ពន្ធដារប្រកាសពន្យារពេលពីរថ្ងៃទៀតសម្រាប់អ្នកបង់ប្រាក់ពន្ធប្រចាំខែមេសា

អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានប្រកាសដល់អ្នកជាប់ពន្ធទាំងអស់ អំពីការពន្យារពេលដាក់លិខិតប្រកាស និងបង់ពន្ធប្រចាំខែមេសា ឆ្នាំ២០២២។

យោងតាមសេចក្តីជូនដំណឹងរបស់អគ្គនាយកដ្ឋានពន្ធដារ បានឱ្យដឹងដូច្នេះថា« ដោយសង្កេតឃើញនៅមាន​សហគ្រាសជាច្រើននៅបន្តបង់ប្រាក់ពន្ធ និងប្រកាសពន្ធតាមអនឡាញ ដូចនេះ ដើម្បីជាការជួយសម្រួល​ដល់ការបំពេញកាតព្វកិច្ចសារពើពន្ធឱ្យបានទាន់ពេលវេលា អគ្គនាយកដ្ឋានពន្ធដារ សម្រេចពន្យារពេល​កាលបរិច្ឆេទកំណត់ឱ្យដាក់លិខិតប្រកាស និងបង់ពន្ធប្រចាំខែ មេសា ឆ្នាំ ២០២២ រហូតដល់ថ្ងៃទី ២៧ ខែ ឧសភា ឆ្នាំ ២០២២។

អគ្គនាយកដ្ឋានពន្ធដារ សង្ឃឹមថា ការពន្យារកាលបរិច្ឆេទ កំណត់ឱ្យដាក់លិខិតប្រកាស និងបង់ប្រាក់ពន្ធប្រចាំខែមេសានេះ នឹងជួយសម្រួល និងផ្តល់លទ្ធភាពគ្រប់គ្រាន់ ដល់អ្នកជាប់ពន្ធទាំងអស់ ក្នុងការបំពេញកាតព្វកិច្ចសារពើពន្ធ៕