កម្ពុជាស្នើឱ្យអាស៊ាន និងជប៉ុនផ្ដល់ដំណោះស្រាយ​លើបញ្ហាការបញ្ចេញឧស្ម័នពុល

កម្ពុជាស្នើសុំឱ្យអាស៊ាន និងជប៉ុនរួមគ្នាគិតពីដំណោះស្រាយសមស្របពាក់ព័ន្ធនឹងការបញ្ចេញឧស្ម័នពុលទៅក្នុងបរិយាកាស ដើម្បីធានាអព្យាក្រឹតកាបូននៅឆ្នាំ២០៥០។

សំណើរនេះ ធ្វើឡើងក្នុងពេល លោក កែវ រតនៈ រដ្ឋមន្ត្រីក្រសួងរ៉ែ និងថាមពល ចូលរួមក្នុង​កិច្ចប្រ​ជុំ​ថ្នាក់​រដ្ឋមន្ត្រីលើកទី ២​ ស្តីពីសហគមអាស៊ីដែលមិនបញ្ចេញ​ឧស្ម័នពុល​ក្នុងបរិយាកាសនៅថ្ងៃទី ២១ ខែសីហា ឆ្នាំ ២០២៤ នៅប្រ​ទេសឥណ្ឌូនេស៊ី។

លោក កែវ រតនៈ រដ្ឋមន្ត្រីក្រសួងរ៉ែង និងថាមពល បានលើកឡើងថា កិច្ចប្រជុំលើកទី២ ពិភាក្សាអំពីការផលិតថា​មពលករកើតឡើងវិញ; ការខិតខំកាត់បន្ថយឧស្ម័នចេញ​ពីយាន​យន្តដែលប្រើសាំង និងម៉ាស៊ូត និងការខិតខំធ្វើយ៉ាង​ណាឱ្យឧស្សាហកម្មប្រើប្រាស់​បច្ចេក​វិទ្យាថ្មីកាត់បន្ថយឧស្ម័នពុលទៅក្នុងបរិយាកាស។

លោក កែវ រតនៈ បញ្ជាក់ឱ្យដឹងថា វិស័យដឹកជញ្ជូន​នៅអាស៊ាន​បញ្ចេញឧស្ម័នបំពុលទៅ​បរិយាកាស​ប្រមាណ៣១%។

អាស៊ានត្រូវការថវិការាប់ពាន់លានដុល្លាររាល់ឆ្នាំដើម្បីវិនិយោគលើបណ្តាញអគ្គិសនី និងប្រភពអគ្គិសនីបៃតងដើម្បីអព្យាក្រឹតកាបូននៅឆ្នាំ២០៥០ ហើយកង្វះថវិកាជា​បញ្ហាប្រឈមដ៏ធំសម្រាប់ទាំងអស់គ្នា។ កម្ពុជាស្នើសុំអាស៊ាន និងជប៉ុនរួមគ្នាគិតពីដំណោះស្រាយសមស្រប៕

អត្ថបទ៖ ឡេង ដេត