វប្បធម៌ ជំនឿ
ក្រសួងធម្មការក្រើនរំលឹករៀបចំបុណ្យមាឃបូជាឱ្យអធិកអធម ប្រកបសុវត្ថិភាព
ក្រសួងធម្មការ និងសាសនា បានក្រើនរំលឹកដល់មន្ទីរធម្មការ និងសាសនា រាជធានី-ខេត្ត និងគ្រប់វត្តឱ្យរៀបចំពិធីបុណ្យមាឃបូជាដែលនឹងប្រព្រឹត្តិទៅនៅថ្ងៃទី៥-៦ ខែកុម្ភៈ ឆ្នាំ២០២៣នេះឱ្យស្របតាមទំនៀមទម្លាប់ប្រពៃណីជាតិ និងត្រូវអនុវត្តតាមវិធានការសុខាភិបាល និងវិធានការដ្ឋបាលរបស់អាជ្ញាធរដែនដី។

លោក សេង សុមុនី រដ្ឋលេខាធិការ និងជាអ្នកនាំពាក្យ ក្រសួងធម្មការ និងសាសនា បានបានមានប្រសាសន៍នៅព្រឹកថ្ងៃទី៣ ខែកុម្ភៈនេះថា ឆ្នាំនេះពិធីបុណ្យមាឃបូជានឹងប្រព្រឹត្តិទៅរយៈពេល២ថ្ងៃ គឺថ្ងៃទី៥ ទី៦ ខែកុម្ភៈ ដោយរៀងរាល់ឆ្នាំ ពុទ្ធសាសនិកជនខ្មែរតែងតែប្រារព្ធធ្វើបុណ្យនេះនៅថ្នាក់ជាតិ និងគ្រប់វត្តទូទាំងប្រទេស ដោយចាត់ទុកជាការបំពេញកុសលដ៏ថ្លៃថ្លាបំផុត និងធ្វើនូវកតញ្ញូកតវេទីដល់ព្រះសាស្តាបរមគ្រូ។

ចំណែករាជរដ្ឋាភិបាល បានអនុញ្ញាតឱ្យរៀបចំកម្មវិធីបុណ្យនេះ នៅបរិវេណព្រះមហាសក្យមុនីចេតិយ ភ្នំព្រះរាជទ្រព្យ (ឧត្ដុង្គ) ស្ថិតនៅស្រុកពញាឮ ខេត្តកណ្តាល ដោយមានថ្នាក់ដឹកនាំជាន់ខ្ពស់រាជរដ្ឋាភិបាល មន្ត្រីរាជការ និងពុទ្ធបរិស័ទចូលរួមបំពេញកុសលតាមប្រពៃណីព្រះពុទ្ធសាសនាខ្មែរស្របតាមរដ្ឋធម្មនុញ្ញ នៃព្រះរាជាណាចក្រកម្ពុជា។

លោកបានបន្តថា សម្រាប់បុណ្យមាឃបូជាឆ្នាំនេះ ក្រសួងបានទូលថ្វាយ-ប្រគេន ព្រះថេរានុត្ថេរៈគ្រប់ព្រះអង្គ និងណែនាំទៅគ្រប់ប្រធានមន្ទីរធម្មការ និងសាសនារាជធានី-ខេត្ត ត្រូវណែនាំគ្រប់វត្ត ឱ្យរៀបចំពិធីបុណ្យមាឃបូជា ឱ្យស្របតាមទំនៀមទម្លាប់ប្រពៃណីជាតិ និងជ្រើសតាំងវត្តណាមួយក្នុងរាជធានី-ខេត្ត ប្រារព្ធពិធីបុណ្យនេះជាផ្លូវការ។
ក្រសួងបានណែនាំដល់គ្រប់វត្តឱ្យសម្អាតទីធ្លាក្នុងវត្តទាំងមូល និងជាពិសេសកន្លែងសក្ការបូជារបស់ពុទ្ធបរិស័ទ ព្រមទាំងតុបតែងលម្អដោយទង់ជាតិ ទង់ព្រះពុទ្ធសាសនា ទង់ព្រះមហាក្សត្រ បដាពាក្យស្លោក ដើម្បីអបអរសាទរក្នុងពិធីបុណ្យនេះ។ ទន្ទឹមនឹងនេះត្រូវសហការជាមួយអាជ្ញាធរដែនដីគ្រប់លំដាប់ថ្នាក់ ដើម្បីការពារសុវត្ថិភាពនៅក្នុងពិធីបុណ្យ និងអំពាវនាវ សប្បុរសជន ពុទ្ធបរិស័ទប្រជាពលរដ្ឋចូលរួមបំពេញកុសលតាមសទ្ធាជ្រះថ្លាដើម្បីជាគុណប្រយោជន៍ដល់ ការថែរក្សានូវអត្តសញ្ញាណជាតិ ប្រពៃណីព្រះពុទ្ធសាសនា និងអនុមោទនាយកផល្លានិសង្សរៀងៗខ្លួន។

គួរបញ្ជាក់ថា បុណ្យមាឃបូជា គឺជាបុណ្យមួយក្នុងបណ្តាបុណ្យធំៗទាំងឡាយក្នុងព្រះពុទ្ធសាសនា ហើយប្រទេសដែលកាន់ព្រះពុទ្ធសាសនាលើសកលលោកតែងតែប្រារព្ធធ្វើជារៀងរាល់ឆ្នាំពុំដែលខកខាន។ ពិធីនេះប្រារព្ធធ្វើឡើងដើម្បីរម្លឹកដល់ថ្ងៃពេញបូណ៌មីខែមាឃ ជាថ្ងៃប្រជុំចតុរង្គសន្និបាតសម្តែងឱវាទប្បាតិមោក្ខ និងថ្ងៃដែលព្រះពុទ្ធអង្គប្រជុំប្រកាសដាក់កំណត់ព្រះជន្មាយុសង្ខារ៕
អត្ថបទ៖ សំអឿន
-
ជីវិតកម្សាន្ដ១ សប្តាហ៍ មុន
ប៉ូលិសរកឃើញ ក្បាលនិងឆ្អឹងជំនីរ តារាស្រីហុងកុង នៅក្នុងឆ្នាំងស៊ុប
-
ជីវិតកម្សាន្ដ៦ ថ្ងៃ មុន
រៀមច្បង Anne បង្ហោះរូបជាមួយ Patricia ក្នុងន័យចង់មានផ្ទៃពោះដែរ
-
ជីវិតកម្សាន្ដ១ សប្តាហ៍ មុន
Bella ត្រូវមនុស្សទូទាំងប្រទេសថៃកោតសរសើរ ក្រោយនិយាយប្រយោគមួយឃ្លា
-
ជីវិតកម្សាន្ដ១ សប្តាហ៍ មុន
មហាជនរិះគន់ Margie ក្រោយ Bella ក្លាយជាផ្ទាំងស៊ីប ដែលនាងមិនចង់រួមការងារជាមួយ
-
ជីវិតកម្សាន្ដ៧ ថ្ងៃ មុន
រូបរាងរបស់ Janie កំពុងរងការរិះគន់ថា ដូចមនុស្សទាស់សរសៃ
-
ជីវិតកម្សាន្ដ៦ ថ្ងៃ មុន
ទម្លាយទ្រព្យសម្បត្តិរបស់ Janie ដែលខំរកដោយដៃឯង
-
ជីវិតកម្សាន្ដ១ សប្តាហ៍ មុន
តារាប្រុសម្នាក់ ធ្វើអត្តឃាតសម្លាប់ខ្លួនទាំងវ័យក្មេង ដោយសារជំងឺផ្លូវចិត្តធ្ងន់ធ្ងរ
-
ជីវិតកម្សាន្ដ៥ ថ្ងៃ មុន
ផ្ទុះកាន់តែធំ! មនុស្សម្នាក់ព្រមាន Bella កុំសេពគប់ជាមួយក្រុមតារាស្រីស្អាត