ្នានេះ អ្នករស់នៅតំបន់ជិតៗកន្លែងកើតហេតុឥឡូវកំពុងស្វែងរកវិធីថ្មីដើម្បីអបអរបុណ្យនៅថ្ងៃទី៤ ខែកក្កដា ដោយសារកាំជ្រួចរបស់ពួកគេមួយចំនួនត្រូវបានបំផ្លាញដោយសារការផ្ទុះនេះ៕

អត្ថបទ៖ ប៊ុន សុភាព