សេដ្ឋកិច្ច

សហរដ្ឋអាមេរិក នៅតែជាទីផ្សារនាំចេញធំបំផុតរបស់កម្ពុជា

បានផុស

២២ វិនាទី មុន

នៅ

ថ្ងៃព្រហស្បតិ៍ ២ កក្កដា ២០២៦

ដោយ

លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី មានប្រសាសន៍ថា សហរដ្ឋអាម៉េរិក នៅតែជាទីផ្សារនាំចេញធំបំផុតរបស់កម្ពុជានៅក្នុងវិស័យពាណិជ្ជកម្ម និងវិនិយោគ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វង្សី វិស្សុត បានលើកឡើងនៅក្នុងពិធីប្រារព្ធខួបលើកទី ២៥០ នៃទិវាបុណ្យជាតិ សហរដ្ឋអាមេរិកនៅល្ងាចថ្ងៃទី ១ កក្កដា ២០២៦ នៅមជ្ឈមណ្ឌលពិព័រណ៍កោះពេជ្រ។

ឧបនាយករដ្ឋមន្ត្រីប្រចាំការបានថ្លែងថា កម្ពុជាបន្តប្តេជ្ញាចិត្តក្នុងការកសាងភាពជាដៃគូដ៏រឹងមាំ ដោយឈរលើគោលការណ៍នៃផលប្រយោជន៍ទៅវិញទៅមក ការគោរពគ្នា និងការជឿទុកចិត្តគ្នា និងបញ្ជាក់ពីចលនការជាវិជ្ជមាននៃទំនាក់ទំនងកម្ពុជា-សហរដ្ឋអាម៉េរិក ដែលឆ្លុះបញ្ជាំងតាមរយៈវឌ្ឍនភាពនៃកិច្ចសហប្រតិបត្តិការលើគ្រប់វិស័យនាពេលកន្លងមក។

លោក វង្សី វិស្សុត បញ្ជាក់ថា៖«ក្នុងវិស័យពាណិជ្ជកម្ម និងវិនិយោគ សហរដ្ឋអាម៉េរិក នៅតែជាទីផ្សារនាំចេញធំបំផុតរបស់កម្ពុជា ហើយការចុះហត្ថលេខាលើ កិច្ចព្រមព្រៀងពាណិជ្ជកម្មបដិការ កិច្ចព្រមព្រៀងបើកចំហជើងមេឃ រួមជាមួយនឹងកិច្ចសហប្រតិបត្តិការលើគម្រោងអាកាសយានដ្ឋានអន្តរជាតិតេជោ ពិតជាបានធ្វើឱ្យទំនាក់ទំនងសេដ្ឋកិច្ចកាន់តែស៊ីជម្រៅ និងបានបើកមាគ៌ាថ្មីមួយដល់ប្រទេសទាំងពីរ ក្នុងការកសាងភាពជាដៃគូ ប្រកបដោយជវភាព និងការផ្តល់ផលប្រយោជន៍រួម»។

ទំនាក់ទំនងរវាងប្រជាជន និងប្រជាជន ក៏កំពុងឈានដល់កម្រិតដ៏រឹងមាំបំផុតមិនធ្លាប់មាន ដោយក្នុងនោះ ទេសចរអាមេរិក នៅតែស្ថិតក្នុងចំណោមទេសចរលំដាប់ខ្ពស់មកទស្សនាកម្ពុជា ខណៈប្រជាជនកម្ពុជារាប់ សែននាក់ បានចាត់ទុកសហរដ្ឋអាមេរិកជាផ្ទះរបស់ខ្លួន។

យោងតាមក្រសួងពាណិជ្ជកម្ម នៅក្នុងរយៈពេល ៥ ខែ ២០២៦ ទំហំពាណិជ្ជកម្មទ្វេភាគីកម្ពុជា-សហរដ្ឋអាមេរិកសម្រេចបានជិត ៦ ពាន់លានដុល្លារ កើនឡើង ៣៣,២% ក្នុងនោះកម្ពុជា នាំទំនិញចេញទៅសហរដ្ឋអាមេរិកមានតម្លៃជាង ៥,៧៣ ពាន់លានដុល្លារ កើនឡើង ៣១,៥% ចំណែកឯសហរដ្ឋអាមេរិកនាំចូលមកវិញមានតម្លៃ ២៣១ លានដុល្លារ កើន ៩២,៥%។

នៅឆ្នាំ ២០២៥ ទំហំពាណិជ្ជកម្មទ្វេភាគីកម្ពុជា-អាមេរិក សម្រេចបានជាង ១៣,១៤ ពាន់លានដុល្លារ កើនឡើង ២៩,២៤% ក្នុងនោះ កម្ពុជានាំចេញទៅអាមេរិក មានតម្លៃ ១២,៧៣ ពាន់លានដុល្លារ កើនឡើង២៨,៤៨% ចំណែកអាមេរិកនាំចូលមកវិញមានតម្លៃ ៤១៧ លានដុល្លារ កើនឡើង ៥៧,៨៣%៕