ព័ត៌មានអន្ដរជាតិ

អាមេរិកគ្រោងដកទណ្ឌកម្មលើប្រេងអ៊ីរ៉ង់ ដើម្បីបន្ធូរតម្លៃប្រេងសកល

បានផុស

៣ ខែ មុន

នៅ

ថ្ងៃសុក្រ ២០ មីនា ២០២៦

ដោយ

រដ្ឋមន្ត្រីក្រសួងរតនាគារអាមេរិក លោក ស្កុតថ៍ បេសិនថ៍ (Scott Bessent) បានឱ្យដឹងកាលពីថ្ងៃព្រហស្បតិ៍ថា សហរដ្ឋអាមេរិកអាចនឹងលុបចោលទណ្ឌកម្មលើប្រេងអ៊ីរ៉ង់ដែលជាប់គាំងនៅលើសមុទ្រ ដែលជាផ្នែកមួយនៃកិច្ចប្រឹងប្រែងរបស់អាមេរិកក្នុងការកាត់បន្ថយតម្លៃប្រេងខ្ពស់ ដោយសារតែសង្រ្គាមប្រឆាំងអ៊ីរ៉ង់។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បេសិនថ៍ បានប្រាប់បណ្ដាញព័ត៌មាន Fox Business Network យ៉ាងដូច្នេះថា៖ «ក្នុងរយៈពេលប៉ុន្មានថ្ងៃខាងមុខ យើងអាចនឹងដកទណ្ឌកម្មប្រេងអ៊ីរ៉ង់ដែលនៅលើទឹក។ វាមានប្រហែល ១៤០ លានបារ៉ែល»។

លោកបានគូសបញ្ជាក់ថា ការដកទណ្ឌកម្មប្រេងអ៊ីរ៉ង់ ដើម្បីឱ្យវាចូលទៅការផ្គត់ផ្គង់សកល នឹងជួយធ្វើឱ្យតម្លៃប្រេងធ្លាក់ចុះសម្រាប់រយៈពេល ១០ ទៅ ១៤ ថ្ងៃខាងមុខ។

តម្លៃប្រេងបានជួញដូរជាង ១១០ ដុល្លារ/បារ៉ែល កាលពីព្រឹក និងរសៀលថ្ងៃព្រហស្បតិ៍ (លើទីផ្សារអាស៊ី) មុនពេលថយចុះមកវិញជាបន្តបន្ទាប់ ត្រឹម ១០៥ ដុល្លារ/បារ៉ែល នៅព្រឹកថ្ងៃសុក្រនេះ។ តម្លៃប្រេងអន្តរជាតិបានជួញដូរក្នុងរង្វង់ជាង ១០០ ដុល្លារ/បារ៉ែល អស់រយៈពេលជាច្រើនថ្ងៃហើយ ដោយសារតែការបិទច្រកសមុទ្រហ័រមូហ្សរបស់អ៊ីរ៉ង់ ដែលធ្វើឱ្យការផ្គត់ផ្គង់រងការរំខាន។

កាលពីសប្ដាហ៍មុន ក្រសួងរតនាគារអាមេរិកក៏បានដកទណ្ឌកម្មលើប្រេងរុស្ស៊ីដែលជាប់គាំងលើសមុទ្រប្រមាណ ១៣០ លានបារ៉ែល ផងដែរ ដើម្បីឱ្យប្រទេសនានាអាចធ្វើការនាំចូល។

ទន្ទឹមនឹងនោះ លោក បេសិនថ៍ បាននិយាយថា សហរដ្ឋអាមេរិកនឹងចាត់វិធានការផ្សេងទៀតដើម្បីបង្កើនការផ្គត់ផ្គង់ប្រេង រួមទាំងការបញ្ចេញស្តុកប្រេងជាឯកតោភាគីពីទុនបម្រុងប្រេងយុទ្ធសាស្ត្រ លើសពីការបញ្ចេញប្រេង ៤០០ លានបារ៉ែលរបស់ភ្នាក់ងារថាមពលអន្តរជាតិនៅសប្ដាហ៍មុន។

លោកបន្តថា ក្រសួងរតនាគារនឹង «មិន» ព្យាយាមជ្រៀតជ្រែកក្នុងទីផ្សារប្រេងនាពេលអនាគតជាដាច់ខាត ប៉ុន្តែនឹងចាត់វិធានការដើម្បីបង្កើនការផ្គត់ផ្គង់រូបវន្ត ដើម្បីប៉ះប៉ូវការរាំងស្ទះផ្លូវប្រេង ១០-១៤ លានបារ៉ែល/ថ្ងៃ នៅច្រកសមុទ្រហ័រមូហ្ស៕