ការនាំចេញផ្លែស្រកានាគវៀតណាម ធ្លាក់ចុះដល់កម្រិតទាបបំផុតក្នុងរយៈពេលជាង១០ឆ្នាំ

ការនាំចេញផ្លែស្រកានាគរបស់ប្រទេសវៀតណាម ដែលធ្លាប់​កើនដល់ជាង ១ ប៊ីលានដុល្លារ/ឆ្នាំៗ ​បានធ្លាក់ចុះដល់កម្រិតទាបបំផុតក្នុងរយៈពេល ១១ ឆ្នាំ។ នេះបើតាមការចុះផ្សាយរបស់កាសែត VnExpress។

យោងតាមគយវៀតណាម ការនាំចេញក្នុងរយៈពេល ១១ ខែ​ដើម​ឆ្នាំ ២០២៥ បានធ្លាក់ចុះ ០,៨% មកនៅត្រឹម ៤៨៥,២ លានដុល្លារ ដែលជាកម្រិតទាបបំផុតចាប់តាំងពីឆ្នាំ ២០១៤។

ចន្លោះឆ្នាំ ២០១៤-២០១៨ ការនាំចេញផ្លែស្រកានាគវៀតណាម កើនលើស ១ ​ប៊ីលានដុល្លារ/ឆ្នាំ ដោយនៅឆ្នាំ ២០១៨ កើនដល់រហូតដល់ទៅ ១,៣ ប៊ីលាន​ដុល្លារ។ ​

ចាប់តាំងពីពេលនោះមក ការនាំចេញផ្លែស្រកានាគបានចាប់ផ្តើមនៅទ្រឹង និងធ្លាក់ចុះ ដោយសារកម្សោយតម្រូវការ និងការប្រកួតប្រជែងអន្តរជាតិ។ ចិននៅតែជា​ទីផ្សារធំបំផុតសម្រាប់ផ្លែស្រកានាគវៀតណាម ​ប៉ុន្តែទីផ្សារនេះបាន​ធ្លាក់ចុះ ខណៈចិន​បង្កើនការផ្គត់ផ្គង់ដោយខ្លួនឯង។ ​

ពាក់ព័ន្ធនឹង​ការប្រកួតប្រជែង ឥណ្ឌា​ចាប់ផ្ដើម​បង្កើនការដាំផ្លែស្រកានាគ ខណៈ​​ម៉ិកស៊ិកក៏ដូចគ្នា ដោយ​ដណ្ដើមទីផ្សារវៀតណាម​នៅសហរដ្ឋអាមេរិក និងកាណាដា៕​