ធ្ងន់ហើយ! PSG ជួបបញ្ហា ខ្សែប្រយុទ្ធសំខាន់ៗរបួសដល់ ៥ នាក់ មុនការប្រកួត UCL ស្អែកនេះ

ក្លិប Paris Saint-Germain កំពុងជួបបញ្ហាធំ ជាមួយខ្សែប្រយុទ្ធសំខាន់ៗរបស់ខ្លួនដល់ទៅ ៥ នាក់ បានទទួលរងរបួស មុនការប្រកួតពានរង្វាន់ Champions League វគ្គ League Phase មកដល់។

ជាការពិត ក្រុមអ្នកមាន PSG គឺមានកាលវិភាគប្រកួតយ៉ាងមមាញឹកសម្រាប់រដូវកាលនេះ ដោយនៅថ្ងៃស្អែកទី ១៧ ខែ កញ្ញា ឆ្នាំ ២០២៥ ពួកគេនឹងត្រូវជួបជាមួយក្រុម Atalanta BC ក្នុងពាន UCL។ លុះនៅថ្ងៃ អាទិត្យ យប់រំលង អាធ្រាត្រឈានចូលថ្ងៃ ចន្ទ ទី ២២ ខែ កញ្ញា ពួកគេត្រូវជួបជាមួយក្រុមខ្លាំង Marseille ក្នុងក្របខណ្ឌ Ligue1 របស់ បារាំង។ ដោយឡែកការប្រកួតដ៏តឹងតែងបំផុត គឺពួកគេនឹងត្រូវជួបជាមួយក្រុម Barcelona ក្នុងពាន UCL នៅថ្ងៃទី ២ ខែ តុលា ឆ្នាំ ២០២៥។

យ៉ាងណា មុនការប្រកួតសំខាន់ៗមកដល់ ក្រុម PSG ហាក់កំពុងព្រួយបារម្ភខ្លាំងអំពីស្ថានភាពរបួសកីឡាករ​របស់​ខ្លួន។ ក្នុងនោះ Ousmane Dembele និង Desire Doue បានរងរបួសអំឡុងពេលលេងឱ្យក្រុមជម្រើសជាតិ បារាំង ហើយអ្នកទាំងពីរត្រូវបានគេបញ្ជាក់ ថា មានបញ្ហារបួសសាច់ដុំ ត្រូវសម្រាករយៈពេល ៣ ទៅ ៤ សប្តាហ៍។

ដោយឡែកថ្មីៗនេះ មានកីឡាករ ២ នាក់ផ្សេងទៀតបានរងរបួស អំឡុងពេលជ័យជម្នះទល់នឹងក្រុម Lens កាលពីថ្ងៃ អាទិត្យ កន្លងទៅ ដូចជាខ្សែប្រយុទ្ធស្លាប Khvicha, Kvaratskhelia, Lee Kang-in និងកីឡាករ Lucas Beraldo។ ទោះបីជាយ៉ាងណា ស្ថានភាពរបួសរបស់កីឡាករទាំង ៣ នាក់នេះ គឺពុំទាន់ត្រូវបានបញ្ជាក់នៅឡើយទេ ថា ពួកគេមានបញ្ហារបួសអ្វី នឹងត្រូវសម្រាករយៈពេលប៉ុន្មាន៕

ប្រែសម្រួល៖ សេម កុសល
ប្រភព៖ RFI