កម្ពុជា រកចំណូលបានពីវិស័យជលផលជិត ៨៣០លានរៀល ក្នុងឆ្នាំ ២០២៣

ពេញមួយឆ្នាំ ២០២៣ ប្រាក់ចំណូលពីវិស័យជលផលមានចំនួនជិត ៨៣០លានរៀល កើនឡើងលើសឆ្នាំ ២០២២ ប្រមាណជាង ២០៥លានរៀល។ នេះបើតាមរបាយការណ៍បូកសរុបលទ្ធផលការងារវិស័យជលផលប្រចាំឆ្នាំ ២០២៣ និងលើកទិសដៅសម្រាប់ឆ្នាំ ២០២៤ របស់ក្រសួងកសិកម្ម។

ប្រភពដដែលបញ្ជាក់ថា រដ្ឋបាលជលផលបានខិតខំបំពេញភារកិច្ចក្នុងឆ្នាំ២០២៣ ដោយសម្រេចបានលទ្ធផលគួរឱ្យកត់​សម្គាល់លើការអភិរក្សជលផល ការអនុវត្តច្បាប់ស្តីពីជលផល ការអភិវឌ្ឍវារីវប្បកម្ម ការអភិវឌ្ឍសហគមន៍នេសាទ ការកែ​ច្នៃ​ផលនេសាទ ការធ្វើអាជីវកម្មនេសាទ និងការសិក្សាស្រាវជ្រាវបច្ចេកទេស ជាដើម។

លើសពីនេះទៀត បានសហការជាមួយដៃគូអភិវឌ្ឍន៍ក្នុងការគ្រប់គ្រង អភិរក្សនិងអភិវឌ្ឍន៍វិស័យជលផលឱ្យកាន់​តែរីកចម្រើន ដើម្បីចូលរួមចំណែកធានាសន្តិសុខស្បៀង លើកស្ទួយសេដ្ឋកិច្ចជាតិ កាត់បន្ថយភាពក្រីក្រ​ប្រជា​ពលរដ្ឋ​តាមមូលដ្ឋានតាមរយៈការបង្កើតមុខរបរ និងទីផ្សារផលផលិតផលជលផល។

របាយការណ៍បានបង្ហាញទៀតថា ការគ្រប់គ្រងធនធានជលផលទទួលបានលទ្ធផលជាវិជ្ជមាន ហើយការ​អនុវត្តវារីវប្បកម្ម​កំពុងត្រូវបានជំរុញបន្ថែម ដោយមានកិច្ចសហការពីដៃគូអភិវឌ្ឍន៍ និងវិស័យឯកជន ដើម្បី​បង្កើនផលវារីវប្បកម្ម និងកាត់បន្ថយ ការនាំចូល។ ទន្ទឹមនេះ នៅមានបញ្ហាប្រឈមមួយចំនួនទៀត ដូចជា ការបង្ក្រាបបទល្មើសជលផល ការអភិរក្សធនធាន ជលផល ការអភិវឌ្ឍវារីវប្បកម្ម ការពង្រឹងសមត្ថភាព​សហគមន៍នេសាទ ការគ្រប់គ្រងព្រៃលិចទឹក និងព្រៃកោងកាង ការជំរុញការអភិវឌ្ឍខ្សែច្រវាក់តម្លៃជលផល និងការស្រាវជ្រាវបច្ចេកទេសវិទ្យាសាស្ត្រជលផល ដែលរដ្ឋបាលជលផល ត្រូវរកវិធីសាស្ត្រនិងយន្តការសម្រាប់​អនុវត្តក្នុងការគ្រប់គ្រងធនធានជលផលឱ្យមានប្រសិទ្ធភាព និងនិរន្តរភាព។

សូមបញ្ជាក់ថា នៅឆ្នាំ ២០២៤នេះ រដ្ឋបាលជលផលមានគោលដៅសម្រេចឱ្យបានផលនេសាទទឹកសាបចំនួនជាង ៤៥ម៉ឺនតោន សមុទ្រ១៣ម៉ឺនតោន វារីវប្បកម្ម៣៥ម៉ឺនតោន កូនត្រីពូជ៣០០លានកូន ក្រពើ៣០ម៉ឺនក្បាល ការកែច្នៃ ៧ម៉ឺនតោន ទឹកត្រី៥០លានលីត្រ និងការនាំចេញផល ផលិតផលជលផលឱ្យបាន ៨ ពាន់តោនផងដែរ៕