ថៃ៖ ពាណិជ្ជកម្ម​​ព្រំដែនធ្លាក់ចុះដោយសារជម្លោះជាមួយកម្ពុជា និងសង្រ្គាមស៊ីវិលនៅមីយ៉ាន់ម៉ា​

ពាណិជ្ជកម្មតាមព្រំដែនគោក​របស់​ថៃជាមួយបណ្ដាប្រទេសជិតខាង បានធ្លាក់ចុះគួរឱ្យកត់សម្គាល់នៅឆ្នាំ ២០២៥ ដោយសារតែការប៉ះទង្គិច​ប្រដាប់អាវុធតាមព្រំដែនជាមួយ​កម្ពុជា និង​សង្រ្គាមស៊ីវិលនៅ​មីយ៉ាន់ម៉ា ដែលសុទ្ធសឹងតែជាប្រទេសអតិថិជនសំខាន់ៗរបស់ថៃ។ នេះបើតាមការចុះផ្សាយរបស់កាសែតបាងកកប៉ុស្តិ៍​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​នាយកដ្ឋាន​ពាណិជ្ជកម្មបរទេសថៃ បានឱ្យដឹង​កាលពីថ្ងៃចន្ទថា ពាណិជ្ជកម្មតាមព្រំដែនជាមួយកម្ពុជា ឡាវ ម៉ាឡេស៊ី និងមីយ៉ាន់ម៉ា នៅឆ្នាំ ២០២៥ មានចំនួនសរុប ៨៩៤ ប៊ីលានបាត ដែលបង្ហាញពីការធ្លាក់ចុះ ៨,៥% ធៀបនឹង​ឆ្នាំ ២០២៤។ យ៉ាងណាមិញ ថៃនៅតែទទួលបាន​អតិរេកពាណិជ្ជកម្ម​ ១៥០ ប៊ីលាន​បាត​ ពីប្រទេសទាំង៤។ ​

ពាណិជ្ជកម្មជាមួយកម្ពុជា មានចំនួន ៩២ ​ប៊ីលានបាត ​ដោយធ្លាក់ចុះ ៤៧,៣% ខណៈពាណិជ្ជកម្មជាមួយ​មីយ៉ាន់ម៉ា មានទំហំ ១៩៣ ប៊ីលាន​បាត ដោយធ្លាក់ចុះ ៧,៤%។ ដោយឡែកពាណិជ្ជកម្មជាមួយម៉ាឡេស៊ីវិញ បាន​កើនឡើង​ ២,៨% ដល់ ៣១៥ ​ប៊ីលានបាត ខណៈ​ពាណិជ្ជកម្ម​ជាមួយឡាវ បានកើនឡើង ២,៤% ដល់ ២៩៣ ​ប៊ីលានបាត។

លោកស្រី Arada Fuangtong អគ្គនាយកនៃនាយកដ្ឋាន​ពាណិជ្ជកម្មបរទេសថៃ បាន​និយាយថា ជម្លោះព្រំដែនប្រដាប់អាវុធ ដែលបណ្តាលឱ្យមានការបិទព្រំដែន បានរួមចំណែកដល់ការធ្លាក់ចុះនៃពាណិជ្ជកម្មថៃ-កម្ពុជានៅឆ្នាំ ២០២៥។ លោកស្រី​បន្តថា ទស្សនវិស័យសម្រាប់ឆ្នាំនេះនៅតែអាប់អួរ ដោយសារតែភាពតានតឹងជាបន្តបន្ទាប់ ដែលអាចបង្កឱ្យមានការប៉ះទង្គិចគ្នាបន្ថែមទៀត និងរារាំងដល់ការបើកច្រកព្រំដែនឡើងវិញ។

​ជាមួយគ្នានោះ លោកស្រីបានគូសបញ្ជាក់ថា ការប៉ះទង្គិចគ្នារវាងទាហានមីយ៉ាន់ម៉ា និងក្រុមប្រដាប់អាវុធជនជាតិភាគតិចក្នុងស្រុក បានធ្វើឱ្យពាណិជ្ជកម្មថៃ និងមីយ៉ាន់ម៉ា ធ្លាក់ចុះ ​ជាពិសេសក្រោយ​ស្ពានមិត្តភាពថៃ-មីយ៉ាន់ម៉ាទី២ ដែលភ្ជាប់ពីក្រុង Mae Sot ​នៃខេត្តតាក ជាមួយក្រុងម្យាវ៉ាឌី ត្រូវបានបិទនៅថ្ងៃទី១៨ ខែសីហា ឆ្នាំមុន​។ ច្រកព្រំដែន Mae Sot-Myawaddy ជាច្រកពាណិជ្ជកម្មសំខាន់រវាងប្រទេសទាំង​២​៕