តម្លៃប្រេងអន្តរជាតិ​កើនឡើង ជុំវិញភាពវិជ្ជមាននៃទិន្នន័យសេដ្ឋកិច្ចចិន​

តម្លៃប្រេងអន្តរជាតិ បាន​កើនឡើងបន្តិចសម្រាប់ការជួញដូរលើទីផ្សារអាស៊ីនៅព្រឹកថ្ងៃអង្គារនេះ ក្រោយទិន្នន័យសេដ្ឋកិច្ច​ចិន​បង្ហាញពីដំណើរការល្អជាងការរំពឹងទុក ​ខណៈវិនិយោគិនបន្តឃ្លាំមើលស្ថានការណ៍ពាក់ព័ន្ធបញ្ហាហ្រ្គីនឡែន ក្រោយប្រធានាធិបតីអាមេរិក លោក ដូណាល់ ត្រាំ គំរាមដាក់ពន្ធលើបណ្ដាប្រទេសនៅអឺរ៉ុបធំៗមួយចំនួន។ ​នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងឆៅនាពេលអនាគត ម៉ាក Brent ​បាន​កើនឡើង ១៩ សេន ឬ ០,៣% ដល់ ៦៤,១៣ ដុល្លារ/បារ៉ែល គិតត្រឹមម៉ោង​ប្រហែល ៩ ព្រឹក នៅទីក្រុងហុងកុង។ ​ដោយឡែកតម្លៃប្រេងអាមេរិក ម៉ាក​ West Texas Intermediate (WTI) បានកើនឡើង ២៥ សេន ឬ ០,៤% ពីតម្លៃបិទនៅថ្ងៃសុក្រសប្ដាហ៍មុន ដល់ ៥៩,៦៩ ដុល្លារ/បារ៉ែល។ WTI មិនបាន​ជួញដូរនៅថ្ងៃចន្ទ (១៩ មករា) ទេ ដោយសារតែចំថ្ងៃឈប់សម្រាកនៅអាមេរិក​។

អ្នកជំនាញគូសភ្ជាប់កំណើនតម្លៃប្រេង ទៅនឹង​ភាពវិជ្ជមាន​នៃសេដ្ឋកិច្ចចិន ដែលជះឥទ្ធិពលលើតម្រូវការប្រេងសកល។ យោងតាមទិន្នន័យដែលចេញផ្សាយនៅថ្ងៃចន្ទ សេដ្ឋកិច្ចរបស់​ចិនបានកើនឡើង ៥,០% កាលពីឆ្នាំមុន ​ដែលត្រូវតាមគោលដៅរបស់រដ្ឋាភិបាល​ចិន។ ​

ទិន្នន័យរបស់រដ្ឋាភិបាលចិនបានបង្ហាញ​ផងដែរ​ថា ទិន្នផលរោងចក្រចម្រាញ់ប្រេងរបស់​ចិនក្នុងឆ្នាំ ២០២៥ បានកើនឡើង ៤,១% បើធៀបនឹងឆ្នាំមុន ខណៈ​ទិន្នផលប្រេងឆៅបានកើនឡើង ១,៥%។ ទាំង២ សុទ្ធតែស្ថិតក្នុងកម្រិតខ្ពស់បំផុត​ក្នុងប្រវត្តិសាស្រ្តចិន។

ទោះបីជាយ៉ាងណាក៏ដោយ កំណើនតម្លៃប្រេងក៏នៅតែមាន​កំណត់ ដោយសារតែការផ្ទុះឡើងជាថ្មីនៃសង្រ្គាមពាណិជ្ជកម្មអាមេរិក-សហភាពអឺរ៉ុប (EU) ក្រោមការគំរាមដាក់ពន្ធរបស់ ត្រាំ ហើយប្លុក EU ប្ដេជ្ញាវាយបក។ លោក ត្រាំ បានប្រកាសថា លោកនឹងដាក់ពន្ធបន្ថែម ១០% ចាប់ពីថ្ងៃទី ១ ខែកុម្ភៈ លើទំនិញនាំចូល​ដាណឺម៉ាក ន័រវេស ស៊ុយអែត បារាំង អាល្លឺម៉ង់ ហូឡង់ ហ្វាំងឡង់ និងអង់គ្លេស ​និងឡើងដល់ ២៥% ​នៅថ្ងៃទី ១ ខែមិថុនា ប្រសិនបើ​អាមេរិកមិនទទួល​បាន​ការអនុញ្ញាតឱ្យទិញកោះហ្រ្គីនឡែន ដែលអន្តរជាតិទទួល​ស្គាល់ថាជាដែនដីរបស់ដាណឺម៉ាក។ បណ្ដាប្រទេសនៅអឺរ៉ុបប្រឆាំងនឹង​ផែនការរបស់លោក ត្រាំ យ៉ាងដាច់អហង្ការ៕