ងិន ម៉ារ៉ាឌី ទទួលបានជ័យលាភីចំណាត់ថ្នាក់លេខ២ ក្នុងកម្មវិធីលំដាប់អន្តរជាតិផ្នែករចនាម៉ូតក្រចក

អតីតម្ចាស់មកុដនៃកម្មវិធី Miss Universe Cambodia 2021 អ្នកនាង ងិន ម៉ារ៉ាឌី បានបង្ហាញមោទនភាព និងរំភើបជាខ្លាំង បន្ទាប់ពីតារាស្រីរូបនេះមានឱកាសចេញទៅបញ្ចេញសមត្ថភាពដោយទទួលបានជ័យលាភីចំណាត់ថ្នាក់លេខ២ ក្នុងកម្មវិធីលំដាប់អន្តរជាតិផ្នែករចនាម៉ូតក្រចក Fantasy KBC Award 2025 ។

បើតាមការបញ្ជាក់បវរកញ្ញាកម្ពុជាអ្នកនាង ងិន ម៉ារ៉ាឌី បានឲ្យដឹងថាទីបំផុតកូនខ្មែរម្នាក់នេះអាចធ្វើបាន ក្នុងការប្រកួតអន្តរជាតិផ្នែកក្រចកវែងfantasy5ម្រា មចាក់ដោយដៃនៃម្សៅ Acrylic ។ នាងបន្តថា ក្នុងការប្រកួតនេះគឺនាងទទួលបានចំណាត់ថ្នាក់លេខ២ ហើយនាងតែងតែជឿថា ក្មេងស្រីដែលមានក្តីសុបិន្តហ្នឹងក្លាយទៅជាមនុស្សស្រីដែលមានទស្សនវិស័យ។

ងិន ម៉ារ៉ាឌី បាននិយាយទៀតថា “អរគុណអ្នកគ្រូធំ Arrow Queen ដែលបានផ្តល់ឱកាសអោយខ្ញុំចូលប្រកួតវាជាទំព័រថ្មីមួយសម្រាប់ខ្ញុំក្នុងអាជីពនេះ ចាប់តាំងពីថ្ងៃដែលខ្ញុំឈាងជើងដើរចូលសាលា ខ្ញុំបានជឿជាក់រួចទៅហើយថា សាលានេះហ្នឹងដឹកនាំខ្ញុំទៅកាន់ជំនាញមួយដែរខ្ញុំចង់បាន”។

ជាមួយគ្នានេះ អ្នកនាង ងិន ម៉ារ៉ាឌី បានសម្តែងការអរគុណដល់គ្រូបន្ទុកថ្នាក់ផងដែរ ដែលតែងតែអបអរពេលសិស្សទទួ លបានជោគជ័យ និងសម្រាប់ការផ្តល់កម្លាំងចិត្ត ពិសេសអរគុណដល់ក្រុមគ្រួសារដែលបំផុសគំនិតក្នុងការធ្វើសុីក្លូនេះឡើង។ នាងបន្ថែមថា ជោគជ័យនេះក៏ដោយសារស្វាមីដែលតែងតែជឿជាក់និងទុកឱកាសឱ្យខ្លួន ក្នុងការសាងស្នាដៃជាច្រើនមុនពេលចាកចេញពីមាតុភូមិ ពាននេះ ជ័យជំនះនេះ មិនសម្រាប់នាងតែម្នាក់ទេ តែសម្រាប់ប្រជាជនប្រទេសកម្ពុជានិងមាតុភូមិ ៕ ចាន់រ៉ា