ព័ត៌មានអន្ដរជាតិ

កំណើនសេដ្ឋកិច្ចហ្វីលីពីន ធ្លាក់ចុះជាង ១ ភាគរយ នៅត្រីមាសទី៣ ធៀបនឹងត្រីមាសមុន

បានផុស

៥ ខែ មុន

នៅ

ថ្ងៃព្រហស្បតិ៍ ៧ វិច្ឆិកា ២០២៤

ដោយ

អាជ្ញាធរស្ថិតិហ្វីលីពីន (PSA) បានឱ្យដឹងនៅថ្ងៃព្រហស្បតិ៍នេះថា ផលិតផលក្នុងស្រុកសរុបរបស់ហ្វីលីពីន (GDP) បានធ្លាក់ចុះមកត្រឹម ៥,២ ភាគរយ នៅត្រីមាសទី៣ ដោយថយចុះពី ៦,៤ ភាគរយ នៅត្រីមាសទី២។ នេះបើតាមការចុះផ្សាយរបស់កាសែត The Philippine Star។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វាគឺជាកំណើនប្រចាំទ្រីមាសទាបបំផុត បើធៀបនឹងកំណើនប្រមាណ ៥,៨ ភាគរយ នៅត្រីមាសទី១ ដើមឆ្នាំ ខណៈរដ្ឋាភិបាលហ្វីលីពីន បានកំណត់គោលដៅប្រចាំឆ្នាំ ២០២៤ នៅអត្រាប្រមាណចន្លោះពី ៦-៧ ភាគរយ។

លេខាធិការអាជ្ញាធរសេដ្ឋកិច្ច និងអភិវឌ្ឍន៍ជាតិ (NEDA) លោក Arsenio Balisacan បាននិយាយក្នុងសន្និសីទសារព័ត៌មានថា៖ «នេះ(អត្រាប្រចាំត្រីមាសទី៣) ធ្វើឱ្យកំណើន GDP ជាមធ្យមសម្រាប់៣ត្រីមាសដំបូងនៃឆ្នាំ ២០២៤ មានត្រឹម ៥,៨ ភាគរយ ដោយតិចជាងគោលដៅរបស់យើងបន្តិច»។

លោក Balisacan បាននិយាយថា ដើម្បីសម្រេចបាននូវគោលដៅរបស់រដ្ឋាភិបាល ហ្វីលីពីនត្រូវតែសម្រេចបាននូវកំណើនសេដ្ឋកិច្ចយ៉ាងហោចណាស់ ៦,៥ ភាគរយ នៅត្រីមាសចុងក្រោយ។

យ៉ាងណាមិញ ហ្វីលីពីនស្ថិតនៅក្នុងប្រទេសដែលមានកំណើនខ្ពស់ ដោយឈរនៅលេខ២នៅអាស៊ីអាគ្នេយ៍បន្ទាប់ពីវៀតណាម ដែលកត់ត្រាពីកំណើនប្រចាំត្រីមាសទី៣ ប្រមាណ ៧,៤ ភាគរយ។

PSA បានលើកឡើងថា ការធ្លាក់ចុះនៃវិស័យកសិកម្មថាជាកត្តាចម្បងដែលសម្ពាធលើកំណើន GDP ដោយវិស័យកសិកម្ម រុក្ខាប្រមាញ់ និងនេសាទ បានធ្លាក់ចុះ ២,៨ ភាគរយ ធៀបនឹងឆ្នាំមុន ដោយសារតែបញ្ហាអាកាសធាតុ។ ជាមួយគ្នានោះ វិស័យទេសចរណ៍ និងការនាំចេញនូវទំនិញដូចជាគ្រឿងអេឡិចត្រូនិក ក៏បានធ្លាក់ចុះផងដែរ៕