វិធីសាស្ត្រព្យាបាលដោយញើស ដែលជាបច្ចេកវិទ្យាថ្មីទំនើបចុងក្រោយរបស់ម៉ាឡេស៊ី ត្រូវបាននាំមកដល់កម្ពុជាហើយ

វិធីសាស្ត្រព្យាបាលដោយញើស ដែលជាបច្ចេកវិទ្យាថ្មីទំនើបចុងក្រោយរបស់ប្រទេសម៉ាឡេស៊ី និងកូរ៉េ ត្រូវបាននាំមកកាន់ប្រទេសកម្ពុជាហើយ ដើម្បីចូលរួមលើកកម្ពស់សុខភាពប្រជាពលរដ្ឋកាន់តែប្រសើរ ខណៈបច្ចុប្បន្នជំងឺឆ្លង និងជំងឺមិនឆ្លង បានក្លាយជាបញ្ហាសុខភាពសាធារណៈមួយនៅក្នុងប្រទេសកម្ពុជា។

ថ្លែងនៅក្នុងពិធីចុះហត្ថលេខាជាផ្លូវការជាមួយម្ចាស់ហ្វេ្រនឆាយនៃមជ្ឈមណ្ឌលសុខភាព A. Sweat នៅព្រឹកថ្ងៃទី២០ កម្ភៈនេះ កញ្ញា សនស៊ីថាបុទម នាយិកាប្រតិបត្តិនៃមជ្ឈមណ្ឌលសុខភាព A. Sweat ប្រចាំប្រទេសកម្ពុជា បានមានប្រសាសន៍ថា នេះជាលើកទី១ហើយ ដែលកម្ពុជាមានមជ្ឈមណ្ឌលសុខភាព A. Sweat ដែលជាម៉ាកយីហោថ្មីមួយនាំចូលមកពីប្រទេសម៉ាឡេស៊ី ដែលផ្តោតទៅលើការព្យាបាលដោយញើស ជាវិធីសាស្ត្រមួយដែលអនុវត្តតាមបែបប្រពៃណីរបស់កូរ៉េ ដើម្បីលើកកម្ពស់សុខភាពកាន់តែប្រសើរឡើង។

កញ្ញាបានបន្តថាការនាំយកមជ្ឈមណ្ឌលសុខភាព A. Sweat មកកម្ពុជានាពេលនេះ ដោយសារបច្ចុប្បន្នប្រជាពលរដ្ឋកម្ពុជាមានការចាប់អារម្មណ៍ និងយកចិត្តទុកខ្លាំងទៅលើការថែទាំសុខភាព ហើយមជ្ឈ មណ្ឌលនេះជាជំរើសដ៏ល្អមួយសម្រាប់ថែរក្សាសុខភាពបានគ្រប់វ័យ ដោយគ្រាន់តែបងប្អូនចូលទៅក្នុងបន្ទប់កម្តៅចេញពីដីមានស៊ីតុណ្ហភាព ៤៥អង្សា ដោយប្រើរយៈពេល ៤៥នាទី អាចកាត់បន្ថយកាឡូរី៦០០ ស្មើនឹងការដើរ ១០គីឡូម៉ែត្រ ដែលផ្ទុយពីការស្ទីមសូណាមិនអាចគ្រប់គ្រងស៊ីតុណ្ហភាពឬកម្តៅបានឡើយ។ លើសពីនេះវាអាចជួយបន្សាបជាតិពុលក្នុងរាងកាយ និងធ្វើឱ្យឈាមរត់បានល្អ កាត់បន្ថយស្ត្រេស និងធ្វើឱ្យអារម្មណ៍ស្រស់ ស្រាយពង្រឹងប្រព័ន្ធរំលាយអាហារ និងពង្រឹងប្រព័ន្ធការពាររាងកាយ បំបាត់ស្ត្រេស ពិសេសធ្វើឱ្យស្បែក ស ភ្លឺថ្លាបែបធម្មជាតិផងដែរ។

លោកស្រី សន បូល័ក ម្ចាស់ភាគហ៊ុននៃមជ្ឈមណ្ឌលសុខភាព A. Sweat ប្រចាំកម្ពុជា បានលើកទឹកចិត្តដល់អ្នកវិនិយោគដែលមិនទាន់ធ្វើអាជីវកម្មលើផ្នែកនេះ ឬមានរួចហើយ អាចបន្ថែមសេវាកម្មនេះទៅក្នុងកន្លែងរបស់ខ្លួនបានផងដែរ ហើយតាមគម្រោងយើងនឹងពង្រីកសេវាកម្មការព្យាបាលដោយញើសនេះនៅទូទាំងប្រទេសដើម្បីឱ្យប្រជាពលរដ្ឋបានប្រើប្រាស់សេវានេះឱ្យកាន់តែទូលំទូលាយ។

លោក ចេង រួ តាយ ស្ថាបនិកនៃមជ្ឈមណ្ឌលសុខភាព A. Sweat មកពីប្រទេសម៉ាឡេស៊ី បានមានប្រសាសន៍ថា ការចាប់យកប្រទេសកម្ពុជាជាដៃគូនេះ ដោយសារប្រទេសកម្ពុជា ជាប្រទេសមានសក្តានុពល និងកំពុងរីកចម្រើនខ្លាំង ហើយលោកមានជំនឿថាការសហការនេះនឹងទទួលបានជោគជ័យដូចនៅប្រទេសម៉ាឡេស៊ី ដែលបច្ចុប្បន្ននេះមាន៥សាខា បន្ទាប់ពីបើកនៅខែមិថុនាឆ្នាំ២០២៤ កន្លងទៅ ហើយគ្រោងពង្រីកដល់១០សាខា ខណៈប្រទេសកម្ពុជាជាសាខាទី១ នៅក្រៅប្រទេស៕

អត្ថបទពាណិជ្ជកម្ម