២៤ខេត្តនៅថៃ ប្រុងជើងការខ្ពស់ទប់ទល់គ្រោះទឹកជំនន់និងបំណាក់ដី ដល់ថ្ងៃអាទិត្យ

ខេត្តថៃចំនួន២៤ កំពុងប្រុងជើងការខ្ពស់ទប់ទល់នឹងគ្រោះទឹកជំនន់និងបំណាក់ដី ចាប់ពីថ្ងៃសុក្រទី១៥ដល់ថ្ងៃអាទិត្យទី១៧ខែសីហាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីប្រកាសរបស់នាយកដ្ឋានបង្ការគ្រោះមហន្តរាយថៃ, ក្នុងចំណោមខេត្តទាំង២៤នោះ មាន១០ខេត្តស្ថិតនៅតំបន់ភាគខាងជើង ៦ខេត្តនៅភាគឦសាន ៤ខេត្តនៅភាគកណ្តាលនិង៤ខេត្តនៅភាគខាងត្បូង។

ក្នុងសេចក្តីប្រកាសនោះ នាយកដ្ឋានបានព្រមានឲ្យពលរដ្ឋប្រយ័ត្នខ្លួនចំពោះការបាក់ដីនិងជំនន់រហ័ស ជាពិសេសខេត្តនៅភាគខាងជើងតែម្តង ព្រោះថា ទីនោះនឹងមានភ្លៀងធ្លាក់ខ្លាំង បណ្តាលមកពីឥទ្ធិពលនៃព្យុះ Podul។

ទន្ទឹមនោះដែរ បើតាមការចុះផ្សាយរបស់ The Nation, អាជ្ញាធរបានណែនាំឲ្យពលរដ្ឋត្រូវត្រៀមខ្លួនជានិច្ចចំពោះការជម្លៀស ខណៈក្រុមជួយសង្គ្រោះក៏កំពុងឈរជើង ត្រៀមសម្ភារៈនិងឧបករណ៍នានាផងដែរ ដើម្បីធ្វើប្រតិបត្តិការក្នុងករណីកើតមានគ្រោះអាសន្នណាមួយ។

មុននេះដែរ នាយកដ្ឋានឧតុនិយមថៃ បានព្រមានឲ្យខេត្តទូទាំងប្រទេស ត្រូវមានការប្រុងប្រយ័ត្នខ្ពស់ចំពោះព្យុះទីហ្វុង Podul ខណៈឥទ្ធិពលនៃព្យុះនេះក៏បង្កហានិភ័យដល់ទីក្រុងបាងកកដែរ។

ព្យុះ Podul នេះក៏ជះឥទ្ធិពលលើព្រះរាជាណាចក្រកម្ពុជាដូចគ្នា ដែលវានឹងធ្វើឲ្យតំបន់មួយចំនួនមានភ្លៀងធ្លាក់ជាមួយផ្គររន្ទះ និងខ្យល់កន្ត្រាក់។

ទោះបីជាយ៉ាងណាក៏ដោយ ព្យុះទី១១ក្នុងឆ្នាំ២០២៥មួយនេះ ពុំមានឥទ្ធិពលខ្លាំងមកលើព្រះរាជាណាចក្រកម្ពុជានោះទេ៕

អត្ថបទ៖ សុខ សុវណ្ណ

ចុចអាន៖ ខេត្តភាគពាយព្យប្រទេសថៃ ប្រកាសអាសន្ន ព្រោះទឹកជំនន់ ធ្ងន់ធ្ងរខ្លាំងពេក