ថៃស្នើនាំចេញស្បៀងទៅអ៊ីរ៉ង់ ជាថ្នូរនឹង​ការបើកច្រកឱ្យកប៉ាល់ថៃឆ្លងកាត់ច្រកហ័រមូហ្ស

រដ្ឋមន្ត្រីក្រសួងពាណិជ្ជកម្មថៃ បាន​ឱ្យដឹងថា ប្រទេសថៃកំពុងសម្លឹងមើលការនាំចេញស្បៀងអាហារ និងវត្ថុធាតុដើមទៅ​អ៊ីរ៉ង់ ​ដើម្បីជាថ្នូរនឹងការអនុញ្ញាតឱ្យកប៉ាល់របស់ខ្លួនអាចឆ្លងកាត់ច្រកហ័រមូហ្ស​ប្រកបដោយ​សុវត្ថិភាព​ពី​តំបន់ជម្លោះមជ្ឈិមបូព៌ា ដោយនាំយកមកវិញនូវ​ទំនិញគ្រាប់ប្លាស្ទិក និងជីកសិកម្ម។ នេះបើតាមការចុះផ្សាយរបស់កាសែតបាងកកប៉ុស្តិ៍កាលពីថ្ងៃអង្គារ (១៧ មីនា)។ ​

លោកស្រីរដ្ឋមន្ត្រី​ Suphajee Suthumpun បាន​និយាយនៅ​វិមានរដ្ឋាភិបាលកាលពីថ្ងៃអង្គារថា រដ្ឋាភិបាល និងវិស័យឯកជនកំពុងសម្លឹងមើលជម្រើសនានាក្នុងការស្វែងរកគ្រាប់ប្លាស្ទិក ដែលប្រើក្នុងការផលិតវេចខ្ចប់។

លោកស្រីនិយាយយ៉ាងដូច្នេះថា៖ «ប្រភពបច្ចុប្បន្ននៃគ្រាប់ប្លាស្ទិកគឺមជ្ឈិមបូព៌ា។ ក្រសួងការបរទេសត្រូវបានស្នើសុំឱ្យបញ្ចុះបញ្ចូលអ៊ីរ៉ង់ឱ្យអនុញ្ញាតឱ្យកប៉ាល់ថៃដឹកជញ្ជូនទំនិញនេះចេញ [តាមរយៈច្រកសមុទ្រ ហ័រមូហ្ស]។ វាមិនមែនជាទំនិញគ្រោះថ្នាក់ទេ ប៉ុន្តែវាជាទំនិញចាំបាច់»។ លោកស្រីបន្តថា អ៊ីរ៉ង់មិនបានផ្តល់ចម្លើយទេ ខណៈ​ស្តុក​គ្រាប់​ប្លាស្ទិក​បច្ចុប្បន្ន​នៅ​​​ថៃ​ នឹង​អស់ការផ្គត់ផ្គង់ត្រឹមចុងខែមេសា។ ​​

បើតាមរដ្ឋមន្រ្តីដដែល​ ក្រសួងពាណិជ្ជកម្ម និងក្រសួងការបរទេសថៃ កំពុងចរចាកិច្ចព្រមព្រៀង​សុំឱ្យ​កប៉ាល់ថៃ​អាចដឹកទំនិញទៅ​មជ្ឈិមបូព៌ា និងនាំយកគ្រាប់ប្លាស្ទិក និងជីមកកាន់ប្រទេសថៃវិញ។ ​ការនាំចេញអាចរួមបញ្ចូលអាហារកែច្នៃ និងវត្ថុធាតុដើមមួយចំនួន ដែល​ថៃបានចុះកិច្ចសន្យាលក់ទៅមជ្ឈិមបូព៌ា។

​លោកស្រី Suphajee កិច្ចព្រមព្រៀងបែបនេះគួរតែ​ចរចាទាំងជាមួយអ៊ីរ៉ង់ និងប្រទេសដទៃផ្សេងទៀតនៅមជ្ឈិមបូព៌ា​៕

​