រុស្ស៊ី ប្រកាស ទោះ ១០០ឆ្នាំទៀត ក៏ខ្លួនមិនទាន់អស់ឧស្ម័នប្រើដែរ (មានវីដេអូ)

លោក Alexey Miller ប្រធានក្រុមហ៊ុន Gazprom ដែលគ្រប់គ្រងដោយរដ្ឋ បាននិយាយកាលពីថ្ងៃពុធទី៣១ខែសីហា នៅឯសមាជធុរកិច្ចអន្តរជាតិថា ប្រទេសរុស្ស៊ី មានទុនបម្រុងឧស្ម័នធម្មជាតិដ៏ធំ ដែលអាចប្រើប្រាស់បានក្នុងរយៈពេលជាងមួយសតវត្សរ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Miller និយាយថា “អ្នកប្រើប្រាស់របស់យើង គឺពលរដ្ឋរុស្ស៊ី នឹងមានលទ្ធភាពទទួលបានធនធានថាមពលតម្លៃថោក និងគួរឲ្យទុកចិត្ត។ វាពិតជាមានសារសំខាន់ដែលត្រូវបញ្ជាក់ថា ពួកគេអាចមានសុទិដ្ឋិនិយមអំពីអនាគតឧស្ម័នរបស់ប្រទេស។ ហេតុអ្វី? ដោយ​សារ​តែ​យើងមាន​ទុន​បម្រុង ​ទុកប្រើប្រាស់បាន​រយៈ​ពេល ១០០ ឆ្នាំ​ខាង​មុខ”។

យោងតាមលោក Miller, ក្រុមហ៊ុន Gazprom នឹង​នៅ​តែបន្តផ្គត់ផ្គង់​ឧស្ម័ន ​សូម្បី​តែ​ក្នុង​ឆ្នាំ ២១២០ ក៏ដោយ។

នាយកប្រតិបត្តិរបស់ក្រុមហ៊ុនថាមពលយក្សមួយនេះ បានលើកឡើងអំពីការអភិវឌ្ឍន៍ធនធានដ៏ធំនៅក្នុងឧបទ្វីប Yamal ភាគខាងជើងប្រទេសរុស្ស៊ី ហើយលោកបានបន្ថែមថា បច្ចុប្បន្នក្រុមហ៊ុន Gazprom កំពុងរៀបចំដើម្បីបើកដំណើរការរោងចក្រនៅតំបន់ Kharasavey ហើយក៏ចាប់ផ្តើមអភិវឌ្ឍនៅ Bovanenkovo ផងដែរ។

គួរបញ្ជាក់ថា រុស្សីមានទុនបម្រុងឧស្ម័នធម្មជាតិធំជាងគេបំផុតលើពិភពលោក ដែលប៉ាន់ស្មានថាមានប្រមាណ ៤៨ពាន់ពាន់លានម៉ែត្រគូប ឬប្រហែលមួយភាគបួននៃចំនួនសរុបរបស់ពិភពលោក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី បិទបំពង់បង្ហូរ ឧស្ម័នដ៏ធំ ទៅអឺរ៉ុប