ក្រៅពីការលក់សម្លៀកបំពាក់អាវធំដេរក្នុងស្រុក សហគ្រិនខ្មែរម្នាក់ចង់នាំយកផលិតផលស្នាដៃកូនខ្មែរទៅកាន់ឆាកអន្តរជាតិ

សហគ្រិនខ្មែរម្នាក់ដែលមានជំនាញខាងផលិតអាវធំផ្លូវការដេរក្នុងស្រុកមានបំណងចង់នាំយកផលិតផលស្នាដៃកូនខ្មែរទៅឆាកអន្តរជាតិ ខណៈគុណភាព និងស្ដង់ដាមិនចាញ់របស់នាំចូលពីក្រៅប្រទេស។

បច្ចុប្បន្នគេសង្កេតឃើញថា ផលិតផលដែលជាស្នាដៃកូនខ្មែរមិនថាតែសម្ភារប្រើប្រាស់ របស់របរហូបចុក ក្នុងនោះទាក់ទងទៅនឹងសម្លៀកបំពាក់ក៏អាចចាត់ទុកថារោងចក្រ សហគ្រាស និងសិប្បកម្មក្នុងស្រុកនាពេលបច្ចុប្ប​ន្នក៏អាចផលិតបានយ៉ាងសម្បូរបែបផងដែរ។

លោក បួ ប៊ុនហុង អ្នកជំនាញផលិតអាវធំផ្លូវការ និងជាម្ចាស់ហាងអាវធំ Business Outfits ប្រាប់ កម្ពុជាថ្មី ថា បច្ចុប្បន្ន ក្រៅពីការផលិតអាវធំផ្លូវការដាក់លក់លើទីផ្សារក្នុងស្រុក ចំពោះទៅថ្ងៃខាងមុខលោកក៏ចង់នាំយកផលិតដែលជាស្នាដៃកូនខ្មែរនេះទៅកាន់ទីផ្សារអន្តរជាតិផងដែរ។

លោក បន្តថា ទាក់ទងនឹងការផលិតអាវធំផ្លូវការនេះដែរ ប៉ុន្មានឆ្នាំចុងក្រោយនេះ ចំពោះតម្រូវការក្នុងស្រុកឃើញថាទទួលបានការគាំទ្រយ៉ាងច្រើនពីពលរដ្ឋខ្មែរ ពិសេសគឺអ្នកធ្វើការតាមស្ថាប័នរដ្ឋ និងអ្នកបម្រើការនៅតាមបណ្ដាក្រុមហ៊ុនផ្សេងៗ ដែលនេះអាចចាត់ទុកថាជាសញ្ញាវិជ្ជមានមួយសម្រាប់អាជីវកម្មសម្លៀកបំពាក់របស់លោក។

លោក ប៊ុនហុង បន្តថា មូលហេតុដែលអតិថិជនតែងតែនិយមគាំទ្រសម្លៀកបំពាក់ដែលដេរក្នុងស្រុក ក៏ព្រោះតែគុណភាព និងស្ដង់ដា គឺមិនចាញ់នឹងរបស់នាំចូលពីក្រៅប្រទេសនោះឡើយ។ យ៉ាងណាមិញ ចំពោះតម្លៃវិញ អាវធំផ្លូវការដែលផលិតបានក្នុងស្រុក គឺភាគច្រើនមានតម្លៃសមរម្យបើធៀបនឹងអាវធំដែលនាំចូលពីក្រៅប្រទេសកន្លងមក។

ម្ចាស់អាជីវកម្មរូបនេះ នៅតែស្នើសុំចិត្តប្រជាជនខ្មែរសូមបន្តជួយគាំទ្រផលិតផលដែលផលិតបានក្នុងស្រុក ពិសេសគឺផលិតផលស្នាដៃកូនខ្មែរ ដើម្បីជួយបង្កើនការងារសម្រាប់កម្មករតាមរោងចក្រ ឬសហគ្រាស និងជំរុញការលក់សម្លៀកបំពាក់ដេរក្នុងស្រុកកាន់តែមានកំណើនថែមទៀត៕

អត្ថបទ ៖ សួស សិត