ក្រដាសប្រាក់ដុល្លារចាស់ ឬប្រឡាក់ អាចយកទៅប្ដូរមិនអស់កម្រៃសេវា

ទេសាភិបាលធនាគារជាតិនៃកម្ពុជា តម្រូវឱ្យសាខាធនាគារពាណិជ្ជខេត្តសៀមរាប ទទួលយក​ប្រាក់​​ដុល្លារ​អាមេរិក​ចាស់ ឬប្រឡាក់ ដោយមិនទាមទារកម្រៃសេវាពីអតិថិជន។

ការសម្រេចបែបនេះ បានធ្វើឡើងក្នុងកិច្ចប្រជុំពិភាក្សាលើការសម្របសម្រួល​ចរាចរណ៍ក្រដាស​ប្រាក់​​​ដុល្លារអាមេរិកនៅខេត្តសៀមរាប ជាមួយគ្រឹះស្ថានធនាគារ និងហិរញ្ញវត្ថុ ក្រោមវត្តមាន​លោក​​ស្រី ជា សិរី ទេសាភិបាលធនាគារជាតិនៃកម្ពុជានៅថ្ងៃទី ២១ ខែកក្កដា ឆ្នាំ ២០២៤។

លោក​ស្រី ជា សិរី បានបញ្ជាក់ថា ក្នុងករណីក្រដាស​ប្រាក់​​ដុល្លារចាស់ខ្លាំងដែលគិតថា ​មិនគួរ​បន្ត​ឱ្យ​ចរាចរនៅលើទីផ្សារបាន ធនាគារពាណិជ្ជ​នៅក្នុង​ខេត្តសៀម​រាបត្រូវបញ្ជូនបន្តទៅប្ដូរ​យក​ក្រ​ដាស​ប្រាក់ថ្មីនៅសាខាធនាគារជាតិខេត្តសៀមរាប ដោយពុំមានគិតកម្រៃសេវា និងពុំចាំបាច់​រង់​ចាំផ្ញើទៅទីស្នាក់ការកណ្ដាល​របស់ធនាគារពាណិជ្ជ​នៅរាជធានីភ្នំពេញនោះទេ។

ជាមួយគ្នានោះ លោក​ស្រី ជា សិរី ក៏បានតម្រូវឱ្យគ្រឹះស្ថានធនាគារ និងហិរញ្ញវត្ថុទាំងអស់នៅខេត្តសៀមរាប​ដាក់​ក្រដាស​ប្រាក់ដុល្លារអាមេរិកប្រភេទ ២០ ដុល្លារ និង ៥០ ដុល្លារ ជំនួសក្រដាសប្រាក់ ១០០ ដុល្លារ នៅក្នុងម៉ាស៊ីនដកប្រាក់ (ATM) ដើម្បីសម្រួលដល់ការចាយរបស់ភ្ញៀវទេសចរ។

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានកោតសរសើរចំពោះលោកស្រី ជា សេរី ទេសាភិបាលធនាគារជាតិនៃកម្ពុជា ចំពោះចំណាត់ការដ៏ឆាប់រហ័ស ក្នុងការដាក់​ចេញ​នូវគោល​ការណ៍ពាក់ព័ន្ធនឹងការសម្រួលលក្ខខណ្ឌសម្រាប់​ការចាយក្រដាស់ប្រាក់ដុល្លារអាមេរិក ដែលមានសភាពចាស់ ប្រឡាក់ ឬខូចខាតខ្លះ នៅខេត្តសៀមរាប។

សម្ដេចធិបតីបានបញ្ជាក់ថា បញ្ហាលំបាកពាក់ព័ន្ធនឹ​ងការចាយវាយក្រដាសប្រាក់ដុល្លារ​អាមេរិក​ដែល​មានសភាពចាស់ ប្រឡាក់ ឬខូចខាតខ្លះ បានបង្កការលំបាកសម្រាប់ការលក់​ដូររបស់​ប្រជា​ពលរដ្ឋនៅក្នុងខេត្ត ដែលបញ្ហានេះ ត្រូវ​បាន​បង​ប្អូនអ្នកលក់ដូរប្រាប់សម្ដេចផ្ទាល់​នៅពេល​ដែល​សម្ដេច​ចុះទៅ Pub Street កាល​ពី​យប់​ថ្ងៃទី ១៧ កក្កដា ឆ្នាំ ២០២៤៕

អត្ថបទ៖ ឡេង ដេត