ព័ត៌មានអន្ដរជាតិ

ឥណ្ឌូណេស៊ីហាមឃាត់ Temu ដើម្បីការពារសហគ្រាសធុនតូច និងមធ្យមក្នុងស្រុក

បានផុស

២ ខែ មុន

នៅ

ថ្ងៃសុក្រ ៤ តុលា ២០២៤

ដោយ

ឥណ្ឌូណេស៊ីហាមឃាត់ក្រុមហ៊ុនពាណិជ្ជកម្មអេឡិចត្រូនិកចិន Temu ដោយសារតែក្ដីបារម្ភថា វាអាចបង្កផលប៉ះពាល់ធ្ងន់ធ្ងរដល់សហគ្រាសធុនតូច និងមធ្យមរបស់ប្រទេស។ នេះបើតាមការឱ្យដឹងរបស់រដ្ឋមន្ត្រីក្រសួងទំនាក់ទំនង និងព័ត៌មានឥណ្ឌូណេស៊ី លោក Budi Arie Setiadi។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយបន្តរបស់សារព័ត៌មាន CNA ក្នុងរយៈពេលប៉ុន្មានខែថ្មីៗនេះ អាជ្ញាធរឥណ្ឌូណេស៊ីបានប្រុងប្រយ័ត្នចំពោះការដាក់ប្រតិបត្តិការរបស់ Temu ក្នុងប្រទេសរបស់ខ្លួន។ អគ្គនាយកពាណិជ្ជកម្មក្នុងស្រុករបស់ក្រសួងពាណិជ្ជកម្ម លោក Isy Karim ធ្លាប់បាននិយាយថា គំរូអាជីវកម្មរបស់ Temu ក្នុងការលក់ផលិតផលដោយផ្ទាល់ពីរោងចក្រដល់អ្នកប្រើប្រាស់ គឺផ្ទុយនឹងបទប្បញ្ញត្តិពាណិជ្ជកម្មរបស់ប្រទេសឥណ្ឌូណេស៊ី ដែលតម្រូវឱ្យមានអន្តរការី ឬអ្នកចែកចាយ។

ជាថ្មីម្ដងទៀត លោករដ្ឋមន្ត្រី Budi បាននិយាយកាលពីថ្ងៃទី ១ ថា ការអនុញ្ញាតឱ្យ Temu មាននៅក្នុងប្រទេសឥណ្ឌូណេស៊ី អាចប៉ះពាល់ដល់សេដ្ឋកិច្ច និងសង្គម។ លោកបន្តយ៉ាងដូច្នេះថា៖ «Temu មិនអាចចូលមកក្នុងប្រទេសយើងបានទេ ព្រោះវាធ្វើឱ្យខូចសេដ្ឋកិច្ច ជាពិសេសសហគ្រាសធុនតូច និងមធ្យមរបស់ឥណ្ឌូណេស៊ី។ យើងនឹងមិនផ្តល់ឱកាសឱ្យវាទេ»។

លោករដ្ឋមន្រ្តីដដែលថ្លែងថា៖ «យើងចង់ឱ្យលំហឌីជីថលពោរពេញដោយអ្វីដែលធ្វើឱ្យសង្គមយើងកាន់តែមានផលិតភាព និងផលចំណេញ។ ប្រសិនបើវាបង្កការខូតខាត តើមានអ្វីសំខាន់? យើងនឹងហាមឃាត់វា។ សហគ្រាសធុនតូច និងមធ្យមរបស់យើង នឹងរងការបំផ្លាញ ប្រសិនបើមិនត្រូវបានត្រួតពិនិត្យទេនោះ»។

ជុំវិញបញ្ហានេះ ក្រសួងសហករណ៍ និងសហគ្រាសធុនតូច និងមធ្យមឥណ្ឌូណេស៊ី បាននិយាយកាលពីមុនថា ក្រុមហ៊ុនTemu បានព្យាយាមចុះបញ្ជីចំនួន៣ដង ដើម្បីដាក់ប្រតិបត្តិការនៅក្នុងប្រទេសឥណ្ឌូណេស៊ី។

គួរគូសបញ្ជាក់ថា ក្រុមហ៊ុនពាណិជ្ជកម្មអេឡិចត្រូនិក Temu ត្រូវបានដំណើរការដោយក្រុមហ៊ុនមេរបស់ចិន PDD Holdings និងល្បីខាងលក់ទំនិញថោកៗចេញពីរោងចក្រនៅចិនទៅកាន់អតិថិជនតាមអនឡាញ។ ក្រុមហ៊ុននេះ មានវត្តមានក្នុងប្រទេសប្រហែល ៦០ និងបានចូលមកដល់តំបន់អាស៊ីអាគ្នេយ៍កាលពីឆ្នាំមុន ដោយចាប់ផ្តើមជាមួយប្រទេសហ្វីលីពីនកាលពីខែសីហា ឆ្នាំមុន និងម៉ាឡេស៊ីកាលពីខែកញ្ញា ឆ្នាំមុន មុនពេលពង្រីកវត្តមាននៅប្រទេសថៃ នាខែកក្កដា ឆ្នាំនេះ៕