ព្យុះវីពផាចុះខ្សោយបន្ទាប់ពីវាយប្រហារភាគខាងជើងប្រទេសវៀតណាម

យោងតាមការចេញផ្សាយរបស់សារព័ត៌មាន VN Express នៅថ្ងៃទី២៣ខែកក្កដា ព្យុះវីពផា (Wipha) បានបោកបក់ទៅលើភាគខាងជើងប្រទេសវៀតណាមកាលពីថ្ងៃអង្គារ ដោយវាយប្រហារខេត្ត Hung Yen និង Thanh Hoa បន្សល់ទុកការខូចខាត មុនពេលចុះខ្សោយទៅជាព្យុះត្រូពិកនៅម៉ោង ៧:២៥ យប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាវាចុះខ្សោយក៏ដោយ ព្យុះនេះបាននាំមកនូវភ្លៀងធ្លាក់ខ្លាំង និងខ្យល់បក់ខ្លាំងពាសពេញតំបន់ ជាពិសេសនៅ ខេត្ត Ninh Binh, Thanh Hoa និង Quang Ninh។

ព្យុះវីពផា រក្សាអាំងតង់ស៊ីតេខ្ពស់ក្នុងរយៈពេលជិតប្រាំបួនម៉ោង ជាមួយនឹងកម្លាំងខ្យល់បក់តាមឆ្នេរសមុទ្រដែលមានល្បឿនរហូតដល់ ១០២ គីឡូម៉ែត្រក្នុងមួយម៉ោង។ បរិមាណទឹកភ្លៀងសរុបលើសពី ៤០០ មីលីម៉ែត្រ នៅតំបន់មួយចំនួន ដែលបង្កឱ្យមានការព្រមានអំពីទឹកជំនន់ និងបំណាក់ដី ជាពិសេសនៅតំបន់ភ្នំ។

ចំណែករលកសមុទ្រវិញបានហក់ឡើងដល់ទៅ ៣.៥ ម៉ែត្រនៅក្នុងទីតាំងឈូងសមុទ្រ ហើយការកើនឡើងនៃព្យុះត្រូវក៏បានកត់ត្រានៅក្នុងខេត្តជាប់មាត់សមុទ្រ។ អាជ្ញាធរគ្រប់គ្រងគ្រោះមហន្តរាយ និងទំនប់ទឹកវៀតណាមបានរាយការណ៍អំពីការជម្លៀសមនុស្សជិត ១១,៨០០ ដោយសារព្យុះ។ ដីស្រែជាង ១០៧,០០០ ហិកតាត្រូវបានជន់លិច ហើយទំនប់ជាច្រើនបានទទួលរងការខូចខាត។

ទោះបីជាព្យុះវីពផាបានចុះខ្សោយក៏ដោយ ប៉ុន្តែប្រព័ន្ធអាកាសធាតុនៅតែបង្កឲ្យមានភ្លៀងធ្លាក់ខ្លាំងនៅក្នុងតំបន់ជាច្រើន។ ប្រការនេះបង្កើនហានិភ័យនៃទឹកជំនន់កាន់តែខ្លាំង ជាពិសេសនៅកន្លែងដែលរងផលប៉ះពាល់រួចហើយ។ ព្យុះវីពផា គឺជាព្យុះដ៏ធំទីពីរដែលបានវាយប្រហារប្រទេសវៀតណាមក្នុងឆ្នាំនេះ ហើយអ្នកជំនាញបាននិយាយថា ព្យុះជាច្រើនទៀតអាចនឹងមកដល់វៀតណាមក្នុងរយៈពេលប៉ុន្មានខែខាងមុខនេះ៕

អត្ថបទ៖ ប៊ុន សុភាព