ព័ត៌មានជាតិ

លោករដ្ឋមន្ត្រី ចាយ បូរិន ណែនាំឱ្យពង្រឹងការត្រួតពិនិត្យលើសកម្មភាពយកសាសនាទៅបោកប្រាស់ពលរដ្ឋ

បានផុស

៤ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

រដ្ឋមន្ត្រីក្រសួងធម្មការ និងសាសនា លោក ចាយ បូរិន បានណែនាំទៅស្ថាប័នក្រោមឱវាទឱ្យពង្រឹងការតាមដាន និងគ្រប់គ្រងរាល់សកម្មភាពសាសនាទាំងអស់ដែលខុសច្បាប់ ឬធ្វើសកម្មភាពប្រើប្រាស់ជំនឿដើម្បីបោកប្រាស់ប្រជាពលរដ្ឋ។ ការលើកឡើងរបស់លោករដ្ឋមន្ត្រី ចាយ បូរិន ធ្វើឡើងក្នុងពេលក្រសួងបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងទិសដៅការងារឆ្នាំ២០២៦ នៅសាលសន្និសីទចតុម្មុខរសៀលថ្ងៃទី២៦ ខែកុម្ភៈ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានលើកឡើងថាដោយជំរុញឱ្យមានការពង្រឹងលើតួនាទីសាសនាដែលមាននាទីផ្សព្វផ្សាយនូវសាសនូវាទ ធ្វើឱ្យប្រជាជនកម្ពុជា មានបញ្ញាស្មារតីប្រកបដោយព្រហ្មវិហារធម៌ កាត់បន្ថយអំពើអនាចារ អបាយមុខ អំពើហិង្សា អសីលធម៌ និងចូលរួមជួយឱ្យសង្គមជាតិមានសុខដុមរមនា និងពង្រឹងសាមគ្គីធម៌។

លោកក៏បានណែនាំទៅអគ្គនាយកដ្ឋានកិច្ចការសាសនានៃក្រសួងធម្មការ ពង្រឹងការតាមដាន និងគ្រប់គ្រងរាល់សកម្មភាពសាសនាដែលខុសច្បាប់ ឬសកម្មភាពដែលឆ្លៀតឱកាសប្រើប្រាស់ជំនឿដើម្បីបោកប្រាស់ប្រជាពលរដ្ឋផងដែរ។

នាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត កាលពីខែឧសភា ឆ្នាំ២០២៥ ធ្លាប់បានលើកឡើងក្នុងកិច្ចប្រជុំគណៈរដ្ឋមន្ត្រីដោយបានណែនាំទៅក្រសួងធម្មការ និងសាសនា គ្រប់គ្រងអ្នកដែលអះអាងថាមានបារមីឱ្យបានត្រឹមត្រូវបន្ទាប់ពីឃើញមាននិន្នាការកើនឡើងកាន់តែច្រើន។ សម្ដេចបានបញ្ជាក់ថាជំនឿសាសនាគឺជាសិទ្ធិបុគ្គលម្នាក់មិនខុសច្បាប់ទេ តែក្នុងករណីដែលយកសាសនាដើម្បីធ្វើអាជីវកម្ម ឬឆបោកនោះគឺជាបទល្មើស៕