កម្ពុជា-ឥណ្ឌូនេស៊ី ឯកភាពលើកកម្ពស់ កិច្ចសហប្រតិបត្តិការលើវិស័យទេសចរណ៍

ថ្នាក់ដឹកនាំជាន់ខ្ពស់កម្ពុជា និងឥណ្ឌូនេស៊ី បានឯកភាពពង្រឹង និងលើកកម្ពស់កិច្ច​សហប្រតិបត្តិ​ការ​​​លើវិស័យទេសចរណ៍។

លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី ០៤ ខែវិច្ឆិកា បានអនុញ្ញាតឱ្យលោក សាន់តូ ជាម៉ូស៊ូម៉ាតូ (H.E. Dr Santo Darmosumarto) ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋឥណ្ឌូនេស៊ីប្រចាំកម្ពុជាំចូលជួបសម្តែងការគួរសម និងពិភាក្សាការងារ។

លោករដ្ឋមន្ត្រីបាន វាយតម្លៃខ្ពស់ចំពោះកិច្ចសហប្រតិបត្តិការទេសចរណ៍រវាងប្រទេសទាំងពីរ បន្ទាប់​ពីការចុះអនុស្សរណៈនៃការ យោគយល់គ្នារវាងក្រសួងទេសចរណ៍កម្ពុជា និងក្រសួងទេសចរណ៍ និងសេដ្ឋកិច្ចច្នៃប្រឌិតឥណ្ឌូនេស៊ី ស្តីពីកិច្ច​សហប្រតិបត្តិការលើវិស័យទេសចរណ៍។

លោកអគ្គរដ្ឋទូត និងលោករដ្ឋមន្ត្រី បានផ្លាស់ប្តូរកិច្ចពិភាក្សាអំពីវឌ្ឍនភាពនៃកិច្ច សហប្រតិបត្តិការ និងការសហការកន្លងមកបានយ៉ាងល្អប្រសើរក្នុងវិស័យទេសចរណ៍រវាងប្រទេសកម្ពុជា និងសា​ធារ​ណរដ្ឋឥណ្ឌូនេស៊ី។

ជំនួបទ្វេភាគីរវាងរដ្ឋមន្រ្តី និងលោកឯកអគ្គរដ្ឋទូត សម្រេចបានលទ្ធផលដូចខាងក្រោម៖

១)- ឯកភាពពង្រឹង និងលើកកម្ពស់កិច្ចសហប្រតិបត្តិការលើវិស័យទេសចរណ៍កម្ពុជា-ឥណ្ឌូនេស៊ី ស្របតាមស្មារតីនៃអនុស្សរណៈយោគយល់គ្នាស្តីពីកិច្ចសហប្រតិបត្តិការលើវិស័យទេសចរណ៍កម្ពុជា-ឥណ្ឌូនេស៊ី។

២)- ឯកភាពបង្កើនកិច្ចសហប្រតិបត្តិការលើកិច្ចការទេសចរណ៍មូស្លីម (Muslim Friendly Tourism)។

៣)- សហការរួមគ្នាជំរុញក្រុមហ៊ុនអាកាសចរណ៍ឥណ្ឌូនេស៊ី បង្កើតជើងហោះហើរត្រង់រវាងកោះបាលី និងខេត្តសៀមរាប ដើម្បីសម្រួលដល់ការធ្វើដំណើររបស់ប្រជាជនទាំងពីរប្រទេស និងភ្ញៀវទេសចរ។

៤)- ពិនិត្យលទ្ធភាពរៀបចំទស្សនកិច្ចការងារដកស្រង់បទពិសោធរវាងឯកឧត្តមរដ្ឋមន្រ្តីក្រសួងទេសចរណ៍កម្ពុជា និងរដ្ឋមន្រ្តីក្រសួងទេសចរណ៍ និងសេដ្ឋកិច្ចច្នៃប្រឌិតឥណ្ឌូនេស៊ី រួមទាំងការរៀបចំការធ្វើ FAM Trip ដោយមានការចូលរួមពីផ្នែកឯកជននៃប្រទេសទាំងពីរដើម្បីរៀបចំកញ្ចប់ទស្សនកិច្ច។

យោងតាមក្រសួងទេសចរណ៍ នៅក្នុងរយៈពេល ៩ ខែ ឆ្នាំ ២០២៤ កម្ពុជាទទួលបានទេសចរអន្តរជាតិប្រមាណ ៤,២៩ លាននាក់ កើនឡើង ២២,៥% ធៀបនឹងរយៈពេលដូចគ្នាក្នុងឆ្នាំ ២០២៣ ក្នុងនោះទេសចរឥណ្ឌូនេស៊ីមានចំនួនជាង ១២ ម៉ឺននាក់ (១២៣ ៤៣៧) កើនឡើង ៣២,៩%៕