វិមានក្រឹមឡាំង៖ ទណ្ឌកម្ម​មិន​អាច​ធ្វើ​ឲ្យ​រុស្ស៊ី​ផ្លាស់ប្ដូរ​ជំហរ​សង្គ្រាម​នៅ​អ៊ុយក្រែន​ឡើយ

ទោះត្រូវ​សហរដ្ឋ​អាមេរិក និងសហភាពអឺរ៉ុបគំរាម​ដាក់ទណ្ឌកម្មសេដ្ឋកិច្ចដ៏តឹងរ៉ឹងក៏ដោយ ក៏​វិមានក្រឹមឡាំង បានច្រានចោលការរំពឹងទុកដែលថា វិធានការ​មួយ​នេះនឹងបង្ខំ​ឲ្យ​រុស្ស៊ីផ្លាស់ប្តូរទិសដៅរបស់ខ្លួននៅក្នុងប្រទេសអ៊ុយក្រែន។

យោង​តាម​ការ​ចុះផ្សាយ​​​នា​ថ្ងៃ​ទី​៩ខែ​កញ្ញា​នេះ​របស់​ Kyiv Independent អ្នកនាំពាក្យវិមានក្រឹមឡាំង លោក Dmitry Peskov បានប្រាប់ប្រព័ន្ធផ្សព្វផ្សាយរដ្ឋថា «គ្មានទណ្ឌកម្មណាមួយនឹងអាចបង្ខំ​ឲ្យ​សហព័ន្ធរុស្ស៊ីផ្លាស់ប្តូរជំហរជាប់លាប់ដែលប្រធានាធិបតីរបស់យើងបាននិយាយម្តងហើយម្តងទៀត​នោះ​ទេ»។

ការអត្ថាធិប្បាយរបស់​លោក Peskov បានកើតឡើងនៅពេលដែលសារព័ត៌មាន Bloomberg បានរាយការណ៍ថា សហភាពអឺរ៉ុបកំពុងរៀបចំកញ្ចប់ទណ្ឌកម្មទី១៩ ដែលផ្តោតលើធនាគាររុស្ស៊ី និងវិស័យថាមពល។ ប្រធានាធិបតីអាមេរិកលោក ដូណាល់ ត្រាំ ក៏បានគំរាមដាក់ទណ្ឌកម្មបន្ទាប់បន្សំលើប្រេងរុស្ស៊ី ប្រសិនបើការឈ្លានពានរបស់ទីក្រុងមូស្គូនៅតែបន្ត ទោះបីជាវិធានការបែបនេះមិនទាន់ត្រូវបានអនុម័តក៏ដោយ។

លោក Peskov បានទទូចថា ការដាក់ទណ្ឌកម្ម «បានប្រែទៅជាគ្មានប្រយោជន៍ទាល់តែសោះ ទាក់ទងនឹងការដាក់សម្ពាធលើប្រទេសរុស្ស៊ី»។

ទោះបីជាមានការបដិសេធរបស់ទីក្រុងមូស្គូក៏ដោយ ការដាក់ទណ្ឌកម្មពិត​ជា​ធ្វើ​ឲ្យ​ប៉ះពាល់​ដល់​​សេដ្ឋកិច្ចរបស់រុស្ស៊ី។ វិធានការនេះបានកាត់បន្ថយពាណិជ្ជកម្មជាមួយដៃគូអន្តរជាតិ និងបានបង្ខំ​ឲ្យ​វិមានក្រឹមឡាំង ពឹងផ្អែកយ៉ាងខ្លាំងលើការលក់ប្រេងបញ្ចុះតម្លៃ ដើម្បីរក្សាប្រាក់ចំណូល។ បន្ទាប់ពីការកើនឡើង​នៃ​ការ​ចំណាយ​ក្នុង​វិស័យការពារជាតិ ឥឡូវនេះសេដ្ឋកិច្ច​រុស្ស៊ី​ប្រឈមមុខនឹងកំណើន​យឺតយ៉ាវ អតិផរណាខ្ពស់ខ្លាំង និង​ការ​កើន​ឡើង​អត្រាការប្រាក់។

យ៉ាងណាក៏ដោយ ប្រធានាធិបតីរុស្ស៊ី លោក វ្ល៉ាឌីមៀរ ពូទីន មិនបានបង្ហាញ​សញ្ញា​ពីការចង់​បញ្ឈប់សង្រ្គាមនោះទេ។ លោកបានបដិសេធម្តងហើយម្តងទៀត ក្នុងការចូលរួមកិច្ចប្រជុំដោយផ្ទាល់ដែលបានស្នើឡើងជាមួយប្រធានាធិបតីអ៊ុយក្រែនលោក វ៉ូឡូឌីមៀរ​ ហ្សេលេនស្គី ទោះបីជាមានការខិតខំប្រឹងប្រែងដោយលោក ត្រាំ ក្នុងការសម្រប​សម្រួល​ឲ្យ​មាន​កិច្ច​ចរចាដោយផ្ទាល់ក៏ដោយ។

ក្នុង​ប៉ុន្មាន​សប្តាហ៍​ថ្មីៗ​នេះ កងកម្លាំង​រុស្ស៊ី​បាន​បង្កើន​ការ​វាយ​ប្រហារ​លើ​ទីក្រុង​នានា​របស់​អ៊ុយក្រែន។ តួ​យ៉ាង​ដូច​ជា​​កាលពី​យប់​ថ្ងៃទី​៧​ខែកញ្ញា ទីក្រុងមូស្គូបានបើកការវាយប្រហារដោយយន្តហោះគ្មានមនុស្សបើកដ៏ធំបំផុតរបស់ខ្លួន ដោយបានសម្លាប់មនុស្សយ៉ាងហោចណាស់ ៥​នាក់ និងរបួស ៤៤​នាក់ ព្រម​ទាំង​បំផ្លាញ​អគារ​រដ្ឋាភិបាល​ក្រុង​កៀវ​ជា​លើក​ដំបូង​ផង​ដែរ។

ការកើនឡើងនេះបានជំរុញ​ឲ្យ​មានការអំពាវនាវជាថ្មីពីទីក្រុង​កៀវ សម្រាប់សកម្មភាពដ៏តឹងរ៉ឹងរបស់លោកខាងលិច។ លោក ហ្សេលេនស្គី បាននិយាយបន្ទាប់ពីការវាយប្រហារថា «អ៊ុយក្រែនកំពុងពឹងផ្អែកលើប្រតិកម្មខ្លាំងពីអាមេរិក។ នេះគឺជាអ្វីដែល​យើង​ត្រូវការ»។

ពាក់ព័ន្ធ​នឹង​បញ្ហា​នេះ​​ លោក ត្រាំ បានស្នើថា លោកត្រៀមខ្លួនរួចជាស្រេចដើម្បីផ្តួចផ្តើម «ដំណាក់កាលទីពីរ» នៃទណ្ឌកម្មដែលផ្តោតលើសេដ្ឋកិច្ច និងវិស័យថាមពលរបស់រុស្ស៊ី ដែលជាសញ្ញាបង្ហាញពីការខកចិត្តរបស់សហរដ្ឋអាមេរិកចំពោះការវាយប្រហារ​ជា​បន្ត​បន្ទាប់​របស់ទីក្រុងមូស្គូលើ​ហេដ្ឋារចនាសម្ព័ន្ធ​ស៊ីវិល​នៅ​អ៊ុយក្រែន៕

ដោយ៖ ឈាង