រដ្ឋបាលខេត្តស្ទឹងត្រែង បានសេចក្ដីប្រកាសព័តមាន ចុះថ្ងៃទី២០ ខែមីនា ឆ្នាំ២០២៣ ដោយមានសេចក្ដីថា រដ្ឋបាលខេត្តស្ទឹងត្រែង មានកិត្តិយសសូមជម្រាបជូនសាធារណជនទាំងក្នុងស្រុក និងក្រៅស្រុក ព្រមទាំងអ្នកសារព័ត៌មានជាតិ អន្តរជាតិ មេត្តាជ្រាបថា ក្រោយពីបានតាមដាន និងឃើញថា មានករណីបង្ហោះព័ត៌មានលើបណ្ដាញសង្គម Facebook នៃគេហទំព័រ The Cambodia Daily ដែលបានចុះផ្សាយជាអត្ថបទ “សារព័ត៌មានអន្តរជាតិមួយបានលាតត្រដាងថា ឧត្តមសេនីយ៍ ផ្កាយបី នៃក្រសួងមហាផ្ទៃដែលមានឈ្មោះឧកញ៉ា ម៉ឹក សុផាន់ណារ៉េត ឬហៅថា ឧកញ៉ាជ័យ គឺជាបណ្តាញរកស៊ីឈើខុសច្បាប់របស់ លោក ហ៊ុន ម៉ាណែត ដែលកំពុងប្រកបអាជីវកម្មឈើខុសច្បាប់នៅខាងក្រៅព្រំដែនដីសម្បទានក្នុងខេត្តស្ទឹងត្រែង យ៉ាងអនាធិបតេយ្យសព្វថ្ងៃនេះ ដោយគ្មានអាជ្ញាធរណាម្នាក់ហ៊ានប៉ះពាល់ឡើយ” ចុះផ្សាយនៅថ្ងៃទី១៦ ខែមីនា ឆ្នាំ២០២៣ និងសារព័ត៌មាន អន្តរជាតិ Mongabay បានផ្សាយថា “Cambodian prison official suspected in massive legalized logging operation” ចុះផ្សាយនៅថ្ងៃទី០៨ ខែមីនា ឆ្នាំ២០២៣ ក្នុងន័យនេះអាចធ្វើឱ្យ សាធារណជនយល់ច្រឡំមកលើថ្នាក់ដឹកនាំ ដែលការពិតនោះពុំមែនដូច្នោះឡើយ។

រដ្ឋបាលខេត្តស្ទឹងត្រែង សូមធ្វើការបំភ្លឺជូនសាធារណជនមេត្តាជ្រាបថា ទីតាំងរូបភាពដូចនៅ លើគេហទំព័រទាំងពីរខាងលើបានចុះផ្សាយ គឺជាទីតាំងក្រុមហ៊ុន ធី អេស អឹម ដាប់ប៊ែលយូ ឯ.ក (T.S .M.W Co., Ltd.) ដោយក្រុមហ៊ុននេះបានទទួលលិខិតលេខ ១៨១ សជណ ចុះថ្ងៃទី១១ ខែមីនា ឆ្នាំ២០២២ របស់ទីស្តីការគណៈរដ្ឋមន្ត្រី ស្តីពីការផ្ដល់សំណងនូវផ្ទៃដីទំហំ ៩ ៧៨៨ហិកតា ៨៨៨សង់ទីអា ជាសម្បទានដីសេដ្ឋកិច្ច ជូនក្រុមហ៊ុនសម្រាប់ធ្វើការវិនិយោគ ដែលមានឈ្មោះ លោក សូ សារ៉ាន ជាអភិបាលក្រុមហ៊ុន និងជាអ្នកទទួលខុសត្រូវ។ ជាក់ស្ដែងមិនមានឈ្មោះ ឧកញ៉ ម៉ឹក សុផាន់ណារ៉េត ឬហៅថា ឧកញ៉ាជ័យ ជាឧត្តមសេនីយ៍ផ្កាយបីនៃក្រសួងមហាផ្ទៃនោះឡើយ។

រដ្ឋបាលខេត្តស្ទឹងត្រែង សូមធ្វើការបំភ្លឺ និងបដិសេធន៍ទាំងស្រុងថា ការផ្សព្វផ្សាយអត្ថបទ ព័ត៌មានខាងលើនេះ គឺជាការមួលបង្កាច់ ប្រឌិតរឿង និងបំផ្លើសបំភ្លៃការពិត និងមានគោលបំណង ប្រែក្លាយឱ្យទៅជាបញ្ហានយោបាយ ដើម្បីតែផលប្រយោជន៍របស់ក្រុមខ្លួនប៉ុណ្ណោះ។ រដ្ឋបាលខេត្ត ស្ទឹងត្រែង សូមប្រកាសច្រានចោលទាំងស្រុងនូវព័ត៌មានដែលមានចរិតពិសពុល និងប្រកបដោយ ឧបាយកលទុច្ចរិតខាងលើនេះ និងសូមថ្កោលទោសដល់ជន និងក្រុមមួយចំនួនដែលបានប្រព្រឹត្ត និងនៅពីក្រោយករណីនេះ ព្រមទាំងសូមអំពាវនាវដល់ស្ថាប័នមានសមត្ថកិច្ចចាត់វិធានការតាមផ្លូវ ច្បាប់ចំពោះជនទាំងនោះឱ្យបានម៉ឺងម៉ាត់បំផុត៕