កសិដ្ឋាន​ចិញ្ចឹម​ឃ្មុំធម្មជាតិ​អាចពង្រីកខ្លួន​ផលិតទឹកឃ្មុំ​លក់ចេញខ្ទង់ពាន់លីត្រក្នុង១ខែ

ការផលិតទឹកឃ្មុំនៅក្នុងស្រុកមិនមែនចេះតែចិញ្ចឹមទើបអាចទទួលបានជោគជ័យនោះទេ ទាមទារ​ឲ្យមាន​បទពិសោធន៍ មើលទៅបញ្ហាអាកាសធាតុ និងប្រភេទនៃដើមឈើ។ នេះជាការលើកឡើងរបស់លោកស្រី ច្រក លីដា អ្នកទីផ្សារលក់ទឹកឃ្មុំនៅកសិដ្ឋានចិញ្ចឹមឃ្មុំធម្មជាតិ ឃ្មុំភ្នំខៀវប៉ៃលិន។

លោកស្រី ច្រក លីដា អ្នកទីផ្សារនៅក្នុងកសិដ្ឋានចញ្ចឹមឃ្មុំធម្មជាតិ ឃ្មុំភ្នំខៀវប៉ៃលិន ស្ថិត​នៅភូមិសួន​អំពៅកើត ស្រុកប៉ៃលិន ខេត្តប៉ៃលិន ប្រាប់កម្ពុជាថ្មីថា ​ចំពោះការចិញ្ចឹមឃ្មុំតាមបែបធម្មជាតិ​នៅក្នុងស្រុក គឺសំខាន់ណាស់ទាមទារ​ឲ្យមានបទពិសោធន៍ខ្ពស់ ព្រោះបញ្ហាដែលជួបអាច​មានការ​លំបាកខ្លាំង ដែលអ្នកស្រីណែនាំដល់អ្នកដែលចង់រៀនចិញ្ចឹមត្រូវមើលទៅ​លើកត្តា​អាកាស​ធាតុ ប្រភេទដើមឈើដែលអំណោយផលល្អ និងវិធីសាស្រ្តនានាកុំឲ្យឃ្មុំពុលថ្នាំ។

លោកស្រីបន្តថា ឃ្មុំត្រូវបាននាំចូលមកពីប៉ែកអ៊ឺរ៉ុប និងរៀតណាម ដែលដំបូងឡើយនៅឆ្នាំ ២០១៧ កសិដ្ឋានរបស់អ្នកស្រីមានត្រឹមតែ ១០ ធុង ខណៈរយៈពេល ៥ ឆ្នាំ កសិដ្ឋានអ្នកស្រីបានពង្រីកខ្លួនរហូត​ដល់ទៅជាង ៧០០ ធុង ដែលអាច ផលិតទឹកឃ្មុំរាប់រយលីត្រក្នុង១ថ្ងៃ។

លោកស្រីថា រយៈពេលទទួលបានទិន្នផលត្រូវចំណាយពេល២០ ថ្ងៃ ហើយតម្លៃលក់ចេញ ១ លីត្រ ២០ដុល្លារ ខណៈដែល១ ខែ កសិដ្ឋានរបស់អ្នកស្រី អាចលក់ចេញបានប្រមាណ ២ តោន៕

អត្ថបទ៖ ឌឿន ចាន់ថារី