ការចរចាអាមេរិក-ចិននៅស៊ុយអែត មិនសម្រេច​អ្វីជាដុំកំភួន ខណៈការអនុវត្តពន្ធខ្ពស់អាស្រ័យលើ ត្រាំ

ការចរចាគ្នារយៈពេល​ ២ ថ្ងៃ (ចន្ទ អង្គារ) នៅទីក្រុងស្តុកខុលម៍ (ស៊ុយអែត) រវាង​មន្រ្តីជាន់ខ្ពស់របស់សហរដ្ឋអាមេរិក និងចិន មិន​បាន​សម្រេច​អ្វីជាដុំកំភួននោះទេ ក្រៅតែពីការព្រមព្រៀងគ្នា​លើការចរចា​បន្តលើកពេល​អនុវត្តពន្ធខ្ពស់ ៩០ ថ្ងៃទៀត​ ប៉ុន្តែការសម្រេច​គឺអាស្រ័យលើ​ប្រធានាធិបតីអាមេរិក លោក ដូណាល់ ត្រាំ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

​

មន្រ្តីសហរដ្ឋអាមេរិក​បាន​អះអាងថា ការ​​បន្តលើកពេល​ ឬមិនលើកពេល​អនុវត្តពន្ធខ្ពស់ គឺអាស្រ័យ​លើ​ការសម្រេច​របស់​ ត្រាំ ខណៈកាលកំណត់នៅថ្ងៃទី ១២ សីហា កាន់តែខិតជិតមកដល់។

ទោះជាយ៉ាង​ណា​ក៏ដោយ​ រដ្ឋ​មន្រ្តីរតនាគារអាមេរិក​ លោក Scott Bessent ​ដែល​ជួបជាមួយ​ឧបនាយករដ្ឋមន្ត្រីចិន លោក He Lifeng បាន​លើកឡើងថា៖ «ការប្រជុំប្រកបដោយការស្ថាបនា គ្រាន់តែថា យើងមិនទាន់សម្រេចចុងក្រោយ»។

លោក ត្រាំ ឯណោះវិញ បាន​និយាយថា លោក ​Bessent បាន​ប្រាប់លោកអំពីកិច្ចប្រជុំជាមួយចិន។ លោកថ្លែងថា ហើយថា រដ្ឋ​មន្រ្តីរតនាគារអាមេរិកមាន​សុទិដ្ឋិនិយមលើកិច្ចប្រជុំនៅថ្ងៃចន្ទ ជាជាង​នៅថ្ងៃអង្គារ​។

គួរបញ្ជាក់ថា ក្រោយ​គំរាមកំហែងដាក់ពន្ធខ្ពស់លើដៃគូពាណិជ្ជកម្ម​អស់រយៈពេល​ជាច្រើន​ខែ លោក ត្រាំ បានធានាកិច្ចព្រមព្រៀងពាណិជ្ជកម្មជាមួយសហភាពអឺរ៉ុប (EU) ជប៉ុន ឥណ្ឌូណេស៊ី និងប្រទេសដទៃទៀត។ យ៉ាងណា​មិញ កិច្ចព្រមព្រៀងពាណិជ្ជកម្មជាមួយ​ចិន មិនទាន់សម្រេច​បាន​នៅឡើយទេ ខណៈភាពសំខាន់នៃសេដ្ឋកិច្ចចិន និងភាព​នាំមុខគេ​លើធនធានរ៉ែកម្រ គឺជាកត្តាលេចធ្លោសម្រាប់ចិន​ក្នុងការចរចាពន្ធ តបទៅនឹ​ងពន្ធ ត្រាំ។ ​

ចិន​ និងអាមេរិក ធ្លាក់ចូល​ទៅក្នុងសង្រ្គាម​ពាណិជ្ជកម្មធ្ងន់ធ្ងរ ដោយ​អាមេរិក ដាក់ពន្ធ ១៤៥ ភាគរយ លើទំនិញ​ចិន ហើយចិនសឹកសឹកជាបន្តបន្ទាប់ ដោយ​ដំឡើងពន្ធលើទំនិញអាមេរិក ដល់ ១២៥ ភាគរយ។ នៅពាក់កណ្ដាលខែឧសភា ភាគីទាំង២សម្រេចកិច្ចព្រមព្រៀងទម្លាក់ពន្ធ ១១៥ ភាគរយ រៀងៗខ្លួន ដោយ​អនុវត្តវារយៈពេល ៩០ ថ្ងៃ៕