ព័ត៌មានអន្ដរជាតិ

អាមេរិក អូស្រ្តាលី និងហ្វីលីពីន រួមគ្នាធ្វើសមយុទ្ធយោធា ប្រមូលផ្តុំដោយយុទ្ធោបករណ៍ទំនើប

បានផុស

៣ ខែ មុន

នៅ

ថ្ងៃចន្ទ ១៣ មេសា ២០២៦

ដោយ

សហរដ្ឋអាមេរិកនិងអូស្ត្រាលីបានចូលរួមធ្វើលំហាត់សមយុទ្ធក្នុងសមុទ្រខាងត្បូង រួមគ្នាជាមួយប្រទេសហ្វីលីពីនជាលើកទីពីរ កាលពីពេលថ្មីៗ ចំពេលមានភាពតានតឹងផ្នែកផ្លូវទឹកយុទ្ធសាស្រ្តនេះជាមួយទីក្រុងប៉េកាំង។

យោងតាមភ្នាក់ងារសារព័ត៌មានរ៉យទ័រផ្សាយថ្ងៃទី១៣ ខែមេសា ឆ្នាំ២០២៦ កងទ័ពហ្វីលីពីនលើកឡើងនៅថ្ងៃចន្ទនេះថា៖ « សមយុទ្ធនេះមានរយៈពេល៤ថ្ងៃ ចាប់ពីថ្ងៃទី៩ ដល់ថ្ងៃទី១២ ខែមេសា ដែលប្រមូលផ្តុំដោយនាវាចម្បាំង យន្តហោះចម្បាំង និងយន្តហោះស៊ើបការណ៍ក្នុងប្រតិបត្តិការសម្របសម្រួលជាបន្តបន្ទាប់ ដើម្បីពង្រឹងសមត្ថភាពការពារដែនសមុទ្រ»។

កោះ Spratly របស់ហ្វីលីពីន។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការមួយលើកឡើងថា៖ « សមយុទ្ធនេះបានគូសបញ្ជាក់ពីសារៈសំខាន់នៃកិច្ចសហប្រតិបត្តិការការពារជាតិកាន់តែស៊ីជម្រៅក្នុងចំណោមប្រទេសទាំងបី និងការប្តេជ្ញាចិត្តរួមគ្នាចំពោះសន្តិសុខក្នុងតំបន់»។

ប្រទេសហ្វីលីពីនបានដាក់ពង្រាយយន្តហោះចម្បាំង FA-៥០ របស់ខ្លួន ខណៈប្រទេសអូស្ត្រាលីចូលរួមជាមួយយន្តហោះល្បាត P-៨A Poseidon និងសហរដ្ឋអាមេរិកបញ្ជូននាវាចម្បាំងម៉ាក USS Ashland អំឡុងពេលធ្វើសមយុទ្ធ។

គួរបញ្ជាក់ថា សមយុទ្ធនេះបានកើតឡើងមុនពេលបើកសមយុទ្ធយោធាទ្រង់ទ្រាយធំប្រចាំឆ្នាំដែលមានឈ្មោះថា Balikatan ឬ «ស្មាទល់នឹងស្មា» រវាងទីក្រុងម៉ានីលនិងទីក្រុងវ៉ាស៊ីនតោនជាលើកដំបូង ហើយក៏នឹងមានការចូលរួមដោយប្រទេសជប៉ុនយ៉ាងពេញលេញជាមួយប្រទេសអូស្ត្រាលីផងដែរ។

ប្រទេសហ្វីលីពីននិងប្រទេសចិនបានចោទប្រកាន់គ្នាទៅវិញទៅមកជុំវិញឧប្បត្តិហេតុជាបន្តបន្ទាប់នៅក្នុងសមុទ្រចិនខាងត្បូង រួមទាំងការប៉ះទង្គិចគ្នាថ្មីៗនេះ ដែលទីក្រុងប៉េកាំងបានបាញ់ផ្លោងទៅលើយន្តហោះឆ្មាំសមុទ្រហ្វីលីពីន។

យ៉ាងណា ទីក្រុងប៉េកាំងតែងតែប្រឆាំងនឹងសកម្មភាពយោធារួមគ្នារបស់ទីក្រុងម៉ានីលជាមួយដៃគូសម្ព័ន្ធមិត្តរបស់ពួកគេនៅសមុទ្រចិនខាងត្បូង ដោយអះអាងថាសមយុទ្ធបែបនេះនឹងបង្កើនភាពតានតឹងក្នុងតំបន់៕

ប្រែសម្រួល៖ ណឺ មិនា