តម្លៃប្រេងអន្តរជាតិ​ស្ទុះឡើងវិញ ជុំវិញភាពតានតឹងភូមិសាស្រ្តនយោបាយ

តម្លៃប្រេងអន្តរជាតិ​ស្ទុះងើបឡើងវិញនៅសប្ដាហ៍នេះ ជុំវិញភាពតានតឹងភូមិសាស្រ្តនយោបាយ ដែលអាចរំខានការផ្គត់ផ្គង់ប្រេង ទោះបីជាកំណើនតម្លៃនៅមាន​កំណត់ក្ដី។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក Brent បានកើនឡើង ៥៣ សេន ឬ ០,៨% ដល់ ៦៣,៨៧ ដុល្លារ/បារ៉ែល នៅពេលបិទការជួញដូរនៅថ្ងៃចន្ទ។ ដោយឡែកតម្លៃប្រេងឆៅអាមេរិក ម៉ាក​ West Texas Intermediate (WTI) ឯណោះវិញ បាន​កើនឡើង​ ៣៨ សេន ឬ ០,៦% ដល់ ៥៩,៥០ ដុល្លារ/បារ៉ែល។

នេះគឺជាតម្លៃបិទខ្ពស់បំផុតសម្រាប់ប្រេងម៉ាក Brent រាប់តាំងពីថ្ងៃទី ១៨ វិច្ឆិកា និងសម្រាប់ WTI ចាប់តាំងពីថ្ងៃទី ៥ ធ្នូ។

​តម្លៃប្រេងទាំង២ បាន​បន្តកើនឡើងបន្ថែមទៀត សម្រាប់ការជួញដូរនៅថ្ងៃអង្គារនេះ។ តម្លៃប្រេង WTI កើនឡើង ៣៥ សេន ដល់ ៥៩,៧១ ដុល្លារ/បារ៉ែល និង Brent កើនឡើង ៣៥ សេន ដល់ ៦៤,១០ ដុល្លារ/បារ៉ែល។ ​

អ្នកវិភាគទីផ្សារបាន​គូសភ្ជាប់កំណើននេះ ទៅនឹង​ភាពតានតឹងភូមិសាស្រ្តនយោបាយ ក្រោយប្រធានាធិបតីអាមេរិក លោក ដូណាល់ ត្រាំ គំរាមប្រើកម្លាំងយោធាប្រឆាំងអ៊ីរ៉ង់ ក្រោយអាជ្ញាធរអ៊ីរ៉ង់បង្រ្កាបលើក្រុមបាតុករដែលតវ៉ាលើបញ្ហាសេដ្ឋកិច្ច ដោយសម្លាប់មនុស្សយ៉ាងហោចណាស់ ៥០០ នាក់ គិតត្រឹមថ្ងៃចន្ទ។

អ៊ីរ៉ង់ដែលជាសមាជិក OPEC (អង្គការនៃប្រទេសនាំចេញប្រេងកាត) បានរងទណ្ឌកម្មសេដ្ឋកិច្ចរបស់លោក​ខាងលិចជាយូរឆ្នាំមកហើយ ដែលធ្វើឱ្យប្រទេសនេះពិបាកនាំចេញទៅទីផ្សារសកល។ យ៉ាងណាមិញ ប្រទេសនេះនៅតែដើរតួនាទីសំខាន់ក្នុងការផ្គត់ផ្កង់ តាមរយៈទំនាក់ទំនងពាណិជ្ជកម្មប្រទេសសំខាន់ៗ រួមទាំងចិន ដែលជាអតិថិជនសំខាន់មួយសម្រាប់ប្រេងរបស់អ៊ីរ៉ង់។

ការវាយប្រហាររបស់អ៊ុយក្រែនលើហេដ្ឋារចនាសម្ព័ន្ធថាមពលរុស្ស៊ី ដែលជាប្រទេសផ្គត់ផ្គង់ប្រេងសំខាន់ ក៏រួមចំណែកដល់កំណើនតម្លៃផងដែរ។

ទោះបីជាយ៉ាងនេះក្ដី កំណើនតម្លៃប្រេងនៅតែមាន​កម្រិត ដោយ​គេរំពឹងថា វ៉េណេស៊ុយអេឡា នឹង​បើកការផ្គត់ផ្គង់ជាថ្មី ក្រោយរអាក់រអួលជុំវិញការចាប់ខ្លួនប្រធានាធិបតី នីកូឡាស ម៉ាឌូរូ របស់សហរដ្ឋអាមេរិក។ លោក ត្រាំ បានប្រកាសគ្រប់គ្រងប្រេងរបស់វ៉េណេស៊ុយអេឡា ហើយអះអាងថា ប្រទេសនេះព្រមព្រៀងផ្គត់ផ្គង់ប្រេង ៥០ លាន​បារ៉ែល ឱ្យអាមេរិក។

នៅខណៈនេះ វិនិយោគិននៅបន្តឃ្លាំមើលគោលនយោបាយហិរញ្ញវត្ថុរបស់ធនាគារកណ្ដាលសហព័ន្ធអាមេរិក ក៏ដូចជា បញ្ហាផ្គត់ផ្គង់លើសតម្រូវដែលកំពុងកើនឡើង ចំពេលតម្រូវការសកលខ្សោយ ជុំវិញភាពស្រពេចស្រពិលសេដ្ឋកិច្ច៕